កម្មករកាត់ដេរនៃរោងចក្រតាក់ហ្វាតជាង១៨០០នាក់ នៅក្នុងសង្កាត់ចាក់អង្រែក្រោម ជាយទីក្រុងភ្នំពេញ នៅថៃ្ងច័ន្ទ ទី១៩ ខែតុលា បានស្នើសុំកិច្ចអន្តរាគមន៍ពីលោកនាយករដ្ឋមន្រ្តី ហ៊ុន សែន ដើម្បីឲ្យថៅកែរោងចក្រនេះ ផ្តាច់កិច្ចសន្យាទាំងអស់របស់កម្មករ ដើម្បីបើកប្រាក់ខែឲ្យពួកគាត់ ដោយសារតែរោងចក្រនេះកំពុងតែព្យួរការងារកម្មករជិត១ឆ្នាំមកហើយ និងជំពាក់ប្រាក់ខែកម្មករជាច្រើនមកហើយដែរ។
លោក មាស សម្ភស្ស ជាប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានមានប្រសាសន៍ថា ញត្តិនិងបណ្ដឹងតវ៉ានោះ ត្រូវបានតំណាងរបស់លោកនាយករដ្ឋមន្រ្តី ហ៊ុន សែន បានទទួលហើយនៅថ្ងៃច័ន្ទ (១៩ តុលា)នេះ។
លោក មាស សម្ភស្ស មានប្រសាសន៍ដូច្នេះ ៖ «ពួកយើងខ្ញុំមានទំនុកចិត្តហើយ ហើយគាត់ក៏ជឿជាក់ថា ប្រហែលជាមិនយូរទេរោងចក្រហ្នឹង។ គាត់និយាយថា មិនត្រឹមត្រូវទេក្នុងការព្យួរការងារតាំងពីខែ២ រហូតមកដល់សព្វថ្ងៃនេះ ធ្វើឲ្យកម្មករមានផលវិបាកខ្លាំងណាស់ បើសិនជាគាត់មិនអាចធ្វើអាជីវកម្មទៀតទេ សូមឲ្យមានការបិទរោងចក្រ ទូទាត់ផ្ដាច់កិច្ចសន្យាឲ្យពួកគាត់ទៅ។ យើងបានដាក់ទៅដល់គាត់ហើយ គាត់ថា ឲ្យពួកយើងខ្ញុំវិលត្រឡប់មកវិញ រង់ចាំដំណោះស្រាយគាត់ គាត់សុំពេលមួយរយៈដើម្បីដោះស្រាយឲ្យ»។
កម្មករកាត់ដេរម្នាក់នៅក្នុងចំណោមក្រុមកម្មករតវ៉ានៅខាងមុខរោងចក្រតាក់ហ្វាតនោះ បានថែ្លងថា កម្មករកំពុងតែជួបប្រទះស្ថានការណ៍លំបាកយ៉ាងខ្លាំងនាពេលនេះ ៖ «ពួកខ្ញុំ១៨២៣នាក់ ជួបទុក្ខលំបាកជាយូរមកហើយ ដែលក្រុមហ៊ុនធ្វើបាប ព្យួរការងារជិតមួយឆ្នាំហើយ ដល់ឥឡូវឲ្យពួកខ្ញុំព្យួរពីរខែ ឲ្យម្នាក់តែ១០ដុល្លារ ពួកខ្ញុំមិនអាចទទួលយកបានទេ។ សំណូមពរឲ្យសម្ដេចតេជោ ហ៊ុន សែន ជួយដោះស្រាយឲ្យពួកខ្ញុំផង ព្រោះពួកខ្ញុំជួបទុក្ខលំបាកខ្លាំងណាស់ សុទ្ធតែកម្មករក្រីក្រទាំងអស់»។
តំណាងម្នាក់នៃរោងចក្រតាក់ហ្វាត ដែលទើបបានលាឈប់ពីការងារនៅរោងចក្រនោះ បានថែ្លងថា រោងចក្រនេះគ្មានការទទួលការបញ្ជាទិញពីក្រៅប្រទេសរយៈពេល១ឆ្នាំមកហើយ ហើយរោងចក្រនេះកំពុងតែក្ស័យធន ៖ «ជិតមួយឆ្នាំអីដែរ ដែលអត់មានការបញ្ជាទិញ ហ្នឹងត្រឹមថ្ងៃ៧ ខ្ញុំនៅធ្វើត្រឹមថ្ងៃ៧ ខ្ញុំដឹង ឥឡូវមិនដឹងយ៉ាងម៉េចដែរ ព្រោះខ្ញុំអត់ដែលបានទៅ»។
គេនៅមិនទាន់មានចំណាត់ការណាមួយភ្លាមៗទេ ពីមន្រ្តីជាន់ខ្ពស់នៃក្រសួងការងារនិងបណ្តុះបណ្តាលវិជ្ជាជីវៈ និងតំណាងរបស់លោកនាយករដ្ឋមន្រ្តី ហ៊ុន សែន ក្នុងការដោះស្រាយវិបត្តិរបស់កម្មករខាងលើនេះ ប៉ុន្តែតំណាងកម្មករបានឲ្យដឹងថា ញត្តិនិងសំណើរបស់ពួកគាត់ បានដាក់ទៅក្រសួងការងារនិងស្ថាប័នពាក់ព័ន្ធរួចទៅហើយ កាលពីពេលថ្មីៗនេះ។
មេដឹកនាំគណបក្សប្រឆាំង លោក សម រង្ស៊ី កាលពីចុងសប្តាហ៍ថ្មីៗនេះ បានទៅដឹកនាំការតវ៉ារបស់កម្មករទាំងនោះផងដែរ ហើយបានសន្យាថា លោកនឹងតាមឃ្លាំមើលជំរុញឲ្យមានការដោះស្រាយ។
ប្រភពពីតំណាងកម្មករនិងសហជីពកម្មករ បានឲ្យដឹងថា រោងចក្រកាត់ដេរឈ្មោះតាក់ហ្វាតនោះ បានព្យួរការងារកម្មករសរុបជាង១៨០០នាក់ ចាប់តាំងពីថៃ្ងទី១៤ ខែកុម្ភៈ ដើមឆ្នាំ២០០៩ រហូតមកដល់បច្ចុប្បន្ន ហើយមានគម្រោងការចង់ព្យួរការងារកម្មករទាំងនោះចំនួនជាង២ខែទៀត ដោយសារតែគ្មានការបញ្ជាទិញទំនិញពីប្រទេសក្រៅតាំងពីដើមឆ្នាំ២០០៨មក។
ថៅកែរោងចក្រតាក់ហ្វាត បានផ្តល់ប្រាក់ខែឲ្យកម្មករព្យួរការងារនោះ ចំនួន១២ដុល្លារអាមេរិកក្នុងមួយខែ ប្រៀបធៀបទៅនឹងប្រាក់ខែពេញរបស់កម្មករជាមធ្យម៦០ដុល្លារក្នុងមួយខែ៕