ក្រោយពីថ្លែងសាទុក្ខស្ដីពីប្រវត្តិជូរចត់នៃការប្រើអំពើហិង្សាពីសំណាក់កម្លាំងប្រដាប់អាវុធរបស់អាជ្ញាធរក្រុង និងសន្តិសុខក្រុមហ៊ុនមកលើប្រជាពលរដ្ឋនោះ ពួកគាត់ប្រមាណ ៣០០នាក់ បានរួមគ្នាកាន់បដាដើរជាក្បួន និងយកញត្តិរបស់សហគមន៍ចំនួនបីទៅជូនរដ្ឋសភាឲ្យជួយអន្តរាគមន៍ ដើម្បីបញ្ឈប់សកម្មភាពបណ្ដេញពលរដ្ឋចេញពីទីក្រុងបន្តទៀត។
គណៈកម្មការសិទ្ធិមនុស្សទទួលពាក្យបណ្ដឹងអង្កេត និងទំនាក់ទំនងរដ្ឋសភា ព្រឹទ្ធសភា បានទទួលញត្តិចំនួនបីពីអតីតសហគមន៍ក្រីក្រក្នុងទីក្រុងភ្នំពេញ មានដូចជាដីក្រហម បឹងកក់ និងបុរីកីឡា ហើយបានបញ្ជូនទៅសាលាក្រុងភ្នំពេញ ដោះស្រាយរឿងនេះ។
ប្រជាសហគមន៍ដែលអាជ្ញាធរបណ្ដេញចេញ បានចំណាយពេលជាច្រើនម៉ោងនៅថ្ងៃអង្គារ ទី២៤ មករា ទើបមានការទទួលញត្តិពីពួកគាត់ បន្ទាប់ពីប្រជាសហគមន៍ប្រមាណជាង ៣០០នាក់ ភាគច្រើនជាស្ត្រី បានព្រមានដោះសម្លៀកបំពាក់ចេញពីខ្លួននៅមុខរដ្ឋសភានោះ។
ញត្តិប្រជាពលរដ្ឋសហគមន៍បុរីកីឡា បានទាមទារចំនួន ៣ចំណុចជាសំខាន់។ ទីមួយសុំឲ្យក្រុមហ៊ុនផានអ៊ីម៉ិច សង់អាគារស្នាក់នៅចំនួន ២ថែមទៀត ដើម្បីគោរពទៅតាមពាក្យសន្យារបស់ក្រុមហ៊ុន។ ទី២ សូមឲ្យដោះលែងប្រជាពលរដ្ឋ ៧នាក់ ដែលអាជ្ញាធរចាប់ឃុំខ្លួនក្នុងរឿងជម្លោះដីធ្លី និងទី៣ សុំឲ្យក្រុមហ៊ុនសងការខូចខាតទ្រព្យសម្បត្តិ ផ្ទះសម្បែង ដែលក្រុមហ៊ុនផានអ៊ីម៉ិច (Phan Imex) ឈូសបំផ្លាញកាលពីថ្ងៃ៣ មករា កន្លងទៅ។
សម្រាប់សហគមន៍ផ្សេងទៀត បានទាមទារឲ្យតំណាងរាស្ត្រអន្តរាគមន៍ទៅរដ្ឋាភិបាលឲ្យបញ្ឈប់ជាបន្ទាន់ចំពោះការបណ្ដេញប្រជាពលរដ្ឋចេញពីទីក្រុងឲ្យទៅនៅតំបន់ដាច់ស្រយាល ដែលពួកគាត់ និងអ្នកដទៃទៀតមិនអាចរស់នៅបាន។
មន្ត្រីសន្តិសុខប្រចាំរដ្ឋសភាបានឲ្យដឹងថា នៅថ្ងៃអង្គារ ទី២៥ ពុំមានអ្នកតំណាងរាស្ត្រធ្វើការទេ ប៉ុន្តែមានមន្ត្រីរដ្ឋបាលផ្នែកនីមួយៗប្រចាំការទទួលញត្តិពីប្រជាពលរដ្ឋ។
នៅម៉ោងប្រមាណជាង ១២ថ្ងៃត្រង់ ថ្ងៃដដែលនោះ ប្រជាពលរដ្ឋបានទទួលលិខិតមួយច្បាប់ពីរដ្ឋសភា ឆ្លើយតបនឹងសំណើរបស់ប្រជាពលរដ្ឋបុរីកីឡា និងបញ្ជូនសំណើនោះទៅអភិបាលក្រុងភ្នំពេញ លោក កែប ជុតិមា ដើម្បីពិនិត្យ និងជាមូលដ្ឋានក្នុងការឆ្លើយតបទៅប្រជាពលរដ្ឋវិញ។ លិខិតនោះបានចុះហត្ថលេខាដោយលោក ហេង សំរិន ប្រធានរដ្ឋសភា និងលោក វ៉ាន់ សេងលី ប្រធានស្ដីទីគណៈកម្មការសិទ្ធិមនុស្សទទួលពាក្យបណ្ដឹងរបស់រដ្ឋសភា។
លោក យ៉េង វីរៈ ប្រធានមជ្ឈមណ្ឌលអប់រំច្បាប់សម្រាប់សហគមន៍។ លោកបានតាមឃ្លាំមើលការតវ៉ាទាមទាររកយុត្តិធម៌ជុំវិញបញ្ហាពួកគាត់ត្រូវគេបណ្ដេញចេញពីផ្ទះ និងឈូសបំផ្លាញផ្ទះពួកគាត់ចោលនោះ បានមានប្រសាសន៍ថា ពលរដ្ឋបានប្រើប្រាស់សិទ្ធិសេរីភាពរបស់គាត់បានត្រឹមត្រូវ និងស្របច្បាប់។ ដូច្នេះលោកក៏ចង់ឃើញរដ្ឋាភិបាល និងរដ្ឋសភា ដែលជាតំណាងប្រជាពលរដ្ឋទទួលបានសន្លឹកឆ្នោតពីប្រជាពលរដ្ឋ ត្រូវធ្វើការបម្រើប្រជាពលរដ្ឋតាមតួនាទីភារកិច្ចឲ្យបានពេញលេញ ជាពិសេសនៅពេលដែលប្រជាពលរដ្ឋកំពុងមានទុក្ខ។
លោក សៀ ភារម្យ នាយកអង្គការសិទ្ធិលំនៅឋាន បានបង្ហាញរបាយការណ៍អង្កេតមួយស្ដីពីផលប៉ះពាល់ទៅលើសេដ្ឋកិច្ច និងការងារដោយសារការបណ្ដេញចេញកន្លងមក។
លោកបញ្ជាក់ថា នៅពេលមិនទាន់មានការបណ្ដេញចេញ សហគមន៍របស់ពួកគាត់នីមួយៗអត់ការងារធ្វើចំនួនជាង ១៨% ប៉ុន្តែក្រោយពីមានការបណ្ដេញចេញ កំណើនអត់ការងារធ្វើបានកើនឡើងជាង ៣០%។
អ្នកភូមិដែលត្រូវគេបណ្ដេញចេញមានសង្ឃឹមតិចតួចណាស់ ចំពោះកិច្ចអន្តរាគមន៍របស់រដ្ឋសភាទៅអាជ្ញាធរក្រុងនោះ ប៉ុន្តែយ៉ាងហោចណាស់ក៏អាចជាសារមួយសម្រាប់ពួកគាត់សម្រេចចិត្តនៅពេលបោះឆ្នោតនាពេលខាងមុខទៀត។
របាយការណ៍បណ្ដោះអាសន្នពីអង្គការសិទ្ធិលំនៅឋាន បានឲ្យដឹងថា នៅឆ្នាំ២០១០ និងឆ្នាំ២០១១ កន្លងទៅ មានប្រជាពលរដ្ឋប្រមាណជាង ៣.០០០គ្រួសារ ត្រូវគេជម្លៀសចេញពីទីក្រុងឲ្យទៅនៅជាយក្រុង ហើយបច្ចុប្បន្នពួកគាត់កំពុងប្រឈមមុខយ៉ាងធ្ងន់ធ្ងរចំពោះបញ្ហាជម្រករស់នៅ និងមានជីវភាពដុនដាបខ្លាំង៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។