មន្ត្រីសាលាក្តីខ្មែរក្រហមថ្លែងឲ្យដឹងថា នៅក្នុងខែមិថុនាខាងមុខនេះក្រុមចៅក្រមនៃអង្គបុរេជំនុំជម្រះគ្រោងនឹងបើកសវនាការដើម្បីសម្រេចសេចក្តីឲ្យជ្រះស្រឡះនូវការខ្វែងគំនិតគ្នារវាងសហព្រះរាជអាជ្ញាជាតិនិងសហព្រះរាជអាជ្ញាអន្តរជាតិដែលស្នើឲ្យបើកការស៊ើបអង្កេតបន្ថែមលើអតីតអ្នកដឹកនាំនិងទទួលខុសត្រូវជាន់ខ្ពស់ខ្មែរក្រហមមួយចំនួនទៀត។
លោក រាជ សម្បត្តិ មន្ត្រីនាំពាក្យសាលាក្តីខ្មែរក្រហមថ្លែងបញ្ជាក់នៅថ្ងៃអង្គារថា សំណុំរឿងនោះកំពុងស្ថិតនៅក្នុងដៃនៃក្រុមចៅក្រមអង្គបុរេជំនុំជម្រះរួចរាល់ហើយ។
លោក រាជ សម្បត្តិ បានឲ្យដឹងថា ៖ «អ៊ីចឹងអង្គបុរេគាត់នឹងសម្រេចក្នុងខែមិថុនាខាងមុខនេះ ថាតើត្រូវចោទបន្ថែមឬក៏មិនចោទបន្ថែម។ អ៊ីចឹងយើងទុកឱកាសនេះឲ្យអង្គបុរេគាត់ជំនុំជម្រះទៅលើរឿងហ្នឹង គឺអ្នកច្បាប់គេនឹងធ្វើហើយ។ ហើយការជំនុំជម្រះហ្នឹង បើយើងយោងទៅលើវិធានផ្ទៃក្នុង មានន័យថាគេនឹងធ្វើជាលក្ខណៈសម្ងាត់ ហើយនៅក្នុងហ្នឹងសហព្រះរាជអាជ្ញាអន្តរជាតិគាត់បាននិយាយថាអាចឲ្យមានចំហខ្លះនិងសម្ងាត់ខ្លះ។ នេះគឺមិនមែនអាស្រ័យទៅលើភាគីទាំងអស់នោះទេ គឺអាស្រ័យទៅលើច្បាប់ហើយនិងការសម្រេចរបស់អង្គបុរេ»។
សូមជម្រាបថា កាលពីដើមឆ្នាំនេះសហព្រះរាជអាជ្ញាអន្តរជាតិ គឺលោកRobert Petit បានស្នើឲ្យបើកការស៊ើបអង្កេតសមាជិកខ្មែរក្រហមបន្ថែមទៀតដែលគេរាយការណ៍ថាយ៉ាងហោចមាន៦នាក់។
លោកRobert Petit អះអាងថា ឧក្រិដ្ឋជនទាំងនោះគួរតែស៊ើបអង្កេតដោយសហចៅក្រមស៊ើបអង្កេត ហើយថាសំណុំរឿងចុងក្រោយទាំងនោះនឹងនាំឲ្យមានការយល់ដឹងទូលំទូលាយបន្ថែមទៀតអំពីរបបខ្មែរក្រហម។
ក៏ប៉ុន្តែត្រូវសហព្រះរាជអាជ្ញាជាតិ គឺលោកស្រី ជា លាង បានជំទាស់ដោយសំអាងលើការបន្តរក្សាស្ថិរភាពនយោបាយព្រមទាំងដើម្បីរក្សាសន្តិភាពនិងការផ្សះផ្សាជាតិ។
ការជំទាស់របស់លោកស្រី ជា លាង ត្រូវអង្គការសង្គមស៊ីវិលជាតិនិងអន្តរជាតិមួយចំនួនថ្លែងថា គឺកើតឡើងដោយសារមានការជ្រៀតជ្រែកខាងនយោបាយ។
ទោះបីជាយ៉ាងណាក៏ដោយ រដ្ឋមន្ត្រីក្រសួងព័ត៌មានគឺលោក ខៀវ កាញារីទ្ធ និងជាអ្នកនាំពាក្យរាជរដ្ឋាភិបាលកម្ពុជាបានគូសបញ្ជាក់ថា រដ្ឋាភិបាលចង់ឃើញសាលាក្តីបន្តដំណើរទៅមុខទៅតាមរបៀបវារៈរបស់ខ្លួន។
លោក ខៀវ កាញារីទ្ធ បានមានប្រសាសន៍ថា ៖ «របៀបវារៈនៃសាលាក្ដី គឺបានន័យថា អ្វីដែលបានកំណត់គ្នាជាមួយនឹងអង្គការសហប្រជាជាតិហើយ ហើយនិងកាត់ក្ដីលើដំណើរការដែលយើងបានឯកភាព និងលើចំនួនមនុស្សដែលយើងបានឯកភាពគ្នាហើយ ហើយឯកភាពគ្នាដែលយកច្បាប់របស់កម្ពុជាធ្វើជាអាទិភាពជាបឋម យើងហៅថា មានបឋមភាពមុន ជារបៀបវារៈរបស់យើង»។
របបខ្មែរក្រហមបានបណ្តាលឲ្យមនុស្សប្រមាណ១លាន៧សែននាក់ស្លាប់ដោយអយុត្តិធម៌កាលពី៣០ឆ្នាំមុន។
រហូតមកទល់ពេលនេះមានមេដឹកនាំជាន់ខ្ពស់ខ្មែរក្រហម៥នាក់ដែលត្រូវបានឃុំខ្លួនដើម្បីកាត់ទោស ហើយបច្ចុប្បន្នសាលាក្តីកំពុងបន្តជំនុំជម្រះលើសំណុំរឿងអតីតមេគុកទួលស្លែង កាំង ហ្កេកអ៊ាវ ហៅ ឌុច៕