ប្រធានការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញ លោក កែវ ធា ដែលបាននាំកម្លាំងចុះចាប់ជនសង្ស័យទាំងយប់នោះ មានប្រសាសន៍ប្រាប់វិទ្យុអាស៊ីសេរីនៅថ្ងៃទី៦ កញ្ញា ថា ប៉ូលិសបានចាប់ជនបរទេសឈ្មោះ ម៉ៃឃើល ជូលៀន លិច្ឆ (Michael Julian Leach) អាយុ ៥០ឆ្នាំ មកពីទីក្រុងឡុងដ៍ ប្រទេសអង់គ្លេស កាន់លិខិតឆ្លងដែនលេខ ១០៤៩១៤០ ក្នុងពេលដែលគាត់កំពុងរួមភេទជាមួយក្មេងស្រីខ្មែរ ២នាក់ដែលមិនទាន់គ្រប់អាយុ នៅក្នុងបន្ទប់ក្នុងហាងមួយ នៅក្នុងកៀនស្វាយ។
លោក កែវ ធា បានបញ្ជាក់ថា ៖ «ពេលដែលយើងចុះបង្ក្រាបជាក់ស្ដែង គឺឃើញគាត់កំពុងនៅក្នុងបន្ទប់ជាមួយកុមារី ២នាក់ ម្នាក់អាយុ ១៣ឆ្នាំ ម្នាក់ទៀតអាយុ ១១ឆ្នាំ។ អ៊ីចឹងសរុបឥឡូវនេះយើងរំដោះជនរងគ្រោះបាន ២នាក់ មួយអាយុ ១៣ឆ្នាំ មួយអាយុ ១១ឆ្នាំ និងសល់មនុស្សប៉ុន្មាននាក់ទៀត យើងនឹងរៀបចំសំណុំរឿងបញ្ជូនទៅតុលាការថ្ងៃស្អែក»។
ប៉ូលិសបានបញ្ជាក់ថា ស្ត្រីឈ្មោះ សេង អែប បានលក់កូន លក់ក្មួយ និងកូនចិញ្ចឹមរបស់ខ្លួន ៣នាក់ទៅឲ្យជនបរទេស ក៏ប៉ុន្តែនៅយប់ដែលប៉ូលិសបង្ក្រាបនោះ មានតែកូន និងក្មួយទេដែលមានវត្តមាននៅទីនោះ ចំណែកកូនចិញ្ចឹមម្នាក់ទៀតមិនបានមកទេ។
ចំពោះជនជាតិខ្មែរ ៣នាក់ទៀតដែលបានឃាត់ខ្លួននោះ មានឈ្មោះ ពេញ ប៉ាត់ អាយុ ៤៥ឆ្នាំ អ្នករត់រ៉ឺម៉កកង់បី, សេង អែប អាយុ ៣៥ឆ្នាំ ត្រូវជាម្ដាយបង្កើត និងម្ដាយមីងរបស់ក្មេងស្រីទាំង ២នាក់នោះ និងឈ្មោះ អែត អឿន អាយុ ៤០ឆ្នាំជាម្ចាស់ហាងនៅកៀនស្វាយ។ ការចាប់ខ្លួននេះធ្វើឡើងបន្ទាប់ពីប៉ូលិសសហការជាមួយអង្គការការពារអនីតិជន ឈ្មោះ អាក់ស្យុង ពួរ ឡេ ហ្សង់ហ្វង់ (Action Pour Les Enfants) បានតាមដានជនសង្ស័យជាច្រើនខែរួចមក។
តំណាងអង្គការអង្គការការពារអនីតិជនប្រចាំប្រទេសកម្ពុជា លោក សំលៀង សីលា បានបញ្ជាក់ថា សេង អែប បានលក់កូន លក់ក្មួយ និងកូនចិញ្ចឹមរបស់ខ្លួន ៣នាក់ ដោយមានចុះកិច្ចសន្យាផង ទៅឲ្យជនបរទេសរួមភេទក្នុងរយៈពេលពេញមួយសប្ដាហ៍។
លោក សំលៀង សីលា បញ្ជាក់បន្ថែមថា ៖ «រឿងនេះពាក់ព័ន្ធនឹងជនជាតិអង់គ្លេសម្នាក់ ដែលបានរៀបចំទិញកុមារីដែលជាអនីតិជន មានអាយុក្រោម ១៥ឆ្នាំ ចំនួន ៣នាក់ ដើម្បីមករួមភេទក្នុងរយៈពេលមួយសប្ដាហ៍ ក្នុងតម្លៃជាង ១.០០០ដុល្លារ។ ម្ដាយហ្នឹងគឺលក់កូនតែម្ដង ក្នុងកុងត្រារួមភេទហ្នឹងមានរយៈពេល ១សប្ដាហ៍។ អ៊ីចឹងបើតាមព័ត៌មាន លុយដែលគាត់ត្រូវរ៉ូវគ្នាហ្នឹង គឺរហូតដល់ទៅ១.០០០ ទៅ ១.៥០០ដុល្លារឯណោះ ក្នុងការរួមភេទ ក្នុងកុមារម្នាក់!»។
ទាំងមន្ត្រីប៉ូលិស និងមន្ត្រីអង្គការ អះអាងថា ជនសង្ស័យបរទេសឈ្មោះ ម៉ៃឃើល ជូលៀន លិច្ឆ ធ្លាប់មានរឿងក្តី ទាក់ទងនឹងការចោទប្រកាន់ទិញក្មេងស្រីមិនទាន់ពេញវ័យដូច្នេះ មករួមភេទម្ដងរួចមកហើយ កាលពីឆ្នាំ២០០៥កន្លងទៅ តែតុលាការបានរំលត់ពាក្យបណ្ដឹងនោះទៅវិញ ដោយសារមិនមានភស្តុតាង។
ក្រុមមន្ត្រីប៉ូលិសឲ្យដឹងដែរថា ប៉ូលិសកំពុងតាមចាប់ខ្លួនបុរសខ្មែរម្នាក់ទៀត ដែលជាអ្នកជួញដូរមនុស្សក្នុងករណីនេះដែរ និងតាមរកក្មេងស្រីម្នាក់ទៀតអាយុ ១៥ឆ្នាំ ដែលម្ដាយបានលក់ទៅបរទេសរូបនេះរួមភេទ៕