លោក មឿង សុន ប្រធានអង្គការមូលនិធិទ្រទ្រង់អរិយធម៌ខែ្មរដែលបានដឹកនាំប្រតិភូចំនួន៨រូបចូលគាល់អតីតព្រះមហាក្សត្រខែ្មរ ព្រះបាទ នរោត្ដម សីហនុ កាលពីថៃ្ងពុធ នៅឯព្រះបរមរាជវាំងក្នុងទីក្រុងភ្នំពេញ បានមានប្រសាសន៍ប្រាប់វិទ្យុអាស៊ីសេរីនៅថៃ្ងព្រហស្បតិ៍នេះថា ៖ «ថ្វាយទតនូវគំនូរប្លង់មន្ទីរសង្គ្រោះសុខភាពដែលយើងខ្ញុំបានសុំដាក់ទៅអាជ្ញាធរព្រះវិហាររួចហើយ ហើយខ្ញុំបានដំណឹងតាមទូរស័ព្ទ លោក អង្គ សុទ្ធ ថាលោកបានឯកភាព ។ យើងចង់បង្ហាញអំពីជោគជ័យរបស់រាជរដ្ឋាភិបាលបច្ចុប្បន្នដែលលោកបានទាមទារខំតស៊ូធ្វើឲ្យប្រាសាទព្រះវិហារហ្នឹងឈ្នះនូវឧបសគ្គទាំងឡាយបានចូលទៅជាបេតិកភណ្ឌពិភពលោកផង» ។
លោកបានឲ្យដឹងថាគម្រោងការសាងសង់មន្ទីរពេទ្យនោះនឹងចំណាយទឹកប្រាក់២ម៉ឺនដុល្លារបានមកពីសប្បុរសជននានា ។ លោកមានគម្រោងការសាងសង់មន្ទីរពេទ្យនោះចំនួន៥បន្ទប់សាងសង់នៅទីប្រជុំជនក្បែរប្រជាពលរដ្ឋខ្មែររស់នៅ និងមានគម្រោងការសុំកិច្ចសហការពីរដ្ឋាភិបាលកម្ពុជាលើបញ្ហាថ្នាំសង្កូវឬឱសថ ។
លោក មឿន សុន បានឲ្យដឹងថាលោកមានគម្រោងការដឹកនាំប្រតិភូទៅពិនិត្យកនែ្លងសាងសង់ក្នុងខេត្តព្រះវិហារនោះនៅសប្តាហ៍ក្រោយ បន្ទាប់ពីអតីតព្រះមហាក្សត្រខ្មែរ ព្រះបាទ នរោត្ដម សីហនុ និងអាជ្ញាធរប្រាសាទព្រះវិហារបានយល់ព្រមទៅលើគម្រោងការសាងសង់នោះ ។
មិនអាចទាក់ទងបានភ្លាមៗទេដើម្បីសុំសេចក្តីបញ្ជាក់ពី លោក ហង្ស សុទ្ធ ជាមន្រ្តីរបស់អាជ្ញាធរប្រាសាទព្រះវិហារជុំវិញគម្រោងការសាងសង់ខាងលើ ។
លោកឧបនាយករដ្ឋមន្រ្តី ហោ ណាំហុង ជារដ្ឋមន្រ្តីក្រសួងការបរទេសកម្ពុជាបានមានប្រសាសន៍ប្រាប់ក្រុមអ្នកកាសែតកាលពីថៃ្ងទី៨ ខែកក្កដាកន្លងទៅថ្មីៗនេះទាក់ទងនឹងប្រាសាទព្រះវិហារនោះថា ៖ «នេះជាជោគជ័យរបស់រាជរដ្ឋាភិបាលកម្ពុជាមួយក្នុងការបញ្ចូលប្រាសាទព្រះវិហារយើងក្នុងបញ្ជីបេតិកភណ្ឌពិភពលោក ។ ប៉ុន្តែសំខាន់ជាងនេះទៀតគឺជាជោគជ័យរបស់អរិយធម៌ខ្មែរយើង» ។
សូមរំឮកថាគណៈកម្មាធិការនៃបេតិភណ្ឌពិភពលោកនៃអង្គការ UNESCO បានសម្រេចជាឯកច្ឆន្ទកាលពីថៃ្ងទី៧ ខែកក្កដាកន្លងទៅថ្មីៗនេះ នៅក្នុងកិច្ចប្រជុំលើកទី៣២ នៅក្នុងទីក្រុងកេបិក ប្រទេសកាណាដា ដាក់ប្រាសាទព្រះវិហាររបស់កម្ពុជាក្នុងបញ្ជីបេតិភណ្ឌពិភពលោក ។
ផែ្អកតាមឯកសារស្រាវជ្រាវរបស់រាជបណ្ឌិតសភាកម្ពុជាបាននិយាយថា ប្រាសាទព្រះវិហាររបស់ខ្មែរដែលបានសាងសង់ក្នុងសតវត្សរ៍ទី១១ ត្រូវបានសាលក្រមនៃតុលាការអន្តរជាតិនៅក្នុងទីក្រុងទ្បាអេសម្រេចឲ្យកម្ពុជាជាអ្នកឈ្នះក្តីកាលពីថៃ្ងទី១៥ ខែមិថុនា ឆ្នាំ១៩៦២ ៕