ព្រះមហាវីរក្សត្រសុំឲ្យរាស្ត្រថៃនិងខ្មែររក្សាមិត្តភាពនឹងគ្នា
ដោយ ផាន សូផាត
2008-07-09
ព្រះមហាវីរក្សត្រ ព្រះបាទ នរោត្តម សីហនុ បានមានព្រះរាជឱង្ការនៅថ្ងៃនេះដោយសុំឲ្យប្រជារាស្រ្តថៃនិងខ្មែររក្សាមិត្តភាពប្រទេសជិតខាង ដោយកុំយកបញ្ហាប្រាសាទព្រះវិហារធ្វើជាជម្លោះរវាងប្រជាជាតិទាំងពីរ ។
សម្តេច នរោត្តម សីហនុ អតីតព្រះមហាក្សត្រនៃព្រះរាជាណាចក្រកម្ពុជា។
ព្រះរាជសាររបស់ព្រះមហាវីរក្សត្របានធ្វើឡើងបន្ទាប់ពីប្រាសាទព្រះវិហារខ្មែរត្រូវបានគណៈកម្មាធិការបេតិកភណ្ឌពិភពលោករបស់អង្គការយូណេស្កូ ដាក់បញ្ចូលទៅក្នុងបញ្ជីបេតិកភណ្ឌពិភពលោកក្នុងកិច្ចប្រជុំរបស់ខ្លួននាទីក្រុងកេបិច ប្រទេសកាណាដា ដែលត្រូវនឹងព្រឹកព្រលឹមថ្ងៃទី៨ ខែកក្កដា ឆ្នាំ២០០៨ ម៉ោងនៅប្រទេសកម្ពុជាកន្លងទៅនេះ ។
ការដាក់បញ្ចូលប្រាសាទខ្មែរដែលមានទីតាំងនៅក្បែរព្រំដែនប្រទេសថៃជាបេតិកភណ្ឌពិភពលោកនោះ ក៏ស្ថិតក្នុងបញ្ហាចម្រូងចម្រាសជាច្រើនជាមួយនឹងប្រទេសជិតខាងនេះដែរ ដែលកាលពីពេលថ្មីៗនេះរហូតមកទល់នឹងបច្ចុប្បន្នមានការប្រឆាំងតវ៉ារបស់អ្នកនយោបាយប្រឆាំង និងប្រជាជនថៃខ្លះកុំឲ្យរដ្ឋាភិបាលរបស់ខ្លួនគាំទ្របញ្ហានេះ ហើយមានក្រុមខ្លះបានប្រឆាំងតវ៉ាទាមទារថាប្រាសាទព្រះវិហារជារបស់ថៃទៀតផង ។
ព្រះមហាវីរក្សត្របានមានព្រះរាជឱង្ការក្នុងព្រះរាជសារថា ព្រះអង្គមានការសោកស្តាយដែលមានប្រជារាស្ត្រថៃខ្លះដែលយកបញ្ហាប្រាសាទព្រះវិហារមកបង្ករឿងជាមួយនឹងប្រជារាស្ត្រខ្មែរ ហើយព្រះអង្គក៏សុំឲ្យប្រជារាស្រ្តថៃនិងប្រជារាស្រ្តខ្មែរ ខិតខំកសាងមិត្តភាពនិងសហប្រតិបត្តិការជាជាងការយកបញ្ហាប្រាសាទព្រះវិហារមកបង្កជាអរិភាពនឹងគ្នានោះ ។
នៅក្នុងព្រះរាជសារដែលបានផ្សព្វផ្សាយនៅថ្ងៃនេះតាមអ៊ីម៉េលដែលវិទ្យុអាស៊ីសេរីទទួលបាន ហើយមានការបកប្រែក្រៅផ្លូវការនោះ ព្រះមហាវីរក្សត្របានរំឮកថា ប្រាសាទព្រះវិហារដែលបានកសាងឡើងនៅមុនសតវត្សរ៍ទី១០ និងទី១១ ក្នុងសម័យចក្រភពខ្មែរដែលពេលនោះមិនមានបញ្ហាអ្វីទេដោយសារតែពេលនោះដីខ្មែរមានវិសាលភាពទូលំទូលាយ ។ នៅក្នុងព្រះរាជសារនោះព្រះអង្គក៏បានសម្តែងភាពកតញ្ញូផងដែរដល់តុលាការយុត្តិធម៌ក្រុងឡាអេ ដែលបានកាត់សេចក្តីផ្តល់យុត្តិធម៌ដល់ខ្មែរអំពីប្រាសាទព្រះវិហារនោះ ។
នៅពេលនេះការប្រឆាំងនឹងរដ្ឋាភិបាលក្រុងបាងកកបានកើនឡើងដែលទាក់ទងនឹងបញ្ហាប្រាសាទព្រះវិហារនេះ ប៉ុន្តែមន្រ្តីអ្នកនាំពាក្យរដ្ឋាភិបាលខ្មែរ គឺលោក ខៀវ កាញារីទ្ធ បានមានប្រសាសន៍ថារហូតមកទល់ពេលនេះមិនមានបញ្ហាណាមួយកើតឡើងទាក់ទងទៅនឹងចំណងមិត្តភាពរវាងរដ្ឋាភិបាលប្រទេសទាំងពីរនោះទេ ។
លោក ខៀវ កាញារីទ្ធ បានមានប្រសាសន៍ថា ៖ «អត់មានបញ្ហាអ្វីទាំងអស់ ពីព្រោះបញ្ហាព្រះវិហារជារឿងរបស់គណបក្សប្រឆាំងទេ អ៊ីចឹងរវាងរដ្ឋាភិបាលតែម្ដងដូចអត់មានបញ្ហាអីទេ» ។
ទោះជាយ៉ាងណាក៏ដោយក្រុមអ្នកប្រឆាំងនៅក្នុងប្រទេសកម្ពុជាវិញ ថ្វីត្បិតតែមានការអបអរសាទរក្នុងការសម្រេចដាក់ប្រាសាទព្រះវិហារជាបេតិកភណ្ឌពិភពលោកនោះក៏ដោយ ប៉ុន្តែក៏បានទទូចផងដែរដល់រដ្ឋាភិបាលឲ្យមានការប្រកាសជាសាធារណៈនូវឯកសារនិងភស្តុតាងនានា និងការសន្យាថាបញ្ហាទាំងអស់នោះនឹងមិនធ្វើឲ្យមានការខាតបង់ទឹកដីឡើយ ៕
ឧបករណ៍រឿង
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
|
ចែករំលែករឿងនេះ |
អត្ថបទដែលទាក់ទង
ស្ថានការណ៍នៅតំបន់ព្រំដែនប្រាសាទព្រះវិហារ
ស្ថានការណ៍នៅតំបន់ក្បែរប្រាសាទព្រះវិហារមានសភាពធម្មតាវិញហើយ
ទាហានខ្មែរនិងថៃពើបប្រយុទ្ធគ្នាមួយប្រាវក្បែរប្រាសាទព្រះវិហារ
មន្ត្រីជាន់ខ្ពស់គ្រោងទៅទស្សនកិច្ចតំបន់ប្រាសាទព្រះវិហារ
កម្ពុជាបដិសេធការលើកឡើងរបស់ក្រសួងការបរទេសថៃពីរឿងព្រះវិហារ
មន្ត្រីខ្មែរ៖ ការលុបចោលសេចក្តីប្រកាសរួមកម្ពុជាថៃមិនមានផលប៉ះពាល់អ្វីទេ
មេបញ្ជាការយោធាខ្មែរព្រមានថៃជុំវិញការប៉ុនប៉ងរំលោភចូលដីខ្មែរ
ព្រះមហាវីរក្សត្រនឹងយាងមកកម្ពុជានៅខែមីនាខាងមុខនេះ
អតីតព្រះមហាក្សត្រប្រសិទ្ធពរឲ្យជាស៊ីមឆាប់ជាសះស្បើយ
មន្រ្តីខ្មែរ៖ ស្ថានការណ៍នៅតំបន់ព្រំដែនខ្មែរ-ថៃមានសភាពស្ងប់ស្ងាត់
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.