លោក ហេង រតនា អគ្គនាយករងមជ្ឈមណ្ឌលកម្ចាត់មីនកម្ពុជា បានថ្លែងប្រាប់វិទ្យុអាស៊ីសេរីនៅព្រឹកថ្ងៃសុក្រ ទី៥ ខែធ្នូ ថា គម្រោងថ្មីនឹងចាប់ផ្ដើមអនុវត្តនៅខែត្របាត់ដំបង ក្រុងប៉ៃលិន មានថវិកា១លាន៨សែនដុល្លារសម្រាប់រយៈពេលមួយឆ្នំាជាជំនួយរបស់សហរដ្ឋអាមេរិក។
លោក ហេង រតនា បានឲ្យដឹងថា ៖ «ហើយការបោសសម្អាតជួនកាលយុទ្ធភណ្ឌមិនទាន់ផ្ទុះនិងយើងបានធ្វើការហ្វឹកហ្វឺនបានអីហើយ យើងនឹងអាចចាប់ផ្តើមនៅខែ១២នេះតាមគម្រោងផែនការយើង...»។
ផែនការបោសសម្អាតកាកសំណល់សង្រ្គាមថ្មីនេះបានធ្វើឡើងបន្ទាប់ពីមានរបាយការណ៍ថា ពលរដ្ឋកម្ពុជារងគ្រោះដោយសារគ្រាប់យុទ្ធភណ្ឌមិនទាន់ផ្ទុះកើនច្រើនជាងការរងគ្រោះដោយសារគ្រាប់មីន។
លោក សោម វីរៈ ប្រធានគម្រោងបោសសម្អាតកាកសំណល់សង្រ្គាមបានថ្លែងថា មន្រ្តីជំនាញសហរដ្ឋអាមេរិកប្រមាណ៤នាក់រួមជាមួយមន្ត្រីជំនាញខ្មែរ កាលពីថ្ងៃព្រហស្បតិ៍ និងថ្ងៃសុក្រ បានចុះទៅសិក្សាតំបន់អាទិភាពក្នុងខែត្របាត់ដំបងនិងក្រុងប៉ៃលិនរួចរាល់ហើយមុននឹងចាប់ផ្តើមអនុវត្តគម្រោងនៅចុងខែធ្នូនេះ។
តំបន់អាទិភាពទាំងនោះបានកំណត់យកភូមិចំនួន៤ក្នុងឃុំស្តៅ ស្រុករតនមណ្ឌល ខេត្តបាត់ដំបង និងយកភូមិចំនួនមួយទៀត ក្នុងសង្កាត់សាលាក្រៅ ខណ្ឌសាលាក្រៅ ក្រុងប៉ៃលិន ដែលគេសិក្សារកឃើញថាមានគ្រាប់យុទ្ធភណ្ឌមិនទាន់ផ្ទុះច្រើន។
លោក ឈឹម សុវណ្ណនី អនុប្រធានកងឯកភាពកម្ចាត់មីនទី៣នៅក្រុងប៉ៃលិន បានថ្លែងថា អត្រារងគ្រោះដោយសារយុទ្ធភណ្ឌមិនទាន់ផ្ទុះនៅក្នុងខែត្របាត់ដំបងនិងក្រុងប៉ៃលិនមានច្រើន ហើយក៏មានគ្រាប់មិនទាន់ផ្ទុះកប់នៅក្រោមដីជម្រៅជ្រៅដែលម៉ាស៊ីនមិនអាចរាវរកឃើញបាន។
លោក ឈឹម សុវណ្ណនី បានមានប្រសាសន៍ថា ៖ «ដោយសារអាត្រានៃការគ្រោះថ្នាក់ឥឡូវហ្នឹងគឺវាមានចំនួនកើននៅលើការគ្រោះថ្នាក់ដោយគ្រាប់មិនទាន់ផ្ទុះ មិនមែនដោយសារមីនទេ»។
លោក ឃឹម ឃឿន មន្ត្រីប្រមូលព័ត៌មានគ្រោះថ្នាក់ដោយសារគ្រាប់មីនរបស់កាកបាទក្រហមកម្ពុជាប្រចាំខែត្របាត់ដំបង បានមានប្រសាសន៍ថា ខែត្របាត់ដំបងមានអត្រារងគ្រោះដោយសារគ្រាប់យុទ្ធភណ្ឌមិនទាន់ផ្ទុះមានការកើនឡើងច្រើនជាងគ្រាប់មីន។
លោក ឃឹម ឃឿន បានឲ្យដឹងថា ៖ «ឆ្នាំ២០០៨ អត្រារងគ្រោះ៨២នាក់។ ជាទូទៅវាច្រើនរងគ្រោះដោយសារការលេងច្នៃ ការធ្វើដំណើរ ការធ្វើកសិកម្ម»។
បើតាម លោក ហេង រតនា របាយការណ៍របស់កាកបាទក្រហមកម្ពុជាពីដើមឆ្នាំរហូតដល់ខែតុលា ឆ្នំា២០០៨ មានអត្រាគ្រោះថ្នាក់មានជាង២៣៨ករណី ហើយការរងគ្រោះដោយសារគ្រាប់យុទ្ធភណ្ឌមិនទាន់ផ្ទុះមានទំហំធំជាងពី៥៥ទៅ៦០%។
លោកបន្តថា មជ្ឈមណ្ឌកម្ចាត់មីនកម្ពុជាបានរំដោះផ្ទៃដីទំហំជាង២០០គីឡូម៉ែតការ៉េ ដោយបានរកឃើញនិងកម្ទេចគ្រាប់យុទ្ធភណ្ឌមិនទាន់ផ្ទុះ១លាន៦សែនគ្រាប់ ហើយនៅសល់ផ្ទៃដី៤០០០គីឡូម៉ែតការ៉េទៀតដែលត្រូវធ្វើការបោសសម្អាតបន្ត ហើយថា បុគ្គលិកមជ្ឈមណ្ឌកម្ចាត់មីនកម្ពុជាបច្ចុប្បន្នទូទាំងប្រទេសមានជាង២៣០០នាក់៕