ស្រ្តីឈ្មោះ យន់ ឆេងនី នៅភូមិត្រពាំងថ្លឹង សង្កាត់ចោមចៅ ខ័ណ្ឌពោធិ៍សែនជ័យ រាជធានីភ្នំពេញ មានប្រសាសន៍ថា ការយឺតយាវក្នុងការប្រមូលសំរាមរបស់ក្រុមហ៊ុនស៊ិនទ្រីនេះ បានធ្វើឲ្យខូចសុខភាពប្រជាពលរដ្ឋ និងបរិស្ថានក្នុងភូមិ ជាពិសេសនៅក្នុងទីក្រុងទាំងមូល។
លោកស្រី យន់ ឆេងនី៖ «តាំងពីចូលឆ្នាំហើយយកមិនទាន់អស់ទៀត ឃើញទេវាអ៊ីចឹង! រាល់ដង ៣ ៤ថ្ងៃយកម្តង រាល់ថ្ងៃអស់លុយហើយដេកហិតសំរាមទៀត»។
ស្រ្តីម្នាក់ទៀតឈ្មោះ មុត សារ៉ាន់ បានរអូរទាំពីបញ្ហាសំរាមដែលទុកឲ្យស្អុយរលួយចោលក្នុងទីប្រជុំជនក្នុងទីក្រុងនេះដែរថា រយៈផុតចូលឆ្នាំ ៣ថ្ងៃមកហើយ ក៏នៅតែមិនទាន់មានអ្នកមកប្រមូលសំរាមចេញពីទីក្រុងទៀត។
លោកស្រីបន្តថា បញ្ហានេះបានជះឥទ្ធិអាក្រក់ដល់ការរស់នៅរបស់ប្រជាពលរដ្ឋយ៉ាងធ្ងន់ធ្ងរ៖ «អត់មកយកតាំងពីមុនចូលឆ្នាំរហូតដល់ចូលឆ្នាំហើយ ជិត ១០ថ្ងៃហើយ រួចស្អុយនៅហ្នឹង រលួយនៅហ្នឹងទៅ។ ធ្វើអ៊ីចឹងទៅវាខូចសុខភាពយើងដែលដកដង្ហើមរាល់ថ្ងៃនេះ នៅមុខផ្ទះនេះស្អុយរលួយអ៊ីចឹងធ្វើម៉េចទៅ ដឹងកាលបានគេមកយក»។
ឆ្លើយតបនឹងបញ្ហានេះ អនុប្រធានក្រុមហ៊ុន ស៊ីនទ្រី [CINTRI (Camboda) LTD.] ដែលជាក្រុមហ៊ុនមួយទទួលបន្ទុកប្រមូលសំរាមក្នុងទីក្រុងភ្នំពេញ លោក សេង ចំរើន មានប្រសាសន៍នៅថ្ងៃពុធ ទី១៨ ខែមេសា ថា សំរាមដែលក្រុមហ៊ុនលោកប្រមូលមិនទាន់នោះ មានចំនួនប្រមាណជាង ៣ពាន់តោន។
លោកទទួលស្គាល់ថា ការកកស្ទះសំរាមប្រមូលមិនទាន់នេះ គឺជៀសមិនផុតពីមានផលប៉ះពាល់ឡើយ៖ «បើនិយាយពីផលប៉ះពាល់គឺវាប៉ះពាល់ខ្លាំង។ ធម្មតានៅក្នុងទីក្រុងទាំងមូលមានប្រជាជនប្រមាណមួយលានកន្លះ អ៊ីចឹងច្រើនហើយ បើយើងគរសំរាមដូច្នេះវាមានក្លិន ហើយសំរាមយើងគរទុកចោលយូរថ្ងៃវាមិនល្អទេ»។
លោកពន្យល់ថា បញ្ហានេះដោយសារកម្មកររបស់ក្រុមហ៊ុនត្រូវឈប់សម្រាកនៅថ្ងៃចូលឆ្នាំ។ ប៉ុន្តែទោះយ៉ាងនេះក្តី ក្រុមហ៊ុនលោកនៅតែមានកម្មវិធីប្រមូលសំរាមដែរនៅក្នុងថ្ងៃចូលឆ្នាំនោះ ដោយបានប្រមូលឆ្លាស់កន្លែង ឬឆ្លាស់ថ្ងៃគ្នា ប៉ុន្តែដោយសារសំរាមច្រើនពេកទើបប្រមូលមិនទាន់។
លោក សេង ចំរើន៖ «គឺថា យើងមិនដេកដួលទៅលើកម្លាំងពលកម្មមាន ឬក៏អត់។ ថ្ងៃចូលឆ្នាំយើងអត់ធ្វើមិនអ៊ីចឹងទេ យើងព្យាយាមធ្វើលុះត្រាតែអត់មានកម្មករម្នាក់តែម្តងបានយើងធ្វើលែងកើត យើងអាចច្នៃពីរបៀបមួយទៅរបៀបមួយ ឬយើងអាចជួលកម្លាំងកម្មករផ្សេងថែម ឬយើងច្នៃកម្លាំងវិលជុំវិញហ្នឹងបាន គឺយើងព្យាយាមធ្វើជូនទាំងអស់ យើងអត់ចង់ទុកសំរាមឲ្យនៅអ៊ីចឹងទេបាទ!»។
លោកបានឲ្យដឹងដែរថា ក្រុមហ៊ុនត្រូវចំណាយពេលយ៉ាងហោចណាស់ពី ៣ ទៅ ៤ថ្ងៃទៀត ទើបអាចប្រមូលសំរាមដែលនៅសល់ទាំងនោះអស់ ហើយបរិយាកាសក្នុងទីក្រុងនឹងវិលទៅរកសភាពធម្មតាឡើងវិញក្នុងអំឡុងពេល ៣ ទៅ ៤ថ្ងៃខាងមុខទៀតនេះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។