មន្រ្តីបរិស្ថានខេត្តកំពង់ធំរងការចោទថាបានជំរិតទារប្រាក់ពីពលរដ្ឋ
ដោយ មណ្ឌលកែវ
2009-10-02
ប្រជាពលរដ្ឋនៅឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ប្រមាណ២០០គ្រួសារ មានគម្រោងនាំគ្នាផ្តិតមេដៃប្តឹងមន្ត្រីបរិស្ថានដែលកំពុងឈរជើងនៅឃុំផាត់សណ្តាយ ដោយចោទប្រកាន់ថា បានជំរិតទារប្រាក់ពីពួកគាត់ ជាថ្នូរនឹងការអនុញ្ញាតឲ្យធ្វើការនេសាទត្រីជាលក្ខណៈគ្រួសារ។
ប្រជាពលរដ្ឋឈ្មោះ ព្រហ្ម ច័ន្ទ មានប្រសាសន៍ប្រាប់អ្នកយកព៌ត៌មានវិទ្យុអាស៊ីសេរី ដែលបានចុះផ្ទាល់ដល់ឃុំផាត់សណ្តាយ កាលពីថ្ងៃទី២៩ កញ្ញា ថា ឃុំផាត់សណ្តាយ គឺជាឃុំបណ្តែតទឹក ជីវភាពប្រជាពលរដ្ឋក្នុងឃុំពឹងផ្អែកទាំងស្រុងលើរបរនេសាទត្រី។ កន្លងទៅរដ្ឋបានផ្តល់ដែននេសាទសម្រាប់ឲ្យអ្នកស្រុករកត្រីដើម្បីដោះស្រាយជីវភាព តែឥឡូវជំនាញខាងបរិស្ថានបានធ្វើការហាមឃាត់មិនឲ្យអ្នកស្រុករកត្រីទេ ហើយបើចង់រកត្រូវតែបង់ប្រាក់ដល់មន្ត្រីប្រចាំការនៅក្នុងឃុំ បើមិនដូច្នោះទេ នឹងត្រូវគេចាប់ដកយកឧបករណ៍នេសាទយកទៅបំផ្លាញចោល ។
លោក ព្រហ្ម ច័ន្ទ មានប្រសាសន៍ដូច្នេះ ៖ «ជំនាញដែលពិបាកជាងគេ ជំនាញបរិស្ថាន។ ពីមុនមកទឹកដីហ្នឹងរាជរដ្ឋាភិបាលកាត់ពីឡូត៍មកឲ្យរាស្រ្ដ ដល់ឥឡូវនេះលោកបរិស្ថានគាត់យកធ្វើកន្លែងអភិរក្ស ធ្វើតំបន់ស្នូលអស់ អ៊ីចឹងប្រជារាស្រ្ដចូលរកអត់បាន កាលណាចូលរកទាល់តែបង់លុយច្រើន។ រាប់ប្លុកយកលុយតែម្ដង ប្លុកតូចៗដូចពួកខ្ញុំ ១ប្លុក៨ម៉ឺនរៀល ហើយដាក់មួយចំណុចអ៊ីចឹងទៅ រើឡើងទៅ១០០ម៉ែត្រទៀត ទារលុយទៀត អ៊ីចឹងពិបាករក ពួកបរិស្ថានគាបសង្កត់។ សូមសំណូមពរឲ្យរាជរដ្ឋាភិបាលកាត់ទឹកដីដែលកាត់ឲ្យរាស្រ្ដហ្នឹងយកមកវិញ ដើម្បីដាក់ចូលសហគមន៍នេសាទវិញ បើនៅតែឲ្យបរិស្ថានគ្រប់គ្រងរកអីក៏អត់កើតដែរ»។
ប្រជាពលរដ្ឋឈ្មោះ សៀន ហួរ បន្ថែម ៖ «ខ្ញុំសំណូមពរឲ្យទៅថ្នាក់លើ ហើយរាជរដ្ឋាភិបាលជួយបន្ធូរបន្ថយឲ្យប្រជារាស្រ្ដបានរស់ផង ព្រោះអីប្រជារាស្រ្ដនៅដែនទន្លេសាបហ្នឹង របររកស៊ីតែនឹងត្រីមួយមុខ អត់មានស្រែភ្លឺអីទេ»។
មិនអាចទាក់ទងសុំការបំភ្លឺពីលោក ហេង ឃុនណា ហៅ ប៉ោង មន្ត្រីបរិស្ថានប្រចាំការនៅឃុំផាត់សណ្តាយបានទេនៅល្ងាចថ្ងៃទី០១ ខែតុលានេះ។
ចំណែកលោក ហេង ហួត ប្រធានមន្ទីរបរិស្ថានខេត្តកំពង់ធំ មានប្រសាសន៍ថា បន្ទាប់ពីទទួលបានព៌ត៌មាននេះ លោកនឹងចុះទៅស្រាវជ្រាវបញ្ហានេះបន្ទាប់មកលោកនឹងមានវិធានការបង្ក្រាប ប្រសិនបើរកឃើញថាជាការពិត។
លោក ហេង ហួត មានប្រសាសន៍ដូច្នេះ ៖ «ខ្ញុំក្ដាប់អត់បាន ខ្ញុំជាប់ការងារប្រជាពលរដ្ឋនៅលើលិចទឹកលិចអីហ្នឹងជាប់មួយខែហើយ អត់ទាន់បានចុះទៅត្រួតពិនិត្យការងារហ្នឹង ចាំមើលខ្ញុំតាមដានត្រួតពិនិត្យការងារហ្នឹង ខ្ញុំសង្កេតមើលហើយខ្ញុំដោះស្រាយ»។
អភិបាលស្រុកកំពង់ស្វាយ លោក អ៊ឹម ថន មានប្រសាសន៍ថា លោកពុំទាន់ទទួលបានព័ត៌មាននេះទេ ៖ «ខ្ញុំក្ដាប់អត់ទាន់បានផងពាក់ព័ន្ធនឹងរឿងហ្នឹង ខ្ញុំក្ដាប់អត់ទាន់បាន ចាំមើលខ្ញុំសួរទៅមេឃុំមើល៍ ចាំខ្ញុំស្រាវជ្រាវហើយសិន មូលហេតុអី»។
មេឃុំផាត់សណ្តាយ លោក ហេង មនោ មានប្រសាសន៍ថា លោកក៏ទទួលបានរបាយការណ៍ដូចគ្នានេះពីប្រជាពលរដ្ឋដែរ ហើយលោកកំពុងស្វែងរកការសម្របសម្រួលមួយជាមួយផ្នែកជំនាញនេះ ដើម្បីដោះស្រាយជូនប្រជាពលរដ្ឋមួយជំហានសិន មុននឹងធ្វើរបាយការណ៍ជូនលោកអភិបាលខេត្តតាមរយៈលោកអភិបាលស្រុកកំពង់ស្វាយ៕
អត្ថបទដែលទាក់ទង
នាយករដ្ឋមន្ត្រីសម្រេចយកសម័យប្រជុំថ្ងៃ១១ ធ្នូ ដើម្បីឆ្លងសេចក្ដីព្រាងច្បាប់អំពើពុករលួយ
នគរបាលអន្តោប្រវេសន៍នៅប៉ោយប៉ែតរងការចោទថាបន្តជំរិតប្រាក់ពីកម្មករ
ពលរដ្ឋនៅព្រៃវែងត្អូញពីបញ្ហាសមត្ថកិច្ចស្ទាក់ទារប្រាក់តាមផ្លូវ
អង្គការអន្តរជាតិ៖ អំពើពុករលួយនៅកម្ពុជាប្រសើរជាងឆ្នាំមុន
ពលរដ្ឋនៅកំពង់ធំត្អូញពីបញ្ហាការទារប្រាក់ក្នុងការធ្វើប័ណ្ណកម្មសិទ្ធិដី
ភាពយឺតយ៉ាវក្នុងការធ្វើលិខិតរៀបការរវាងខ្មែរនិងជនបរទេសរងការរិះគន់
អាជ្ញាធររងការចោទថាជំរិតទារប្រាក់អ្នកភូមិពេលធ្វើអត្តសញ្ញាណប័ណ្ណ
មជ្ឈមណ្ឌលសិទ្ធិមនុស្សទាមទារឲ្យស៊ើបអង្កេតមន្ត្រីតុលាការខែត្ររតនគិរីជាថ្មី
តំណាងរាស្ត្រស.រ.អា.ថ្កោលទោសការរីករាលដាលនៃអំពើពុករលួយនៅកម្ពុជា
