លោក ផាត់ ហឿន នៅខែត្រព្រៃវែង ស្រុកមេសាង បានប្រាប់វិទ្យុអាស៊ីសេរីថា លោកបានដាក់ពាក្យធ្វើការនៅក្នុងក្រុមអ្នករៀបចំការបោះឆ្នោតថ្នាក់ឃុំ តែលោកបានត្រូវគេទារប្រាក់ ។
លោក ផាត់ ហឿន ថ្លែងប្រាប់ដូច្នេះថា ៖ «ប៉ុន្តែ អ្នកដែលរើសគេកែឯកសារ គាត់ដាក់សេវាកម្មច្បាប់ ដល់នេះគាត់កែឯកសារមកបុក ខ្ញុំអត់មានលុយឲ្យគេ ។ គេទារលុយខ្ញុំដល់ ៥០[ដុល្លារ]ឯណោះ ហើយធ្វើតែ ២ខែកន្លះ អ៊ីចឹងខ្ញុំអត់មានលុយឲ្យគេ គេឲ្យលុយ ហើយអ្នកដែលដាក់បុកនោះ គេឲ្យលុយ ៥០ដែរ ហើយអ្នកមួយនោះ គេឲ្យ ១០០» ។
មន្ត្រីការងារថ្នាក់ខែត្រដែលចុះរើសអ្នករៀបចំការបោះឆ្នោតថ្នាក់ឃុំនៅស្រុកមេសាង ឈ្មោះ រស់ ឈុនលី បានបដិសេធថា លោកមិនបានទារលុយដូចការចោទប្រកាន់ទេ ៖ «ខ្ញុំអត់បានដឹងផង ខ្ញុំមិនដែលបានដឹងថា អ្នកយកលុយយកកាក់ពីអ្នកណាទេ ខ្ញុំអត់បានដឹងទេ ។ គេប្រាប់បង សួរគេទៅ គេឲ្យអ្នកណាស្អីអ្នកណាសួរគេទៅ តែខ្ញុំមិនបានដឹងផង» ។
ចំណែកនៅក្រុងភ្នំពេញវិញ បេក្ខជនឈ្មោះ ខាន់ សេរីវុធី បានប្រាប់វិទ្យុអាស៊ីសេរីថា លោកបានដាក់ពាក្យធ្វើជាអ្នករៀបចំការបោះឆ្នោតថ្នាក់ឃុំសង្កាត់ដែរ តែលោកមិនមានការទុកចិត្តសោះ ៖ «ដាក់ឈ្មោះធ្វើជាអនុប្រធានការិយាល័យ ។ ខ្ញុំដាក់តែម្នាក់ខ្ញុំ ឈ្មោះក៏ម្នាក់ខ្ញុំដែរ ហើយខ្ញុំធ្វើសម្ភាសន៍ក៏ម្នាក់ខ្ញុំដែរ តែខ្ញុំខ្លាចបក្សពួកនិយមស៊ីសំណូកសូកប៉ាន់ទៅ គេយកតំណែងយើងហ្នឹង» ។
ទាក់ទងជាមួយការចោទប្រកាន់និងការបារម្ភក្នុងការរើសអ្នករៀបចំការបោះឆ្នោតថ្នាក់ឃុំសង្កាត់នេះ លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) បានមានប្រសាសន៏ឲ្យដឹងថា គ.ជ.ប. បានដឹងនិងទទួលបានពាក្យតវ៉ាមួយចំនួនដែរ ហើយបានទប់ស្កាត់បញ្ហានេះ ។
លោក ទេព នីថា មានប្រសាសន៍ថា ៖ «ការងារនេះយើងបានទប់ស្កាត់ នៅពេលដែលជ្រើសរើសមកបេក្ខភាពមួយចំនួន ដែលយើងដឹងថា មានការពាក់ព័ន្ធទៅនឹងមេខ្យល់ណែនាំឲ្យមានការទារលុយគេ ហើយការទារលុយនេះមិនមែនទារលុយពីមន្រ្តីដែលចុះពីថ្នាក់ខេត្តចុះទៅជ្រើសរើសទេ មានមេខ្យល់ដោយឡែកមួយទៀត បង្កើតបញ្ហា ហើយខ្ញុំបានបញ្ចៀសបញ្ហានេះ ឲ្យគណៈកម្មការខេត្តរៀបចំការបោះឆ្នោត ។ ហើយចំពោះអ្នកប្រព្រឹត្តបទល្មើសនេះ ប្រសិនបើបងប្អូនប្រជាពលរដ្ឋណា បានឲ្យលុយគេហើយ មិនទុកចិត្តអាចប្ដឹងអ្នកនោះ ទៅស្ថាប័នមានសមត្ថកិច្ចក៏បាន ប្ដឹងមក គ.ជ.ប. ក៏បាន ឬក៏ប្ដឹងទៅ គណៈកម្មាធិការជាតិរៀបចំការបោះឆ្នោតក៏បាន ដើម្បីយើងដោះស្រាយតាមផ្លូវច្បាប់» ។
ការបោះឆ្នោតរើសតំណាងរាស្រ្តអាណត្តិថ្មី ត្រូវធ្វើឡើងនៅថ្ងៃទី២៧ កក្កដា ខាងមុខនេះ ហើយតាមលោក ខន កែវមនោ មន្រ្តី គ.ជ.ប. បានឲ្យដឹងថា នៅក្នុងការរៀបចំការបោះឆ្នោតថ្នាក់ឃុំសង្កាត់ខាងមុខនេះ ត្រូវការជ្រើសរើស អ្នករៀបចំការបោះឆ្នោតថ្នាក់ឃុំសង្កាត់ទូទាំងប្រទេសចំនួនប្រមាណ ៩.៧២៦នាក់ ៕