តំណាងគណបក្សសម្ព័ន្ធដើម្បីប្រជាធិបតេយ្យ ខេត្តព្រៃវែង លោក សាន្ត ភណ្ឌ នៅថ្ងៃទី៣០ ខែវិច្ឆិកា បានចោទអាជ្ញាធរពាក់ព័ន្ធខេត្តព្រៃវែង ថាមានការរើសអើងនិន្នាការគណបក្សនយោបាយ និងមិនទទួលយកពាក្យបណ្ដឹងរបស់ខ្លួនឡើយ។
លោកបន្តថា អាជ្ញាធរថ្នាក់ឃុំស្រុករហូតដល់ខេត្ត ហាក់មិនរវល់អើពើចំពោះពាក្យបណ្ដឹងដែលបក្សខ្លួនប្ដឹងឲ្យជួយស៊ើបអង្កេត និងវែករកមុខជនខិលខូចវាយកម្ទេចស្លាកសញ្ញាគណបក្សខ្លួន កាលពីថ្ងៃទី២២ ខែវិច្ឆិកា ទេ។ លោកស្នើឲ្យអាជ្ញាធរ ត្រូវបំពេញកាតព្វកិច្ចរបស់ខ្លួនឲ្យមានឯករាជ អព្យាក្រឹត ដោយមិនត្រូវរើសអើងគណបក្សនយោបាយណាមួយនោះទេ។
មន្ត្រីគណបក្សសម្ព័ន្ធដើម្បីប្រជាធិបតេយ្យ បានឲ្យដឹងថា កាលពីថ្ងៃទី២២ ខែវិច្ឆិកា ស្លាកសញ្ញាបក្សខ្លួនដែលដាក់តាមផ្លូវ ក្នុងភូមិវាល ឃុំកញ្ចំ ស្រុកពារាំង ខេត្តព្រៃវែង ទំហំ ១២គុណ១៨ម៉ែត្រ ត្រូវជនមិនស្គាល់មុខបំផ្លាញ។
ទាក់ទិនបញ្ហានេះ លោក រស់ ធន អធិការនគរបាលរងស្រុកពារាំង ទទួលបន្ទុកផ្នែកសន្តិសុខ មានប្រសាសន៍ថា ស្ថាប័នលោកមិនទាន់ទទួលបានពាក្យបណ្ដឹងជុំវិញការបំផ្លាញស្លាកសញ្ញារបស់គណបក្សសម្ព័ន្ធដើម្បីប្រជាធិបតេយ្យនោះទេ។ លោកបន្តថា សមត្ថកិច្ចមិនបានរើសអើងនិន្នាការគណបក្សនយោបាយដូចការចោទប្រកាន់ទេ សំខាន់ឲ្យតែមានពាក្យបណ្ដឹងមកដល់ដៃ សមត្ថកិច្ចនឹងចាត់វិធានការស៊ើបអង្កេតភ្លាម។
យ៉ាងនេះក្តី លោកបណ្ឌិត ហង្ស ពុទ្ធា នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និចហ្វិច = NEFEC) មានប្រសាសន៍ថា សមត្ថកិច្ចមានតួនាទីបម្រើប្រជាពលរដ្ឋ មិនរើសអើងគណបក្សនយោបាយណាមួយទេ។ លោកលើកទឹកចិត្តឲ្យសមត្ថកិច្ចគ្រប់ជំនាញ ត្រូវបំពេញតួនាទីរបស់ខ្លួនឲ្យឯករាជ និងអព្យាក្រឹត។
មន្ត្រីសិទ្ធិមនុស្ស បានឲ្យដឹងថា មុនការបោះឆ្នោតចូលមកដល់ គេតែងសង្កេតឃើញមានរូបភាពគំរាមសកម្មជន ឬការបំផ្លាញស្លាកសញ្ញារបស់គណបក្សប្រឆាំង ពីជនមិនស្គាល់មុខមួយចំនួនកើតឡើង។ លោកចាត់ទុកសកម្មភាពនេះថា ជាការបំភិតបំភ័យ និងបំបាក់ស្មារតីអ្នកគាំទ្រគណបក្សប្រឆាំង មិនឲ្យចេញមុខចូលរួមធ្វើនយោបាយជាមួយបក្សប្រឆាំង។
កាលបរិច្ឆេទនៃការបោះឆ្នោតជ្រើសតាំងតំណាងរាស្ត្រអាណត្តិទី៥ នឹងចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។