លោក ការ សាវុត្ថ បន្ថែមថា ទោះបីតុលាការខ្មែរក្រហមបានសម្រាលទោស ឌុច ពីការជាប់ឃុំឃាំងពីរយៈពេល ៣៥ឆ្នាំ មកត្រឹមតែ ១៩ឆ្នាំក្នុងពន្ធនាគារ ដោយសារ ឌុច ត្រូវបានរំលោភសិទ្ធិក្នុងអំឡុងពេលឃុំខ្លួនខុសច្បាប់ ដោយតុលាការយោធាកម្ពុជាក៏ដោយ។ លោកនឹងប្ដឹងជំទាស់ការកាត់ទោសនេះ ពីព្រោះ ឌុច មិនមែនជាអ្នកទទួលខុសត្រូវជាន់ខ្ពស់ក្នុងរបបខ្មែរក្រហមទេ។
លោកថា ឌុច ជានគរបាលក្រោមរបបខ្មែរក្រហម ដូច្នេះប្រសិនបើនគរបាលទទួលបញ្ជាឲ្យប្រព្រឹត្តខុស តុលាការត្រូវយករដ្ឋាភិបាលជំនាន់នោះមកកាត់ទោសជាជាងកាត់ទោស ឌុច។ លោកបន្ថែមថា ឌុច មិនមែនជាមេគុកតែម្នាក់ទេ ដែលសម្លាប់មនុស្សក្នុងរបបខ្មែរក្រហម។ ដូច្នេះ ឌុច មិនត្រូវនាំមកកាត់ទោសតែម្នាក់ឯងទេ។
ប្រធានអង្គជំនុំជម្រះសាលាដំបូងនៃសាលាក្ដីខ្មែរក្រហម លោក និល ណុន បានប្រាប់អង្គជំនុំជម្រះកាលពីថ្ងៃច័ន្ទថា ជនរងគ្រោះដែលត្រូវបានឃុំខ្លួននៅមន្ទីរ ស-២១ សុទ្ធតែរង់ចាំការសម្លាប់ទាំងអស់អនុលោមទៅតាមគោលនយោបាយរបស់បក្សកុម្មុយនីស្តកម្ពុជា ក្នុងការកម្ទេចខ្មាំងរបស់អង្គការ។ក្នុងចំណោមអ្នកទាំងឡាយដែលត្រូវបានសម្លាប់មានអតីតអ្នកគាំទ្ររបប លន់ នល់ ជនបរទេស កុមារ អ្នកជាប់ឃុំដែលមានឋានៈខ្ពស់ និងអតីតបុគ្គលិកមន្ទីរ ស-២១។ លើសពីនេះទៀត មានអ្នកជាប់ឃុំចំនួន ១០០នាក់បានស្លាប់ បន្ទាប់ពីបានគេបូមយកឈាមអស់ដោយអង្គភាពពេទ្យមន្ទីរ ស-២១។ ឌុច ទទួលស្គាល់ថា អ្នកជាប់ឃុំដែលបានស្លាប់ ឬត្រូវបានសម្លាប់ មានចំនួនច្រើនជាង ១២.២៧៣នាក់។
មេធាវីការពារក្តីដើមបណ្ដឹងរដ្ឋប្បវេណី លោក ហុង គឹមសួន ក៏មានគម្រោងប្ដឹងឧទ្ធរណ៍ចំពោះការច្រានចោលដើមបណ្ដឹងរដ្ឋប្បវេណី។ លោកថា ដើមបណ្ដឹងរដ្ឋប្បវេណីមានចំនួន ៩៣នាក់បានទាមទារឲ្យតុលាការខ្មែរក្រហម សង់ទីសក្ការៈ និងឆ្លាក់ឈ្មោះអ្នកស្លាប់នៅឯមន្ទីរ ស-២១។ ប៉ុន្តែតុលាការខ្មែរក្រហមទទួលស្គាល់ដើមបណ្ដឹងតែចំនួន ៦៦នាក់ប៉ុណ្ណោះ ដោយសារពុំមានឯកសារគ្រប់គ្រាន់។
អង្គជំនុំជម្រះបានសម្រេចចងក្រងពាក្យសម្ដីសុំអភ័យទោស និងការទទួលស្គាល់នូវការទទួលខុសត្រូវ ចំពោះការប្រព្រឹត្តរបស់ ឌុច នៅឯមន្ទីរ ស-២១ ដាក់លើគេហទំព័ររបស់សាលាក្ដីក្នុងរយៈពេល ១៤ថ្ងៃ ចំពោះការទាមទាររបស់ដើមបណ្ដឹងរដ្ឋប្បវេណី។
សហព្រះរាជអាជ្ញាកម្ពុជានៅមិនទាន់ប្រកាសនៅឡើយទេ ថាតើសហព្រះរាជអាជ្ញានឹងប្ដឹងសារទុក្ខការកាត់សេចក្ដី ឌុច នៅឡើយទេ បើទោះបីសហព្រះរាជអាជ្ញាស្នើឲ្យកាត់ទោស ឌុច រយៈពេល ៤០ឆ្នាំក៏ដោយ។
លោក រាជ សម្បត្តិ ប្រធានផ្នែកកិច្ចការសាធារណៈតុលាការខ្មែរក្រហម មានប្រសាសន៍នៅថ្ងៃអង្គារ ទី២៧ កក្កដា ថា ជាទូទៅតុលាការកំពូលមិនជំទាស់នឹងបណ្ដឹងសារទុក្ខទេ។ អ្នកដាក់បណ្ដឹងសារទុក្ខមានរយៈពេល ៣០ថ្ងៃដើម្បីដាក់បណ្ដឹង៕