ការឃោសនាបោះឆ្នោតនៅសៀមរាប មានភាពល្អប្រសើរ បើទោះជាមានបញ្ហាខ្លះក៏ដោយ

ដោយ សាវយុត

2008-07-07

មន្រ្តីគណៈកម្មការរៀបចំការបោះឆ្នោតនិងអង្គការសិទ្ធិមនុស្សក្រៅរដ្ឋាភិបាលក្នុងខេត្តសៀមរាប បានអះអាងថា យុទ្ធនាការឃោសនាបោះឆ្នោតរបស់គណបក្សនយោបាយនានាក្នុងរយៈពេល ១០ថ្ងៃ កន្លងមកនេះ មានលទ្ធផលល្អប្រសើរ បើទោះជាមានករណីគំរាមកំហែង ការរារាំងមិនឲ្យបិទខិត្តប័ណ្ណនិងការរំខានដល់គណបក្សនយោបាយខ្លះក៏ដោយ ។

ប្រធានគណៈកម្មការរៀបចំការបោះឆ្នោតខេត្តសៀមរាប លោក នឹម វ៉ាន់សំ បានមានប្រសាសន៍កាលពីព្រឹកថ្ងៃអាទិត្យ ទី៦ ខែកក្កដា ថា ចាប់ពីថ្ងៃយុទ្ធនាការឃោសនាបោះឆ្នោតដំបូងថ្ងៃទី២៦ ខែមិថុនា រហូតដល់ថ្ងៃទី៦ ខែកក្កដា មានរយៈពេល ១០ថ្ងៃហើយ ឯលទ្ធផលនៃយុទ្ធនាការរបស់គណបក្សនយោបាយនានាគឺមានដំណើរការល្អប្រសើរ បើទោះជាក្នុងនោះមានការគំរាមកំហែង មានការបំផ្លាញខិត្តប័ណ្ណឃោសនានិងមានបណ្តឹងពីគណបក្សនយោបាយខ្លះក៏ដោយ ។

លោក នឹម វ៉ាន់សំ មានប្រសាសន៍យ៉ាងដូច្នេះ ៖ «ការឃោសនានៅតាមផ្លូវគឺគ្មានអំពើហិង្សាអ្វីទេ ប៉ុន្តែនៅតែមានបណ្ដឹងអីបន្តិចបន្តួច» ។

មន្ត្រីរៀបចំការបោះឆ្នោតខេត្តសៀមរាប បានឲ្យដឹងថា ក្នុងរយៈពេល ១០ថ្ងៃនៃយុទ្ធនាការឃោសនាបោះឆ្នោតកន្លងមកនេះ គេទើបតែបានទទួលបណ្តឹងចំនួន៣ ប៉ុណ្ណោះ ស្តីពីការរារាំងយុទ្ធនាការឃោសនានិងការគំរាមកំហែង ។

ទោះយ៉ាងណា ប្រធានក្រុមការងារគណបក្សសមរង្ស៊ីខេត្តសៀមរាប អ្នកស្រី កែ សុវណ្ណារ័ត្ន បានមានប្រសាសន៍ថា យុទ្ធនាការឃោសនាកន្លងមក កន្លែងខ្លះ អាចទទួលយកបានថាមានលក្ខណៈប្រសើរកន្លែងខ្លះទៀត មិនអាចទទួលយកបានទេ ដោយសារតែមានការរារាំងនិងគំរាមកំហែងដល់សកម្មជន ។

អ្នកស្រី កែ សុវណ្ណារ័ត្ន មានប្រសាសន៍ថា ៖ «កន្លែងខ្លះគឺយើងអាចទទួលយកបាន ប៉ុន្តែកន្លែងខ្លះទៀត យើងនៅតែមានការបារម្ភ» ។

តាមអ្នកស្រី កែ សុវណ្ណារ័ត្ន បានឲ្យដឹងថា ក្នុងយុទ្ធនាការ ១០ថ្ងៃកន្លងមកនេះ មានការរំលោភមកលើសកម្មជនគណបក្សសមរង្ស៊ី ចំនួន ៧ករណី ដូចជាការគំរាមកំហែង ការរារាំងការឃោសនា និងការបំផ្លាញចោលខិត្តប័ណ្ណដែលបិទនៅតាមដើមឈើនៅទីសាធារណៈជាដើម ។

ចំណែកប្រធានក្រុមការងារគណបក្សហ៊្វុនស៊ិនប៉ិចខេត្តសៀមរាប លោក ស៊ឹម សុន បានមានប្រសាសន៍ថា លោកមិនហ៊ានសន្និដ្ឋានអំពីលទ្ធផលយុទ្ធនាការឃោសនាថាយ៉ាងណានោះទេ ពីព្រោះក្នុងរយៈពេល ១០ថ្ងៃមកនេះ មានការរំលោភបំពានពីមន្ត្រីឃុំ ភូមិ ដែលគាំទ្រគណបក្សប្រជាជនកម្ពុជា មកលើសកម្មជនគណបក្សហ៊្វុនស៊ិនប៉ិច ៥ករណីមកហើយ ។

លោក ស៊ឹម សុន ថ្លែងដូច្នេះថា ៖ «យើងមាន ៥ករណី ក្រៅពីហ្នឹង ដូចជាអត់មានអីទេ» ។

អ្នកស៊ើបអង្កេតរបស់អង្គការសិទ្ធិមនុស្ស លីកាដូ ខេត្តសៀមរាប លោក ចៅល័ក្ខ វណ្ណា បានមានប្រសាសន៍ថា យុទ្ធនាការឃោសនារកសំឡេងឆ្នោតរបស់គណបក្សនយោបាយនានា មានស្ថានភាពល្អប្រសើរ បើទោះជាមានការគំរាមកំហែង ការរារាំងខ្លះនិងបំផ្លាញចោលខិត្តប័ណ្ណគណបក្សផ្សេងៗខ្លះក៏ដោយ ក៏មិនមានអំពើហិង្សានិងការសម្លាប់ទេ ៖ «ចាប់តាំងពីថ្ងៃ ២៦ [មិថុនា] រហូតមកដល់ថ្ងៃនេះ យើងឃើញថា មានដំណើរការល្អប្រសើរ ទោះជាមានការរារាំងបន្តិចបន្តួច» ។

អង្គការសិទ្ធិមនុស្សក្រៅរដ្ឋាភិបាលបានឲ្យដឹងថា ក្នុងរយៈពេល១០ថ្ងៃកន្លងមកនេះ គេបានទទួលបណ្តឹងពីគណបក្សនយោបាយស្តីពីការគំរាមកំហែង ការរារាំង និងការបំផ្លាញខិត្តប័ណ្ណឃោសនា តែ ៤ករណីប៉ុណ្ណោះ ។

នៅខេត្តសៀមរាប មានគណបក្សនយោបាយចំនួន ១០ បាននិងកំពុងឃោសនារកសំឡេងឆ្នោត ក្នុងចំណោមគណបក្សទាំងអស់ចំនួន ១១ ដែលបានចុះបញ្ជីនៅឯគណៈកម្មាធិការជាតិរៀបចំការបោះឆ្នោត ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព