ការបញ្ជាក់ឲ្យដឹងដោយជនជាប់ចោទដែលជាអតីតប្រធានមន្ទីរស-២១ ឬគុកទួលស្លែង កាំង ហ្កេកអ៊ាវ ហៅ ឌុច ត្រូវបានធ្វើឡើងក្នុងសវនាការអង្គសេចក្ដីនៅថ្ងៃពុធ ទី២៤ ខែមិថុនា ទាក់ទិននឹងអង្គហេតុនៃប្រតិបត្តិការនៅមន្ទីរស-២១ ឬគុកទួលស្លែង និងនៅទីពិឃាតជើងឯក ព្រមទាំងអង្គហេតុនៃការបង្កើតនិងប្រតិបត្តិការនៅមន្ទីរអប់រំកែប្រែព្រៃស ឬស-២៤។
ដោយឡែកទាក់ទិននឹងការសម្លាប់មនុស្សនៅគុកទួលស្លែង លោកមេធាវីការពារក្ដីរបស់ ឌុច គឺលោក កា សាវុធ បានចោទសួរ ឌុច យ៉ាងដូច្នេះ ៖ «លោកជាអ្នកបញ្ជាទៅថ្នាក់ក្រោមរបស់លោក ដើម្បីឲ្យកម្ទេចជនរងគ្រោះទាំង ១២.៣៨០នាក់ អ៊ីចឹងសូមលោកបញ្ជាក់ជូនទៅតុលាការឲ្យអស់ថា ថ្នាក់លើរបស់លោកមានអ្នកនេះៗដែលបញ្ជាលោក ដើម្បីឲ្យមហាជនទូទាំងប្រទេស ក៏ដូចជាសកលលោកគេឃើញ គេយល់ គេដឹងពីមុខឧក្រិដ្ឋជនទាំងនោះ»។
ឆ្លើយតបទៅនឹងសំណួរនេះ ឌុច បានថ្លែងថា តាមមាគ៌ាបក្ស ឲ្យតែខ្មាំងគឺត្រូវតែកម្ទេច សូម្បីតែ ប៉ុល ពត ក៏ត្រូវគោរពតាមមាគ៌ាបក្សដែរ ហើយគាត់បានបង្ហើបនូវឈ្មោះមេដឹកនាំពីរនាក់ដែលបានបញ្ជាមកលើរូបគាត់ផ្ទាល់ក្នុងការសម្លាប់ជនរងគ្រោះ។
ឌុច ថ្លែងយ៉ាងដូច្នេះថា ៖ «ក៏ប៉ុន្តែអ្នកដែលបញ្ជាផ្ទាល់ ចាត់ចែងកិច្ចការផ្ទាល់ពីលើខ្ញុំ គ្រប់ពេលវេលា ដំបូងគឺលោកគ្រូ សុន សេន នៃខ្ញុំ បន្ទាប់មកគឺ ពូ នួន គឺ នួន ជា នេះឯង»។
ចម្លើយរបស់ ឌុច ត្រង់ចំណុចនេះ បានធ្វើឲ្យលោកមេធាវីការពារក្ដីជជីកសួរបន្ថែមរកមនុស្សកំពូលដែលបានដាក់បញ្ជាឲ្យសម្លាប់មនុស្ស ៖ «អ៊ីចឹងអ្នកណាបញ្ជាលើលោក នួន ជា បញ្ជាលើ សុន សេន? មានទៀតទេសូមលោកបញ្ជាក់ឲ្យអស់កុំទុក»។
សំណួរនេះ ត្រូវបាន ឌុច ឆ្លើយយ៉ាងខ្លីថា ៖ «ឪម៉ែធំជាងគេ គឺ ប៉ុល ពត គ្មាននរណាធំជាង ប៉ុល ពត ទេ»។
ទោះយ៉ាងណា ឌុច បានអះអាងថា គាត់មិនដែលបានសម្លាប់មនុស្សដោយផ្ទាល់ដៃទេ ដែលការអះអាងនេះ បានធ្វើឲ្យមេធាវីការពារក្ដីរបស់គាត់ គឺលោក កា សាវុធ សួរបញ្ជាក់អំពីការដែល ឌុច សុខចិត្តទទួលទោស ៖ «លោកថា លោកមិនដែលបានកម្ទេចនរណាម្នាក់ដោយផ្ទាល់ដៃទេ ចុះហេតុអ្វីក៏លោកព្រមទទួលយកនូវឧក្រិដ្ឋកម្មទាំងអស់នោះ?»។
ចំពោះសំណួរនេះ ឌុច បានឆ្លើយថា ឧក្រិដ្ឋកម្មទាំងអស់កើតចេញពីមាគ៌ារបស់បក្សកុម្មុយនីស្តកម្ពុជា ហើយក្នុងឋានៈរបស់គាត់ជាបក្ខជនមួយរូប គាត់ត្រូវតែអនុវត្តនូវយន្តការឧក្រិដ្ឋរបស់បក្សទៅលើជីវិតមនុស្ស ១២.៣៨០នាក់យ៉ាងតិចនៅគុកទួលស្លែង៕