ឡី ប៉ិប អាយុ ៤៣ឆ្នាំ បានថ្លែងនៅថ្ងៃអាទិត្យនេះថា ប្រជាពលរដ្ឋ ៨៥គ្រួសាររស់នៅភូមិត្រពាំងធ្លក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ កំពុងប្រឈមនឹងបញ្ហាខ្វះខាតជីវភាពក្នុងគ្រួសារ ដោយសារមិនមានដីស្រែចម្ការបង្កបង្កើនផល។
លោកបានបន្តថា ដីស្រែរាប់សិបហិកតារនៅក្នុងភូមិដែលពួកធ្លាប់បង្កបង្កើនផលជាច្រើនឆ្នាំមកហើយនោះ ត្រូវមន្ត្រីបរិស្ថានហាមឃាត់ដកហូតយកដោយសំអាងថា ដីនៅតំបន់នោះស្ថិតក្នុងតំបន់អភិរក្សទេសភាពប្រាសាទបន្ទាយឆ្មារ ៖ «បើថាយើងទើបទៅគាស់កកាយទៅមិនថាទេ តែយើងគាស់បានប៉ុន្មានខែប៉ុន្មានឆ្នាំហើយក៏នៅតែគេចាប់»។
ក្រុមអ្នកភូមិបានបន្តថា ខាងមន្រ្តីបរិស្ថានបានចាប់យកម៉ាស៊ីនគោយន្តភ្ជួរដីរបស់អ្នកភូមិជំរិតទារលុយជាច្រើនលើកច្រើនសា ក្នុងរយៈពេលជាបន្តបន្ទាប់មកនេះ ខណៈដែលពួកគេប្រើប្រាស់ក្នុងការភ្ជួរដីស្រែចម្ការរបស់ខ្លួនដែលធ្លាប់ធ្វើជាច្រើនឆ្នាំមកហើយ ៖ «គេចាប់យកគោយន្តយើងដើម្បីផាកពិន័យ។ ពួកនេះមិនមែនពួកអនាធិបតេយ្យទេ ខេត្តស្រុកទទួលស្គាល់ត្រឹមត្រូវ អត្តសញ្ញាណប័ណ្ណក៏មាន ប័ណ្ណគ្រួសារក៏មាន សៀវភៅគ្រួសារក៏មាន»។
ក្រុមអ្នកភូមិដដែលបានបន្តថា ក្រុមមន្ត្រីបរិស្ថានបានប្រាប់ថា ប្រជាពលរដ្ឋទាំង ៨៥គ្រួសារនៅភូមិត្រពាំងធ្លក គឺមួយគ្រួសារៗអាចរស់នៅលើដីទំហំ ៥០ម៉ែត្រ គុណនឹង ៧០ម៉ែត្រដែលពួកគេកំណត់ឲ្យប៉ុណ្ណោះ។
អនុប្រធានមន្ទីរបរិស្ថានខេត្តបន្ទាយមានជ័យ លោក ម៉ម ឆាយឆន មិនធ្វើអត្ថាធិប្បាយជុំវិញបញ្ហាខាងលើនេះទេ ប៉ុន្តែអះអាងថា ផ្ទៃដីទំហំ ៨១.២០០ហិកតារ គឺបានកំណត់ដោយព្រះរាជក្រឹត្យកាលពីឆ្នាំ១៩៩៣ ដើម្បីអភិរក្សថែរក្សាការពារតំបន់ទេសភាពប្រាសាទបន្ទាយឆ្មារ។
លោកបន្តថា យោងតាមច្បាប់ការពារតំបន់ធម្មជាតិមានការកណត់ព្រំប្រទល់ ហើយបែងចែកជាតំបន់ដែលមានដីកសិកម្មឲ្យសហគមន៍បង្កបង្កើនផលបាន ៖ «មានតំបន់ស្នូល តំបន់អភិរក្ស តំបន់ប្រើប្រាស់ចិរភាព ហើយនិងតំបន់សហគមន៍»។
មន្ត្រីអង្គការរក្សាការពារសិទ្ធិមនុស្សកម្ពុជា ហៅកាត់ថា Vigilance លោក ឡាយ វឌ្ឍនា បានថ្លែងថា យោងតាមការសិក្សាមានប្រជាពលរដ្ឋចំនួនបីឃុំ ក្នុងស្រុកថ្មពួក ខេត្តបន្ទាយមានជ័យ បានរងការបាត់បង់ដីកសិកម្មដោយសារព្រះរាជក្រឹត្យអភិរក្សតំបន់ទេសភាពប្រាសាទបន្ទាយឆ្មារ។
មន្ត្រីរូបនេះបានបន្តថា ការកំណត់យកតំបន់ទេសភាពប្រាសាទបន្ទាយមានឆ្មារ គឺមានផ្ទៃដីធំ ហើយអាជ្ញាធរមិនបានចុះសិក្សាស្រាវជ្រាវឲ្យបានជាក់លាក់ជុំវិញការផលប៉ះពាល់របស់អ្នកភូមិ ទើបធ្វើឲ្យមានបញ្ហាកើតឡើង។
លោកឲ្យអាជ្ញាធរមានសមត្ថកិច្ចពាក់ព័ន្ធ គួរចុះពិនិត្យបញ្ហានេះឡើងវិញ បើមិនដូច្នេះ ផលប៉ះពាល់នឹងកាន់តែធ្ងន់ធ្ងរទៅៗ៕