ការប្រាប់ឲ្យដឹងអំពីចំនួនសាក្សីនេះ ធ្វើឡើងជាលើកដំបូងដោយលោកស្រី វិនឌី ឡុបវីន (Wendy Lobwein) អ្នកសម្របសម្រួលផ្នែកគាំពារសាក្សីនិងអ្នកជំនាញនៃសាលាក្តីខ្មែរក្រហមនៅក្នុងសន្និសីទសារព័ត៌មានមួយកាលពីរសៀលថ្ងៃពុធ ទី១ ខែកក្កដានេះ។
ក្រៅពីការប្រាប់ចំនួនសាក្សីសម្រាប់ករណី លោកស្រី Wendy Lobwein ក៏បានថ្លែងប្រាប់អំពីការងាររបស់ផ្នែកគាំពារសាក្សីនិងអ្នកជំនាញដូច្នេះថា ៖ «ខ្ញុំមានការងារចម្បងសំខាន់ៗ៣ ហើយយើងមាន ៣ដំណាក់កាលផងដែរ គឺវាទាក់ទងទៅនឹងការផ្ដល់សេវាកម្មការពារដល់សាក្សី»។
លោក ជុំ ម៉ី អតីតអ្នកទោសគុកទួលស្លែង ដែលឥឡូវលោកជាសាក្សីម្នាក់នៃសាលាក្តីខ្មែរក្រហមថ្លែងដូច្នេះ ៖ «គេយកចិត្តទុកដាក់ជាមួយខ្ញុំណាស់នៅខាងការពារសាក្សីហ្នឹង ហើយយើងឆ្លើយបំភ្លឺយ៉ាងម៉េច អីយ៉ាងម៉េច គាត់ក៏គាំពារយើងដែរ គាត់ថា អាហ្នឹងស្រេចតែសិទ្ធិរបស់យើងទេ សំខាន់យើងទទួលពីចៅក្រមមកយ៉ាងម៉េច យើងត្រូវអនុវត្តមានហ្នឹងទៅ»។
លោក ឡុង បញ្ញាវុឌ្ឍ មន្រ្តីគម្រោងយុត្តិធម៌នៅកម្ពុជា ដែលតាមដានដំណើរការកាត់ក្តីរបស់សាលាក្តីខ្មែរក្រហម បានថ្លែងថា លោកស្វាគមន៍ការបង្ហាញរបស់ផ្នែកគាំពារសាក្សីនិងអ្នកជំនាញនៃសាលាក្តីខ្មែរក្រហម ក៏ប៉ុន្តែលោកថ្លែងបន្ថែមដូច្នេះ ៖ «តាំងពីការកត់សម្គាល់កន្លងមក ខ្ញុំអត់ដែលឃើញផ្នែកអង្គភាពការពារជនរងគ្រោះនៅអង្គុយជាមួយសាក្សីហ្នឹងដើម្បីលើកទឹកចិត្ត ឬមួយក៏លួងលោមជនរងគ្រោះកុំឲ្យហូរទឹកភ្នែក ឬមួយកុំឲ្យមានអារម្មណ៍តានតឹង ខ្វះកន្លែងហ្នឹង។ ខ្ញុំគិតថា គួរតែពិចារណាឡើងវិញ ព្រោះអីសាក្សីត្រូវការអ្នកអមមួយចំនួនដែរ»។
ចាប់តាំងពីពេលដែលសាលាក្តីខ្មែរក្រហម ចាប់ផ្តើមដំណើរការជំនុំជម្រះរឿងក្តីរបស់អតីតជនជាប់ចោទឈ្មោះ កាំង ហ្កេកអ៊ាវ ហៅ ឌុច និងសួរដេញដោលអំពីឧក្រិដ្ឋកម្មនៅគុកទួលស្លែងមក មានអ្នកជំនាញអន្តរជាតិចំនួន ២រូប និងសាក្សីជាជនជាតិខ្មែរចំនួន ២រូប គឺលោក វ៉ាន់ ណាត និងលោក ជុំ ម៉ី ជាជាងគំនូរ ដែលបានរួចជីវិតពីមន្ទីរ ស-២១ ឬគុកទួលស្លែង ត្រូវសាលាក្ដីខ្មែរក្រហមអញ្ជើញឲ្យមកបំភ្លឺជូនអង្គជំនុំជម្រះ ហើយនៅថ្ងៃទី១ កក្កដានេះ លោក ប៊ូ ម៉េង ដែលជាសាក្សីផ្ទាល់ទី៣ ដែលបានរួចជីវិតពីមន្ទីរ ស-២១ ដែរនោះ ក៏ផ្តល់សក្ខីកម្មដល់អង្គជំនុំជម្រះដែរ។
ការជំនុំជម្រះរបស់ជនជាប់ចោទឈ្មោះ កាំង ហ្កេកអ៊ាវ ហៅ ឌុច អតីតប្រធានគុកទួលស្លែងក្នុងដំណាក់កាលទីមួយ ដែលគ្រោងដោយសាលាដំបូងនៃសាលាក្តីខ្មែរក្រហម នឹងបញ្ចប់នៅថ្ងៃទី២ ខែកក្កដានេះ ហើយការជំនុំជម្រះដំណាក់កាលទីពីរ នឹងត្រូវបន្តធ្វើរយៈពេលបីខែទៀត រហូតដល់ថ្ងៃទីមួយ ខែតុលា ឆ្នាំ២០០៩៕