លោកបន្តថា មូលហេតុនាំឲ្យគណបក្ស សិទ្ធិមនុស្ស ស្នើសុំបែបនេះ ដោយសារតែមានពលរដ្ឋ នៅតាមបណ្ដាខេត្ត-ក្រុងមួយចំនួន កំពុងជួបគ្រោះទឹកជំនន់ជន់លិចមិនអាចទៅពិនិត្យ និងចុះឈ្មោះបោះឆ្នោតបាន។
លោក កឹម សុខា៖ «ឥឡូវនេះ ខ្ញុំបានទទួលព័ត៌មានពីខេត្តជាច្រើនមក បញ្ហាទឹកជំនន់ច្រើន ហើយប្រជាពលរដ្ឋអត់បានទៅចុះឈ្មោះបោះឆ្នោតមានចំនួនច្រើន ដោយសារបញ្ហាទឹកជំនន់ជន់លិច។ ខ្ញុំសូមអំពាវនាវឲ្យ គ.ជ.ប ពន្យារពេលបន្តទៀត ដើម្បីឲ្យប្រជាពលរដ្ឋអាចទៅចុះឈ្មោះបោះឆ្នោតបាន ពីព្រោះវាពាក់ព័ន្ធនឹងទឹកជំនន់ ហើយប្រជាពលរដ្ឋមិនអាចធ្វើដំណើរទៅចុះឈ្មោះបាន»។
សេចក្ដីអំពាវនាវនេះ ពុំទាន់មានការឆ្លើយតបពី គ.ជ.ប ថាយ៉ាងណានៅឡើយទេ នៅថ្ងៃពុធទី២៨ ខែកញ្ញា ឆ្នាំ២០១១។
គ.ជ.ប បានកំណត់រយៈពេលនៃការពិនិត្យបញ្ជីឈ្មោះ និងចុះឈ្មោះបោះឆ្នោតនេះ មានរយៈពេល ៤៥ ថ្ងៃ គឺចាប់ពីថ្ងៃទី១ ខែកញ្ញា ដល់ថ្ងៃទី១៥ ខែតុលា ឆ្នាំ២០១១ ហើយថា ការធ្វើបច្ចុប្បន្នភាពបញ្ជីឈ្មោះអ្នកបោះឆ្នោតឆ្នាំ២០១១ គឺទុកសម្រាប់ការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់នៅឆ្នាំ២០១២៕