អតីតអ្នកភូមិខ្មែរក្រហមដដែលបានអះអាងកាលពីថ្ងៃព្រហស្បតិ៍ ទី៣០ ខែកក្កដាថា ពួកគេប្រឆាំងចំពោះការប៉ុនប៉ងណាមួយពីសំណាក់អាជ្ញាធរនិងភាគីក្រុមហ៊ុនក្នុងការរំលោភយកដីស្រែចម្ការពួកគេដែលធ្លាប់បានបង្កបង្កើនផលជាច្រើនឆ្នាំមកហើយ ៖ «កាលនោះ យើងនៅមានការវាយតប់គ្នា យើងមិនទាន់បាន[សន្តិភាព]ទេ ដល់ឆ្នាំ១៩៩៣ ក៏មានការចរចាគ្នា ក៏នាំគ្នាកាប់រានទន្ទ្រាន ខ្លះក៏មានធ្វើពលិកម្ម ដាច់ដៃដាច់ជើងដោយសារកន្លែងត្រង់ហ្នឹង»។
លោក ហុក ណាក់ អាយុ៦៦ឆ្នាំ បានថ្លែងថា ៖ «ខ្ញុំស្តាប់អាស៊ីសេរី ឮសូរដូចជានៅរតនគិរី ដូចជាកោះកុង សៀមរាប ឮសូរអ៊ីចឹង វាលៗគឺដីក្រុមហ៊ុននេះ ក្រុមហ៊ុននោះ ឥឡូវធ្លាក់ដល់ខ្ញុំហើយ»។
យោងតាមផែនទីនៃទីតាំងដីស្នើសុំដោយក្រុមហ៊ុន រ័ត្ន សម្បត្តិ ដែលកាត់មកពីក្រុមហ៊ុន យោរីសាកូ បានគូសបញ្ជាក់ថា ផ្ទៃដីវិនិយោគសរុបទំហំ ៥.២០០ហិកតារ ដែលជាគម្របព្រៃឈើ ឆ្នាំ២០០២ ស្ថិតនៅស្រុកសំឡូត ខេត្តបាត់ដំបង។
កំណត់ហេតុចុះស្រង់ដីដែលរងផលប៉ះពាល់ បានបញ្ជាក់ថា ផែនទីវិនិយោគខាងលើរបស់ក្រុមហ៊ុននេះបានធ្វើឲ្យប៉ះពាល់ប្រជាពលរដ្ឋបីឃុំ ក្នុងស្រុកសំឡូត ជិត ២០០គ្រួសារ និងផ្ទៃដីជាង ៩៤៦ហិកតារ។
អភិបាលខេត្តបាត់ដំបង លោក ប្រាជ្ញ ចន្ទ មិនអាចទាក់ទងសុំការបញ្ជាក់បានទេ ថាតើក្រុមហ៊ុន រ័ត្ន សម្បត្តិ មានអាជ្ញាប័ណ្ណត្រឹមត្រូវ ឬមានកុងត្រាវិនិយោគរយៈពេលប៉ុន្មានឆ្នាំ ហើយមានគម្រោងដាំដំណាំអ្វីទេ។ ចំណែក លោក សៀង ស៊ុតថង អភិបាលរងខេត្ត និងលោក ពាង ណារិទ្ធ អគ្គលេខាធិការសាលាខេត្ត ទទួលបន្ទុកវិនិយោគ បានបញ្ជាក់ថា ពួកលោកគ្រាន់តែទទួលសេចក្តីជូនដំណឹង មិនចាំកាលបរិច្ឆេទរបស់ក្រសួងកសិកម្ម ដែលឲ្យអាជ្ញាធរខេត្តចុះសិក្សាដីនៅតំបន់នោះ។
វិទ្យុអាស៊ីសេរីមិនទាន់អាចស្វែងរកប្រភពពីក្រុមហ៊ុន រ័ត្ន សម្បត្តិ ដើម្បីសុំការបញ្ជាក់បន្ថែមជុំវិញផែនការវិនិយោគខាងលើនេះបានទេ។
មន្ត្រីស៊ើបអង្កេតនៃសមាគមការពារសិទ្ធិមនុស្ស អាដហុក លោក យិន ម៉េងលី ដែលបានចុះអង្កេតដល់មូលដ្ឋាន បានថ្លែងថា ៖ «ទី១ ត្រូវឲ្យមានការសិក្សាវាយតម្លៃឡើងវិញ ទី២ សុំឲ្យឈប់មានការប្រជុំរបៀបគំរាមកំហែងគាត់ ហើយចំណុចទី៣ ខ្ញុំឃើញថា ការអភិវឌ្ឍនេះហាក់បីដូចជាមានការលាក់កំបាំង ជាពិសេសពាក់ព័ន្ធនឹងឯកសារ»។
លោកបន្តថា បើសិនជាអាជ្ញាធរខេត្តនិងក្រុមហ៊ុនមិនបានសិក្សាឲ្យបានច្បាស់លាស់ទេ នឹងមានផលប៉ះពាល់យ៉ាងធ្ងន់ធ្ងរដល់អ្នកភូមិទាំងនោះ ដែលជីវភាពពួកគាត់ពឹងពាក់អាស្រ័យលើដីស្រែចម្ការនោះជាយូរឆ្នាំមកហើយ៕