ឌុច ស្វាគមន៍ជនរងគ្រោះណាដែលប្រាថ្នាចង់ជួប

ដោយ ម៉ៅ សុធានី

2009-09-18

នៅឯសាលាក្តីខ្មែរក្រហមកាលពីថ្ងៃពុធ ទី១៦ ខែកញ្ញា ជនជាប់ចោទឈ្មោះ កាំង ហ្កេកអ៊ាវ ហៅ ឌុច អតីតប្រធានគុកទួលស្លែង បានថ្លែងឲ្យដឹងថា ប្រសិនបើជនរងគ្រោះទាំងឡាយណាប្រាថ្នាចង់ជួបរូបគាត់ គាត់ស្វាគមន៍នឹងជួបនៅឯមន្ទីរឃុំឃាំងរបស់គាត់។

Courtesy of ECCC

អតីតមេគុកទួលស្លែង កាំង ហ្កេកអ៊ាវ ហៅ ឌុច ក្នុងអំឡុងពេលដំណើរការសវនាការនៅសាលាក្ដីខ្មែរក្រហម ក្នុងរាជធានីភ្នំពេញ កាលពីថ្ងៃ២០ កក្កដា ២០០៩។

យោងតាមសេចក្តីប្រកាសព័ត៌មានរបស់សាលាក្តីចុះថ្ងៃទី១៧ កញ្ញា ចាប់តាំងពីការបើកសវនាការជំនុំជម្រះជនជាប់ចោទ ឌុច ដែលបានផ្តើមឡើងពីខែមីនា ឆ្នាំ២០០៩មក គឺមានសាក្សី ជនរងគ្រោះ អ្នកចិត្តសាស្ត្រ អ្នកប្រវត្តិសាស្ត្រ សរុបទាំងអស់៥៥នាក់ ដែលបានផ្តល់សក្ខីកម្មនៅចំពោះមុខតុលាការនេះ។ មានអ្នកចូលរួមអង្គុយសង្កេតមើលសវនាការក្នុងតុលាការជាមធ្យមមានចំនួន៣៣០នាក់ក្នុងមួយថ្ងៃ គិតជាចំនួនសារុបទាំងអស់គឺ២៣.៧៤២នាក់។

ជនជាប់ចោទ កាំង ហ្កេកអ៊ាវ ហៅ ឌុច បានទទួលស្គាល់នូវការទទួលខុសត្រូវរបស់ខ្លួនជាអ្នកចាត់ចែងមើលការខុសត្រូវនៅគុកទួលស្លែង ប៉ុន្តែបានបដិសេធនូវការចោទប្រកាន់ដែលថាខ្លួនបានសម្លាប់អ្នកទោសដោយផ្ទាល់ដៃ។

នៅទន្ទឹមនេះដែរ ឌុច ក៏បានសុំខមាទោសពីជនរងគ្រោះនិងក្រុមគ្រួសាររបស់គេ ហើយបានសារភាពនូវកំហុសរបស់ខ្លួនចំពោះឧក្រិដ្ឋកម្មដែលកើតឡើងក្នុងរបបខ្មែរក្រហម ហើយថាគាត់ធ្វើឡើងតាមតែបញ្ជាពីថ្នាក់លើប៉ុណ្ណោះ ពីព្រោះមានការភ័យខ្លាចអំពីការស្លាប់ខ្លួនឯងនិងក្រុមគ្រួសារ៕

បោះពុម្ព អ៊ីម៉េល