បុរសឈ្មោះ សំ នី តំណាងឲ្យប្រជាពលរដ្ឋដែលមកធ្វើការតវ៉ាមានប្រសាសន៍ថា ពួកគាត់សម្រេចចិត្តមកតវ៉ានៅមុខផ្ទះលោកនាយករដ្ឋមន្ត្រី ព្រោះគាត់យល់ឃើញថាគឺមានតែលោកនាយករដ្ឋមន្ត្រី ហ៊ុន សែន ទេ ដែលអាចជួយរកយុត្តិធម៌ឲ្យពួកគាត់បាន។
លោក សំ នី បានឲ្យដឹងថា ៖ «គោលដៅមានតែមួយគត់ ថ្ងៃនេះពួកខ្ញុំមកដល់ផ្ទះសម្ដេចតែម្ដងដើម្បីរកយុត្តិធម៌ឲ្យឃើញ។ ខ្ញុំជឿជាក់ថាយុត្តិធម៌នេះត្រូវតែមានមកលើពួកយើងខ្ញុំទាំងអស់គ្នានៅក្នុងតំបន់ដីក្រហមដោយសារសម្ដេចជួយជំរុញ»។
តំណាងប្រជាពលរដ្ឋម្នាក់ទៀតគឺអ្នកស្រី ចាន់ ផូ បន្ថែម ៖ «វាបាញ់ដូចជាផ្សែង ដូចជាកូនខ្ញុំ ចៅខ្ញុំ ឥឡូវជាំមុខអស់ហើយ ក្អកធ្លាក់ចេញឈាមទៀត។ ខ្ញុំសូមឲ្យសម្ដេចនាយករដ្ឋមន្ត្រីតេជោជួយខ្ញុំផង ខ្ញុំគ្មានពឹងអ្នកណាទេ ពឹងតែសម្ដេចមួយទេ»។
គួរកត់សម្គាល់ថា នៅវេលាម៉ោង២:៤៥នាទី មន្ត្រីនៃខុទ្ទកាល័យលោកនាយករដ្ឋមន្ត្រីបានចេញមកអញ្ជើញតំណាងប្រជាពលរដ្ឋ២នាក់ឲ្យចូលខុទ្ទកាល័យនិងទទួលញត្តិតវ៉ារបស់ប្រជាពលរដ្ឋ ដោយសន្យាថានឹងបញ្ជូនញត្តិនេះទៅដល់ដៃលោកនាយករដ្ឋមន្ត្រីឲ្យបានឆាប់បំផុត។
ខ្លឹមសារនៃញត្តិតវ៉ាគឺសុំឲ្យលោកនាយករដ្ឋមន្ត្រីជួយឲ្យក្រុមហ៊ុន 7NG ផ្តល់សំណងជាប្រាក់ចំនួន២ម៉ឺនដុល្លារក្នុងមួយគ្រួសារ។
លោក ហន ស តំណាងប្រជាពលរដ្ឋម្នាក់ដែលបានចូលទៅប្រគល់ញត្តិមានប្រសាសន៍ប្រាប់អ្នកយកព័ត៌មានវិទ្យុអាស៊ីសេរីពីលទ្ធផលនៃជំនួបនោះថា ៖ «ខាងអ្នកទទួលឯកសាររបស់សម្ដេចលោកបានទទួលយកហើយមិញនេះ ហើយគាត់ថាយ៉ាងម៉េចៗពេលដែលបានខ្លឹមសារសម្ដេចអន្តរាគមន៍យ៉ាងម៉េចៗគាត់នឹងជូនព័ត៌មានដល់យើងខ្ញុំ។ គាត់ប្រាប់មកតំណាងខ្ញុំទាំងពីរនាក់ថានឹងរង់ចាំហើយគាត់នឹងជួយអន្តរាគមន៍ឲ្យបានឆាប់ៗ»។
ប្រធានក្រុមហ៊ុន 7NG លោកស្រី សុធា និងអភិបាលរងក្រុងភ្នំពេញ លោក ម៉ាន់ ឈឿន មានប្រសាសន៍ថា គោលការណ៍របស់ក្រុមហ៊ុនគឺពុំផ្តល់សំណងជាប្រាក់ទៀតទេតែផ្តល់សំណងជាដីនិងផ្ទះនៅឯបូរីសន្តិភាព២ក្នុងខណ្ឌដង្កោ ហើយឱសានវាទនៃការផ្តល់សំណងគឺដំណាច់ខែមករានេះ។
លោក ម៉ាន់ ឈឿន មានប្រសាសន៍ថា ៖ «នេះជាគោលការណ៍ដែលអត់មានងាករេទៅណាទេ ដូចប្អូនសួរមិញថា ចុះ២ម៉ឺន? ២ម៉ឺនហ្នឹងគឺនៅក្នុងដំណាក់កាលដែលយើងជជែកគ្នារកផ្លូវកណ្ដាលហ្នុងឯង ក៏ប៉ុន្តែរកវាមិនចេញ រកទៅវាអត់ឃើញ»។
គេនៅពុំទាន់ដឹងថា តើលោកនាយករដ្ឋមន្ត្រីសម្រេចយ៉ាងណាចំពោះការទាមទាររបស់ប្រជាពលរដ្ឋនោះឡើយ។
យ៉ាងណាក៏ដោយប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានចាត់ទុកការផ្តល់សំណងដោយបង្ខំគឺជាការរំលោភច្បាប់និងរំលោភសិទ្ធិមនុស្សយ៉ាងធ្ងន់ធ្ងរ៕