ជនរងគ្រោះធ្លាប់ជាប់គុកទួលស្លែងនិយាយថា យុត្តិធម៌ពីការជំនុំជម្រះរឿងក្តីឧក្រិដ្ឋខ្មែរក្រហមទើបតែមើលឃើញយុត្តិធម៌ត្រឹមតែ៣០%នៅឡើយ នៅពេលដែលសវនាការ ឌុច ជិតនឹងបញ្ចប់បិទសំណុំរឿងទៅហើយ។
ការថ្លែងនេះធ្វើឡើងដោយជនរងគ្រោះជាអតីតអ្នកទោសនៅគុកទួលស្លែងពីររូប គឺលោក ប៊ូ ម៉េង និងលោក ជុំ ម៉ី ខណៈដែលសាលាដំបូងនៃសាលាក្តីខ្មែរក្រហមកំពុងធ្វើសវនាការលើរឿងក្តីឧក្រិដ្ឋកម្មខ្មែរក្រហមលេខ០០១ របស់ជនជាប់ចោទ កាំង ហ្កេកអ៊ាវ ហៅ ឌុច អតីតប្រធានគុកទួលស្លែង កាលពីថ្ងៃច័ន្ទ ទី២៣ ខែវិច្ឆិកា ឆ្នាំ២០០៩។
លោក ប៊ូ ម៉េង ថ្លែងថា ៖ «២០ទៅ៣០% បានជាខ្ញុំថាអ៊ីចឹង ព្រោះខ្ញុំអត់បានទទួលការពិតពី ឌុច»។
អតីតអ្នកទោសគុកទួលស្លែងមួយរូបទៀត គឺលោក ជុំ ម៉ី បានបន្ទរសម្ដីលោក ប៊ូ ម៉េង លើបញ្ហានេះថា រហូតមកដល់ពេលនេះ ជនជាប់ចោទ ឌុច នៅលាក់លៀមមិនទាន់និយាយការពិតអស់នៅឡើយទេ ដោយលោកលើកឡើងដូច្នេះ ៖ «ឌុច មិនមែន ឌុច ធម្មតាទេ មិនមែន នួន ជា មិនមែន អៀង សារី មិនមែន ខៀវ សំផន ទេ។ ខ្ញុំវិភាគ ខ្ញុំឆ្លុះបញ្ចាំងទៅ ឌុច គឺថាក្រឡិចក្រឡុចណាស់មនុស្សហ្នឹង មិនមែនធម្មតាទេ។ នួន ជា, ខៀវ សំផន មិនក្រឡិចក្រឡុចដល់ឌុចទេ ឌុចហ្នឹងពូកែក្រឡិចក្រឡុចណាស់»។
នៅថ្ងៃច័ន្ទ ទី២៣ វិច្ឆិកា ភាគីដើមបណ្តឹងរដ្ឋប្បវេណីបានឡើងធ្វើសេចក្តីសន្និដ្ឋានរបស់ខ្លួនជូនអង្គសវនាការនិងទាមទារឱ្យមានសំណងសម្រាប់ជនរងគ្រោះនៅក្នុងរបបខ្មែរក្រហម។
លោក ប៊ូ ម៉េង និងលោក ជុំ ម៉ី បន្តថា ជនជាប់ចោទ កាំង ហ្កេកអ៊ាវ ហៅ ឌុច មានភាពប៉ិនប្រសប់ក្នុងល្បិចនិយាយលាក់ព័ត៌មាន។
ការថ្លែងរបស់ជនរងគ្រោះទាំងពីរកើតមាននៅចំថ្ងៃទីមួយដែលសាលាដំបូងនៃសាលាក្តីខ្មែរក្រហមចាប់ផ្តើមបើកសវនាការជាថ្មី បន្ទាប់ពីបានផ្អាករយៈពេលជាងមួយខែមក។
នៅក្នុងសវនាការ លោកប្រធានចៅក្រម និល ណុន បានប្រកាសថា ការបើកសវនាការបន្តជាថ្មីនេះ គឺជាសវនាការចុងក្រោយលើសំណុំរឿងក្តីលេខ០០១ របស់ជនជាប់ចោទ កាំង ហ្កេកអ៊ាវ ហៅ ឌុច ដែលគ្រោងធ្វើពេញមួយសប្តាហ៍ សម្រាប់ភាគីទាំងអស់ធ្វើសេចក្តីសន្និដ្ឋានរបស់ខ្លួន។
លោកប្រធានចៅក្រម និល ណុន បានថ្លែងថា ៖ «នៅក្នុងសប្ដាហ៍នេះគឺចាប់ពីថ្ងៃនេះទៅរហូតដល់ថ្ងៃទី២៦ ឬក៏ថ្ងៃទី២៧ អង្គជំនុំជម្រះនឹងដំណើរការសវនាការដើម្បីស្តាប់នូវសេចក្តីសន្និដ្ឋានបញ្ចប់កិច្ចពិភាក្សាដេញដោលរបស់ភាគី។ អង្គជំនុំជម្រះសូមរំឭកដល់ភាគីថា ដំណើការសវនាការពិភាក្សាដេញដោលសំណុំរឿងលេខ០០១នេះ គឺឈានដល់ដំណាក់កាលចុងក្រោយហើយ»។
ការប្រកាសចេញសេចក្តីសម្រេចចុងក្រោយ ថាតើជនជាប់ចោទឈ្មោះ កាំង ហ្កេកអ៊ាវ ហៅ ឌុច នឹងមានទោសយ៉ាងណានោះនៅមិនទាន់ដឹងនៅឡើយទេ។
លោក ប៊ូ ម៉េង ជាជនរងគ្រោះនៅគុកទួលស្លែង ថ្លែងថា រហូតមកដល់ពេលនេះលោកនៅតែមិនមានជំនឿលើយុត្តិធម៌បានមកពីការកាត់ក្តីអតីតប្រធានគុកទួលស្លែង ឌុច នៅឡើយទេ ដរាបណាលោកមិនទាន់ឃើញសាលក្រមចេញ៕