ប្រធានផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា លោក រាជ សម្បត្តិ បានថ្លែងឲ្យដឹងថា កាលពីល្ងាចថ្ងៃ៩ កុម្ភៈ ថា អង្គជំនុំជម្រះវិសាមញ្ញបានបញ្ចប់កិច្ចប្រជុំពេញអង្គលើកទី៧របស់ខ្លួន ដោយបានអនុម័តវិសោធនកម្មវិធានផ្ទៃក្នុងមួយចំនួន ដែលត្រូវបានតាក់តែងឡើងដើម្បីធានានូវប្រសិទ្ធភាព និងភាពងាយស្រួលដល់ការចូលរួមរបស់ដើមបណ្តឹងរដ្ឋប្បវេណីក្នុងដំណើរការនីតិវិធីតុលាការកាត់ទោសអតីមេដឹកនាំខែ្មរក្រហម។
លោក រាជ សម្បតិ្ត បានបញ្ជាក់ថា អង្គភាពជនរងគ្រោះបានទទួលការដាក់ពាក្យបណ្តឹងសុំតាំងខ្លួនជាដើមបណ្តឹងរដ្ឋប្បវេណីមានប្រហែលជា ៤ពាន់នាក់។
លោក រាជ សម្បត្តិ បានបញ្ជាក់ថា ៖ «ចំនួននេះគឺច្រើនមែនទែន ៤ពាន់នាក់ ហើយបើសិនជាយើងគិតអ៊ីចេះវិញថា មនុស្សម្នាក់និយាយតែ ១ម៉ោង អ៊ីចឹង ៤ពាន់វាត្រូវស៊ីពេលអស់ប៉ុន្មានឆ្នាំ? ចុះបើម្នាក់ដល់ទៅ ៣ម៉ោង។ យូរអ៊ីចឹងហើយបានជាគេត្រូវមានមេធាវីនាំមុខដើម្បីតំណាងឲ្យដើមបណ្ដឹងរដ្ឋប្បវេណី ដែលគាត់ត្រូវធ្វើការជាមួយនឹងមេធាវីរបស់ដើមបណ្ដឹងរដ្ឋប្បវេណីទាំងអស់ហ្នឹង»។
យោងតាមសេចក្តីប្រកាសព័ត៌មានរបស់អង្គជំនុំជម្រះវិសាមញ្ញក្នុងតុលាការកម្ពុជាដែលបានចេញនៅរសៀលថ្ងៃទី៩ កុម្ភៈ បានបង្ហាញថា សហមេធាវីនាំមុខតំណាងដើមបណ្តឹងរដ្ឋប្បវេណីនឹងស្ថិតនៅក្នុងអង្គភាពមួយដាច់ដោយឡែកពីអង្គជំនុំជម្រះវិសាមញ្ញក្នុងតុលាការកម្ពុជា ដែលត្រូវបង្កើតឡើងដើម្បីធានាឯករាជភាពរបស់សហមេធាវីនាំមុខ និងផ្តល់លទ្ធភាពជាក់ស្តែងដល់អង្គភាពគាំពារជនរងគ្រោះ ដើម្បីទទួលខុសត្រូវរបស់ខ្លួនឲ្យកាន់តែប្រសើរឡើង។
យោងតាមសេចក្តីប្រកាសព័ត៌មានដដែលបានឲ្យដឹងទៀតថា កិច្ចប្រជុំពេញអង្គលើកទី៧ បានផ្តល់ប្រយោជន៍កាន់តែទំលំទូលាយជាងមុនដល់ជនរងគ្រោះ និងផ្តល់អំណាចដល់អង្គភាពជនរងគ្រោះ ដែលមានឈ្មោះថ្មីជាអង្គភាពគាំពារជនរងគ្រោះក្នុងការបង្កើតកម្មវិធី និងវិធានការថ្មីៗដែលកើតឡើងនៅក្រៅកិច្ចដំណើរការនីតិវិធីតុលាការជាផ្លូវការ។
លោក រាជ សម្បត្តិ ជាប្រធានផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា បានលើកឡើងទៀតថា ការសន្និដ្ឋានបញ្ចប់នៃកិច្ចប្រជុំពេញអង្គលើកទី៧នេះ គឺជាការពន្លឿននៃដំណើរការកាត់ក្តីអតីតមេដឹកនាំខ្មែរក្រហមសំណុំរឿងលេខ០០២ ផងដែរ។
លោក រាជ សម្បត្តិ បានមានប្រសាសន៍ទៀតថា ដើមបណ្តើងរដ្ឋប្បវេណីទាំងអស់ ពួកគេមានសំណងជាសមូហភាពនិងផ្លូវចិត្តតែមួយ ប៉ុន្តែសំណងនោះមិនទាន់ដឹងថាជាអ្វីនៅឡើយ។
លោក រាជ សម្បត្តិ បានថ្លែងថា ៖ «សំណងត្រូវតែជាសំណងសមូហភាពមួយ កុំឲ្យម្នាក់សុំគោ ម្នាក់សុំក្របី ម្នាក់សុំដំរី ម្នាក់សុំសេះអ៊ីចឹងទៅ ធ្វើឲ្យការសុំហ្នឹងវាអត់មានប្រសិទ្ធភាព»។
នៅថ្ងៃទី១១ ដល់ថ្ងៃទី១៥ កុម្ភៈ ឆ្នាំ២០១០ អង្គជំនុំជម្រះវិសាមញ្ញក្នុងតុលាការកម្ពុជា គ្រោងនឹងបើកសវនាការឧទ្ធរណ៍រឿងឃុំខ្លួនអតីតមេដឹកនាំកំពូលក្នុងរបបកម្ពុជាប្រជាធិបតេយ្យបន្តចំនួន ៣រូប រួមមាន ខៀវ សំផន, អៀងសារី និង អៀង ធីរិទ្ធ៕