អ្នកវិភាគសេដ្ឋកិច្ចមួយចំនួន យល់ឃើញថា ដើម្បីធ្វើឲ្យសេដ្ឋកិច្ចកើនឡើងខ្ពស់ពីរខ្ទង់ ការជំរុញឲ្យប្រជាជនកម្ពុជាចំណាយលើការប្រើប្រាស់ គឺជារឿងសំខាន់។
មានស្ថាប័នស្រាវជ្រាវ និងអង្គការក្រៅរដ្ឋាភិបាល មួយចំនួនបានព្យាករណ៍កំណើនសេដ្ឋកិច្ចស្ទើរតែស្រដៀងគ្នាក្នុងឆ្នាំ ២០១១ និង ២០១២។ ការព្យាករណ៍ទាំងនោះ ដោយសារតែវិស័យស្នូល ដូចជាកសិកម្ម ឧស្សាហកម្ម និងសេវាកម្ម មិនទទួលរងផលប៉ះពាល់ខ្លាំងពីវិបត្តិសេដ្ឋកិច្ចខាងក្រៅ ដូចជាពីសហគមន៍អឺរ៉ុបជាដើម។ វិស័យសំខាន់របស់កម្ពុជាទាំងនោះ ដូចជាវិស័យកសិកម្មមានការកើនឡើងជាង ៣% និងវិស័យនាំចេញសំលៀកបំពាក់ គឺកើនឡើង ៣២% និងចំនួនរោងចក្រក៏បានកើនឡើងដែរនៅក្នុងឆ្នាំ ២០១១ និងវិស័យផ្សេងៗទៀតក៏កើនឡើងដែរ។
ទោះជាយ៉ាងណា ក៏ដោយសារបរិមាណតម្រូវការខាងក្រៅទំនងជានៅមានលក្ខណៈទន់ខ្សោយ ដូច្នេះបណ្ដាប្រទេសកំពុងអភិវឌ្ឍជាច្រើនចាំបាច់ត្រូវពឹងផ្អែកតិចតួចលើការនាំចេញ និងពឹងផ្អែកឲ្យបានច្រើន លើបរិមាណតម្រូវការក្នុងស្រុក ដើម្បីរក្សាបាននូវកំណើនសេដ្ឋកិច្ចខ្ពស់។
របាយការណ៍សេដ្ឋកិច្ច អាស៊ីបូព៌ា និងប៉ាស៊ីហ្វិក របស់ធនាគារពិភពលោក «ការចាប់យកប្រភពកំណើនថ្មី» បាននិយាយថា កំណើនសេដ្ឋកិច្ចនៅក្នុងតំបន់ទាំងនោះនៅតែមានភាពរឹងមាំនៅក្នុងបណ្ដាប្រទេសកំពុងអភិវឌ្ឍនៅតំបន់ អាស៊ីបូព៌ា និងប៉ាស៊ីហ្វិកទាំងនោះ។ ក្នុងរបាយការណ៍ដដែលបានបន្តថា បើទោះបីជាមានកំណើនយឺត ក្រោយពេលមានវិបត្តិហិរញ្ញវត្ថុក៏ដោយ ក៏តំបន់ទាំងនេះចាំបាច់ត្រូវតែកាត់បន្ថយនូវភាពពឹងផ្អែករបស់ខ្លួន លើការនាំចេញ និងស្វែងរកនូវប្រភពនៃកំណើនថ្មី។
សេដ្ឋវិទូរបស់ធនាគារពិភពលោក និងជាប្រធានអ្នកនិពន្ធរបាយការណ៍នេះ លោក ប្រ៊ីស ឃ្វីលីន (Bryce Quillin) មានប្រសាសន៍ថា ប្រទេសមួយចំនួននឹងចាំបាច់ត្រូវតែជំរុញបង្កើនការប្រើប្រាស់ក្នុងគ្រួសារ។ លោក បន្តថា ជាមួយនឹងវិស័យហិរញ្ញវត្ថុដែលកំពុងប្រែប្រួលដោយសារតែវិបត្តិហិរញ្ញវត្ថុនេះ គឺត្រូវរកវិធីថ្មីជាច្រើនដើម្បីធ្វើហិរញ្ញប្បទានឲ្យកាន់តែច្រើន ដោយរដ្ឋាភិបាលត្រូវផ្ដោតយកចិត្តទុកដាក់លើការបង្កើនគម្រោងហេដ្ឋារចនាសម្ពន្ធ។
អ្នកសេដ្ឋកិច្ចជាន់ខ្ពស់របស់ធនាគារពិភពលោកប្រចាំនៅកម្ពុជា លោក ជា ហួត មានប្រសាសន៍ថា ការជំរុញការចំណាយ ឬហៅថាការចំណាយរបស់វិស័យឯកជន (Private Consumption) គឺមានសារៈសំខាន់សម្រាប់សេដ្ឋកិច្ចកម្ពុជា។ លោក ជា ហួត បន្ថែមថា ប្រទេសកម្ពុជាអាចអនុវត្តន៍គោលនយោបាយនេះបាន ប៉ុន្តែការចំណាយនោះ ត្រូវសមាមាត្រនឹងចំណូលដែលពួកគេរកបានដែរ ដោយលោក បញ្ជាក់ថា ការចំណាយលើវិស័យឯកជននេះតំណាងឲ្យ ៨៥% នៃផលិតផលដុលសរុប ឬជី.ឌី.ភី (GDP) ហើយការចំណាយនេះបានកើនឡើងប្រមាណ ១៣% ក្នុងឆ្នាំ ២០១១។
របាយការណ៍អភិវឌ្ឍសកលឆ្នាំ ២០១១ បានឲ្យដឹងថា ប្រទេសកម្ពុជាមានចំនួនប្រជាជនដែលរកចំណូលបាន ២ដុល្លារ ក្នុងមួយថ្ងៃ មានប្រមាណជាង ៧លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។