ភាពតឹងតែងបានកើតមានរវាងភាគីដើមចោទដែលមានដើមបណ្តឹងរដ្ឋប្បវេណីជាមួយព្រះរាជអាជ្ញានិងខាងភាគីចុងចោទមានជនជាប់ចោទ កាំង ហ្កេកអ៊ាវ ហៅ ឌុច និងមេធាវីការពារក្តីឲ្យជនជាប់ចោទ។
ការជជែកគ្នាតឹងតែងបានកើតមាននៅពេលដែលជនជាប់ចោទ ឈ្មោះ កាំង ហ្កេកអ៊ាវ ហៅ ឌុច ខ្លួនឯង និងមេធាវីការពារក្តីគាត់ សុំឲ្យតុលាការលើកលែងការចោទប្រកាន់ទាំងអស់ និងដោះលែង ឌុច ឲ្យមានសេរីភាព។
ប៉ុន្តែភាគីព្រះរាជអាជ្ញានិយាយថា ប្រសិនបើរកឃើញកំហុស ឌុច ត្រូវជាប់ទោសមួយជីវិត ប៉ុន្តែដោយសារ ឌុច មានការសហការជាមួយតុលាការ ទើបព្រះរាជអាជ្ញាស្នើបន្ថយទោសសមរម្យមកត្រឹម៤០ឆ្នាំ។
ចំណែកឯភាគីដើមបណ្តឹងរដ្ឋប្បវេណីនិយាយថា ការសោកស្តាយនិងបំណងសុំទោសរបស់ជនជាប់ចោទ កាំង ហ្កេកអ៊ាវ ហៅ ឌុច ត្រូវគេសង្ស័យតាំងពីដំបូងមកម៉្លេះ ថា មិនមានភាពសុទ្ធចិត្តនិងស្មោះត្រង់។
មេធាវីជនរងគ្រោះជាដើមបណ្តឹងរដ្ឋប្បវេណីបន្តថា កន្លងមករហូតមកដល់សប្តាហ៍នេះទ្វារបានទុកចំហខ្លះសម្រាប់ការសុំទោសរបស់ ឌុច ក៏ប៉ុន្តែនៅពេលនេះទ្វារបានបិទហើយក្រោយពី កាំង ហ្កេកអ៊ាវ ហៅ ឌុច សុំរួចខ្លួន៕