ក្រុមគ្រួសារជនរងគ្រោះដែលទន្ទឹងរង់ចាំការរកយុត្តិធម៌ជួនពួកគេអស់រយៈពេលជាង ១៣ឆ្នាំកន្លងមកនោះ បានរលាយបាត់ទៅវិញ នៅខណៈដែលគេដឹងថា ការិយាល័យស៊ើបអង្កេតសហព័ន្ធ ហៅថា FBI សហរដ្ឋអាមេរិក ដែលគេរំពឹងថា នឹងរកយុត្តិធម៌ជូនពួកគេបាននោះ ត្រូវបានឈប់ធ្វើការស៊ើបអង្កេតលើសំណុំរឿងវាយប្រហារគ្រាប់បែកដោយជនមិនស្គាល់មុខកាលពីឆ្នាំ១៩៩៧ នោះ។
ម្ដាយជនរងគ្រោះមួយរូប បានសម្ដែងការសោកស្ដាយថា កូនប្រុសរបស់អ្នកស្រីបានស្លាប់នៅក្នុងហេតុការណ៍គប់គ្រាប់បែកនោះ ដែលបន្សល់ទុកនូវកូន ២នាក់ និងភរិយាមេម៉ាយគ្មានទីពឹងរហួតដល់សព្វថ្ងៃ។ អ្នកស្រីបានបញ្ជាក់ថា កូនប្រុសរបស់អ្នកស្រីជាវេជ្ជបណ្ឌិតមួយរូប ដែលអ្នកស្រីខិតខំតស៊ូឲ្យកូនរៀនពេទ្យដល់ទីបញ្ចប់ តែផ្ទុយទៅវិញកូនរបស់គាត់បានរងគ្រោះនៅក្នុងហេតុការណ៍ដ៏ឈឺចាប់នោះទៅវិញ។
គ្រាប់បែកយ៉ាងហោចណាស់ចំនួន ៤គ្រាប់ត្រូវបានជនមិនស្គាល់មុខគប់ទៅក្នុងហ្វូងបាតុករបណ្ដាលឲ្យមនុស្សចំនួន ១៦នាក់ស្លាប់នៅនឹងកន្លែង និងនៅមន្ទីរពេទ្យ ហើយមនុស្សជាង ១០០នាក់ផ្សេងទៀតរងរបួស នៅខណៈដែលលោក សម រង្ស៊ី ដែលកាលនោះជាប្រធានគណបក្សជាតិខ្មែរ បានដឹកនាំហ្វូងបាតុករធ្វើបាតុកម្មអហិង្សា ដើម្បីទាមទារកំណែទម្រង់ប្រព័ន្ធតុលាការ និងប្រឆាំងអំពើពុករលួយនៅក្នុងប្រទេសកម្ពុជា។
ក្រោយពីការវាយប្រហារដោយគ្រាប់បែកដៃនេះភ្លាមៗ លោក សម រង្ស៊ី បានចោទប្រកាន់លោក ហ៊ុន សែន ថា ជាអ្នកនៅពីក្រោយខ្នងក្នុងរឿងនេះ ប៉ុន្តែត្រូវបានលោក ហ៊ុន សែន បដិសេធមកវិញ។
កាសែត ឌឹ ឃេមបូឌា ដេលី (The Cambodia daily) បានចេញផ្សាយកាលពីថ្ងៃទី១១ ខែមករា បានសរសេរថា ភ្នាក់ស៊ើបអង្កេតសហរដ្ឋអាមេរិក បានឈប់ធ្វើការស៊ើបអង្កេតសំណុំរឿងគប់គ្រាប់បែក កាលពីឆ្នាំ១៩៩៧នេះ តាំងពីហេតុការណ៍នេះបានកើតឡើងរយៈពេល ៨ឆ្នាំមកម៉្លេះ។
ប៉ុន្តែកាសែតមួយនេះបានចុះផ្សាយដោយស្រង់ខ្លឹមសាររបាយការណ៍របស់ FBI ថ្មីៗបំផុត ក្នុងចំណោមរបាយការណ៍របស់ FBI ដែលបានចេញកន្លងមក បានសរសេរថា អង្គភាពនៅទីក្រុងហូណូ លូលូ របស់ការិយាល័យស៊ើបអង្កេតសហព័ន្ធ FBI បានសម្រេចបិទការស៊ើបអង្កេតរបស់ខ្លួន ព្រោះវាគួរត្រូវបានរក្សាទុកជាការសម្ងាត់ ដើម្បីការពាររដ្ឋាភិបាលកម្ពុជា ហើយថា សំណុំរឿងនេះរសើបខ្លាំងណាស់ ពីព្រោះវាស្ថិតនៅចំកណ្ដាលនៃចម្ការមីននយោបាយដ៏ធំមួយ។
មន្ត្រីនាំពាក្យគណបក្សប្រឆាំង លោក យឹម សុវណ្ណ បានមានប្រសាសន៍ថា ទោះបីជាភ្នាក់ងារស៊ើបអង្កេតសហរដ្ឋអាមេរិកឈប់ធ្វើការស៊ើបអង្កេតក្ដី ប៉ុន្តែរដ្ឋាភិបាលកម្ពុជា មិនអាចឈប់ធ្វើការស៊ើបអង្កេតបានទេ។ យ៉ាងនេះក្ដី លោក យឹម សុវណ្ណ បានអះអាងថា របាយការណ៍របស់ FBI បានបង្ហាញយ៉ាងច្បាស់ថា រដ្ឋាភិបាលកម្ពុជា បានជាប់ពាក់ព័ន្ធទៅនឹងករណីគប់គ្រាប់បែកកាលពីឆ្នាំ១៩៩៧នោះ។
លោក យឹម សុវណ្ណ បានចោទប្រកាន់រដ្ឋាភិបាលខ្មែរថា បើសិនជាករណីនេះមិនជាប់ពាក់ព័ន្ធទៅនឹងមន្ត្រីធំរបស់រដ្ឋាភិបាលទេនោះ គឺរដ្ឋាភិបាលអាចចាប់ឃាត់ខ្លួនឃាតកបានយូរណាស់មកហើយ។
ទោះជាយ៉ាងណា មន្ត្រីនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បានច្រានចោលការចោទប្រកាន់ ដោយលោកបញ្ជាក់ថា ការចោទប្រកាន់នេះគ្មានមូលដ្ឋានច្បាស់លាស់។
កាលពីថ្ងៃទី១៥ ខែវិច្ឆិកា ឆ្នាំ២០១០ អតីតនាយកអង្គការការពារសិទ្ធិមនុស្ស និងជាមេធាវីលោក មូរតុន ក្លា (Morton Sklar) ជាមេធាវីរបស់លោក សម រង្ស៊ី បានមានប្រសាសន៍ថា លោកបានប្ដឹងលោក ហ៊ុន សែន និងក្រុមរបស់លោក ចំពោះការពាក់ព័ន្ធនឹងការលាក់បាំងព័ត៌មានក្នុងការស៊ើបអង្កេតរបស់ FBI ការផ្ដល់ចម្លើយមិនពិត និងការគំរាមកំហែងមន្ត្រី FBI។ លោកបញ្ជាក់ថា តុលាការសហរដ្ឋអាមេរិក មានយុត្តាធិការដើម្បីស៊ើបអង្កេតការរាំងការស៊ើបអង្កេតរបស់ FBI ដោយសារតែជនជាតិអាមេរិកម្នាក់ ក៏បានរងរបួសក្នុងការវាយប្រហារគ្រាប់បែកនេះដែរ។
ទាក់ទងទៅនឹងករណី FBI មិនបានបន្តការស៊ើបអង្កេតទៀតនេះ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានសម្ដែងការសោកស្ដាយថា សហរដ្ឋអាមេរិកសុខចិត្តយកទំនាក់ទំនងការទូតល្អរវាងអាមេរិក និងកម្ពុជា ជាជាងរកយុត្តិធម៌ជូនជនរងគ្រោះខ្មែរ ដោយលោកអះអាងថា FBI អាមេរិកមិនគួរធ្វើដូច្នេះទេ។
មន្ត្រីនាំពាក្យស្ថានទូតសហរដ្ឋអាមេរិកប្រចាំនៅកម្ពុជា លោក ម៉ាក វីនិក (Mark Wenig) បានឲ្យដឹងតាមរយៈសារអេឡិចត្រូនិក នៅថ្ងៃទី១២ ខែមករា ដូច្នេះ ៖ "ខ្ញុំមិនអាចទាយបានថា FBI អាចធ្វើ ឬមិនធ្វើអ្វីទេ ទាក់ទងករណីនេះនៅពេលអនាគត។ ខ្ញុំគ្រាន់តែអាចនិយាយបានថា ការស៊ើបអង្កេតដំបូងរបស់គេ គឺមិនប្រាកដប្រជា ហើយការិយាល័យរដ្ឋអាជ្ញាសហរដ្ឋអាមេរិក ក៏មិនហ៊ានបន្តករណីនេះ។ ព័ត៌មានបន្ថែម ខ្ញុំឱ្យអ្នកទាក់ទងទៅការិយាល័យ FBI នៅវ៉ាស៊ីនតុន ដែលអាចផ្តល់ការពន្យល់ច្បាស់លាស់អំពីផែនការរបស់ពួកគេ"។
កាលពីថ្ងៃទី២៩ ខែមីនា ឆ្នាំ២០១០ អង្គការការពារសិទ្ធិមនុស្សឈ្មោះ Human Rights Watch បានចេញសេចក្ដីប្រកាសព័ត៌មានមួយពីបុរីញូវយ៉ក សហរដ្ឋអាមេរិក ក្នុងពេលគណបក្ស សម រង្ស៊ី ប្រារព្ធខួបដើម្បីរំឭកវិញ្ញាណក្ខន្ធមរណជនដែលរងគ្រោះក្នុងព្រឹត្តិការណ៍លើកទី១៣ថា ការិយាល័យស៊ើបអង្កេតសហព័ន្ធ FBI គួរតែសើរើរឿងស៊ើបអង្កេតករណីនេះឡើងវិញ ហើយថា មកទល់នឹងពេលនេះ រដ្ឋាភិបាលកម្ពុជា មិនបានចាត់វិធានការណាមួយ ដើម្បីរកមុខអ្នកប្រព្រឹត្តយកទៅផ្តន្ទាទោសនៅឡើយទេ ទោះបីជាមានភស្តុតាងអំពីការរួមដៃនៃអង្គភាពអង្គរក្សនាយករដ្ឋមន្ត្រីយ៉ាងណាក្តី។
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ បានអះអាងថា ក្រសួងមហាផ្ទៃ នៅតែបន្តការស៊ើបអង្កេត ដើម្បីចាប់ខ្លួនជនសង្ស័យគប់គ្រាប់បែកកាលពីខែថ្ងៃទី៣០ ខែមីនា ឆ្នាំ១៩៩៧ នៅឡើយទេ ដោយលោកបានបញ្ជាក់ដូច្នេះ ៖ «ករណីហ្នឹងហាក់ដូចជាទ្រឹង។ ដូចយើងធ្លាប់បានដឹងទាំងអស់គ្នាហើយ ឃើញមានជនសង្ស័យមួយរូប តាមការគូសវាស... ហើយកន្លងមកប្រេស៊ីល ក៏បាត់ខ្លួនអាថ៌កំបាំងបំផុត ដែលស្ថិតក្នុងការឃុំគ្រងរបស់គណបក្សនយោបាយមួយ»។
ទោះជាយ៉ាងណា មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ លោក អំ សំអាត បានពន្យល់ថា ការស៊ើបអង្កេតនេះវាអាស្រ័យលើឆន្ទៈរបស់រដ្ឋាភិបាលតែប៉ុណ្ណោះ ព្រោះហេតុការណ៍ធ្វើឲ្យមានមនុស្សស្លាប់ច្រើនសន្ធឹកសន្ធាប់នេះ បានកន្លងផុតទៅជាង ១៣ឆ្នាំហើយ ប៉ុន្តែជនដៃដល់នៅក្រៅសំណាញ់ច្បាប់នៅឡើយ។
សកម្មជនសិទ្ធិមនុស្សក្នុងស្រុក និងអន្តរជាតិ បានចាត់ទុកការវាយប្រហារដោយគ្រាប់បែកដៃនេះថា ជាឃាតកម្មប្រវត្តិសាស្ត្រដ៏តក់ស្លុតមួយសម្រាប់ប្រទេសកម្ពុជា នៅក្នុងហេតុការណ៍ដ៏រន្ធត់នោះ។ ប៉ុន្តែរដ្ឋាភិបាលបានអូសបន្លាយមិនចាប់ខ្លួនជនដៃដល់បានភ្លាមៗនោះ គឺជាចេតនារបស់រដ្ឋាភិបាល និងជារឿងអាថ៌កំបាំងផ្នែកនយោបាយមួយ ដែលខុសអំពីសំណុំរឿងដទៃទៀត ដែលសមត្ថកិច្ចរបស់រដ្ឋាភិបាលមានសមត្ថភាពចាប់ខ្លួនជនល្មើសបានភ្លាមៗ៕