លោក ស៊ូរិន ពិតស៊ូវ៉ាន់ (Surin Pitsuwan) អគ្គលេខាធិការអាស៊ាន បានប្រាប់អ្នកកាសែតក្រោយពីកិច្ចពិភាក្សានោះថា កិច្ចប្រជុំនោះបានពិភាក្សាគ្នាផ្ដោតលើកិច្ចសហប្រតិបត្តិការលើវិស័យឋាមពល បរិស្ថាន សិក្សាធិការ ហិរញ្ញវត្ថុ ទំនាក់ទំនងព័ត៌មាននៃជំងឺឆ្លង និងការគ្រប់គ្រងគ្រោះមហន្តរាយ។
លោក ស៊ូរិន ពិតស៊ូវ៉ាន់ ទៅមិនបានឆ្លើយទៅនឹងសំណួរអ្នកកាសែតដែលសួរអំពីបញ្ហាជម្លោះសមុទ្រចិនខាងត្បូងនោះទេ។ ក៏ប៉ុន្តែលោក សូរិន ពិតស៊ូវ៉ាន់ អះអាងថា កិច្ចប្រជុំនេះបានដំណើរការដោយមិនមានភាពតានតឹងទេ៖ «កិច្ចប្រជុំពេញអង្គនៃកិច្ចប្រជុំកំពូលអាស៊ីបូព៌ា បានប្រព្រឹត្តទៅយ៉ាងល្អ ដោយរាបសា និងប្រយ័ត្នប្រយែង»។
ក៏ប៉ុន្តែទន្ទឹមពេលមានសេចក្ដីរាយការណ៍ខ្លះអះអាងថា កិច្ចប្រជុំនេះមានភាពតានតឹងរវាងប្រធានាធិបតី លោក បារ៉ាក់ អូបាម៉ា (Barack Obama) ជាមួយនាយករដ្ឋមន្ត្រីចិន វិន ជាបាវ (Wen Jiabao) នៅពេលពិភាក្សាអំពីជម្លោះដែនសមុទ្រដណ្ដើមកោះគ្នារវាងចិននិងជប៉ុន ទីភ្នាក់ងារសារព័ត៌មាន រ៉យធើ (Reuters) ផ្សាយថ្ងៃទី២០ វិច្ឆិកាថា ក្នុងកិច្ចប្រជុំនោះ លោក បារ៉ាក់ អូបាម៉ា បានសុំឲ្យមានការបន្ធូរបន្ថយភាពតានតឹងក្នុងជម្លោះរវាង ចិន និងជប៉ុន ដណ្ដើមកោះគ្នា។ ដោយលោកបានលើកឡើងមិនកាន់ជើងខាងភាគីណា ហើយលោកបញ្ជាក់ថា វាជារឿងគ្រោះថ្នាក់ណាស់បើប្រទេសទាំងពីរ ចិន និងជប៉ុន ឈ្លោះគ្នា ព្រោះថាប្រទេសទាំងពីរនេះជាប្រទេសមហាអំណាចសេដ្ឋកិច្ចនៅក្នុងតំបន់។
ទីភ្នាក់ងារដដែលបានស្រង់សម្ដីនាយករដ្ឋមន្ត្រីចិន លោក វិន ជាបាវ ថា ភាកីចិន នៅតែរក្សាជំហរការពារជាតិរបស់ខ្លួនយ៉ាងម៉ឺងម៉ាត់ដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។