អាជ្ញាធរខេត្តរតនគិរីបដិសេធសំណើសុំហែក្បួនរបស់ក្រុមជនជាតិ

ដោយ រដ្ឋា វិសាល

2008-05-16

មន្ត្រីឃ្លាំមើលសិទ្ធិមនុស្សបានឲ្យដឹងថា អាជ្ញាធរខេត្តរតនគិរីបានបដិសេធសំណើសុំហែក្បួនទាមទារការអនុវត្តច្បាប់និងបទបញ្ជានាយករដ្ឋមន្ត្រី ពីសំណាក់ជនជាតិដើមភាគតិច ទាក់ទិននឹងវិធានការទប់ស្កាត់លុបបំបាត់ការឈូសឆាយហ៊ុមព័ទ្ធព្រៃឈើដើម្បីយកដីជាកម្មសិទ្ធិ ប៉ុន្តែបានយល់ព្រមឲ្យមានការជួបជុំគ្នានៅនឹងកន្លែងដើម្បីស្វែងរកដំណោះស្រាយបញ្ហាដែលកំពុងកើតមាននៅក្នុងមូលដ្ឋាន ។

មន្រ្តីសម្របសម្រួលសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ បញ្ជាក់ថាសេចក្តីសម្រេចនេះធ្វើឡើងកាលពីថ្ងៃ១៦ ឧសភា ឆ្នាំ២០០៨ បន្ទាប់ពីមានការប្រជុំពិសេសមួយនៃគណៈបញ្ជាការកងឯកភាពខេត្ត ។

លោក ប៉ែន ប៊ុណ្ណារ៍ បានមានប្រសាសន៍ថា ៖ «អភិបាលខេត្តក៏លោកបង្ហាញនូវការឈឺចាប់ក្នុងការបាត់បង់ព្រៃឈើដីធ្លីហ្នឹងដែរ ។ ចំពោះការដង្ហែរក្បួនលោកមិនអនុញ្ញាតទេ ដោយលោកឲ្យសុំទៅក្រសួងមហាផ្ទៃ ។ សមាគមអាដហុក សុំការអនុញ្ញាតពីអាជ្ញាធរសុំមកជួបជុំធំគ្នាមួយនៅសមាគមអាដហុក នៅថ្ងៃទី២៣ ដោយមិនមានការដង្ហែក្បួន» ។

បើតាមតំណាងប្រជាសហគមន៍ជនជាតិដើមភាគតិចនៅខេត្តរតនគិរីចំនួន១៥ក្រុម ធ្លាប់បានអះអាងប្រាប់វិទ្យុអាស៊ីសេរីថា ពួកគេមានឆន្ទៈជួបជុំគ្នាប្រមាណ៣០០នាក់ ហែក្បួននិងរៀបចំវេទិកាអញ្ជើញមន្ត្រីអាជ្ញាធរមូលដ្ឋាន មន្រ្តីជំនាញអង្គការក្រៅរដ្ឋាភិបាលក្នុងខេត្ត ជួបប្រជុំស្វែងរកដំណោះស្រាយបញ្ហាបាត់បង់ដីធ្លីតំបន់ព្រៃឈើដែលប្រជាសហគមន៏កំពុងអភិរក្ស ហើយបញ្ហានេះអាជ្ញាធរមូលដ្ឋានធ្វើព្រងើយកន្តើយមិនដោះស្រាយ បើទោះបីអ្នកភូមិសុំកិច្ចអន្តរាគមន៏យ៉ាងណាក្តី ។ ជាមួយនោះអាជ្ញាធរខេត្តបានធ្វើការបង្រ្កាបកាលពីខែធ្នូ ឆ្នាំ២០០៧ ដោយប្រើប្រាស់កងកម្លាំងរារាំងនិងរថយន្តបាញ់ទឹកបន្ទាប់ពីអ្នកភូមិបាននាំគ្នាហែក្បួនតវ៉ា ។

ប្រធានមន្ទីរព័ត៌មានខេត្តរតនគិរី លោក អឿង សារិ ទទួលស្គាល់ថាពិតជាមានកិច្ចប្រជុំបែបនេះប្រាកដមែន ៖ «អត់មានជំទាស់អីទេធ្វើសិក្ខាសាលា តែគាត់ហាមមិនឲ្យយើងហែក្បួន តែក្រោយមកលោក ប៊ុណ្ណារ៍ គាត់សុំឲ្យការហែក្បួនហ្នឹងលើកទៅប្រជុំនៅក្នុងទីស្នាក់ការអាដហុក បានឯកឧត្ដមចុងក្រោយគាត់ក៏បានឯកភាព» ។

ចំណែកអភិបាលខេត្តរតនគិរី លោក មួង ប៉យ ដែលដឹកនាំកិច្ចប្រជុំមានប្រសាសន៍បញ្ជាក់ដែរថា កិច្ចប្រជុំនោះមិនទាន់ចាត់ទុកជាលទ្ធផលអ្វីនៅឡើយនោះទេ ហើយលោកបដិសេធមិនធ្វើអត្ថាធិប្បាយពិស្តារពីបញ្ហានោះ ៖ «ប្រជុំព្រឹកមិញមិនទាន់បានសម្រេចទេ» ។

ទោះជាយ៉ាងនេះក្ដីប្រធានសមាគមខ្មែរលើអ្នកស្រី ដាំ ចន្ធី មានប្រសាសន៏ថាជនជាតិភាគតិចគឺជាអ្នករងគ្រោះ ៖ «សព្វថ្ងៃនេះខ្ញុំឃើញថាបញ្ហាវាកើនឡើងខ្ពស់ហើយ អាជ្ញាធរដែនដី មានសិទ្ធិគ្រប់គ្រងទៅលើធនធានធម្មជាតិ ទៅលើដីធ្លី ទៅលើប្រជាជន អាជ្ញាធរក៏មានតួនាទីមួយសម្រាប់ដោះស្រាយ អង្គការក្រៅរដ្ឋាភិបាល ជួយទៅលើអាជ្ញាធរដែលខ្វះចន្លោះហ្នឹង ។ ខ្ញុំគិតថាល្អបើសិនណាអាជ្ញាធរគាំទ្រពិតប្រាកដ» ។

មន្រ្តីសមាគមអាដហុក ខេត្តរតនគិរី ឲ្យដឹងដែរថាតាមការគ្រោងទុកអង្គការនេះនឹងបំពេញតួនាទីជាអ្នកសម្របសម្រួលតាមសំណូមពរតំណាងសហគមន៏ចំនួន១៥ក្រុមក្នុងខេត្ត ដាក់ពាក្យស្នើសុំជាថ្មីទៅអាជ្ញាធរខេត្ត ដោយមានប្រជាសហគមន៏ជនជាតិដើមភាគតិចជិត២០០០នាក់ផ្តិតមេដៃគាំទ្រ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព