អាមេរិក​ជំរុញ​ឲ្យ​កម្ពុជា​ខិតខំ​ប្រឆាំង​ការ​ជួញ​ដូរ​ផ្លូវ​ភេទ​លើ​ស្ត្រី​និង​កុមារ

សហរដ្ឋ​អាមេរិក​ជំរុញ​ឲ្យ​រដ្ឋាភិបាល​កម្ពុជា យក​ចិត្ត​ទុក​ដាក់​បន្ថែម​ក្នុង​ការ​ប្រយុទ្ធ​ប្រឆាំង​ការ​ជួញដូរ​ផ្លូវ​ភេទ​លើ​ស្ត្រី និង​កុមារ ព្រម​ទាំង​រាល់​ទម្រង់​នៃ​ទាសភាព​សម័យ​ថ្មី​នៅ​កម្ពុជា។
ដោយ ម៉ៅ សុធានី
2012-11-27
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ការ​ទាមទារ​នេះ ធ្វើ​ឡើង​ក្នុង​កិច្ច​ពិភាក្សា​មួយ​កាល​ពី​សប្ដាហ៍​មុន ជាមួយ​ជន​រងគ្រោះ​នៃ​ការ​ជួញដូរ​មនុស្ស​នៅ​ស្ថានទូត​សហរដ្ឋអាមេរិក ក្នុង​រាជធានី​ភ្នំពេញ ដោយ​មាន​ការ​ចូលរួម​ពី​អ្នកស្រី វ៉ាល់ល្លឺរី ហ្យារ៉េត (Valerie Jarrett) ទីប្រឹក្សា​ប្រធានាធិបតី​សហរដ្ឋ​អាមេរិក​ទទួល​បន្ទុក​ផ្នែក​កិច្ចការ​សាធារណៈ ដែល​បាន​អម​ដំណើរ​ទស្សនកិច្ច​របស់​លោក​ប្រធានាធិបតី បារ៉ាក់ អូបាម៉ា (Barack Obama) នៅ​កម្ពុជា។

ក្នុង​ជំនួប​ពិភាក្សា​កាល​ពី​ថ្ងៃ​អង្គារ ទី​២០ វិច្ឆិកា ស្ដីពី​ស្ថានភាព​ជួញដូរ​មនុស្ស​នៅ​កម្ពុជា ទីប្រឹក្សា​ជាន់​ខ្ពស់​របស់​ប្រធានាធិបតី​សហរដ្ឋអាមេរិក អ្នកស្រី វ៉ាល់ល្លឺរី ហ្យារ៉េត បាន​គូស​បញ្ជាក់​ថា ការ​បញ្ចប់​រាល់​ទម្រង់​នៃ​ការ​ជួញដូរ​មនុស្ស និង​ទាសភាព​នៅ​កម្ពុជា គឺ​ជា​បញ្ហា​អាទិភាព​របស់​សហរដ្ឋ​អាមេរិក។

អ្នកស្រី​បន្ត​ថា ដើម្បី​សម្រេច​បាន​ទិស​ដៅ​ទាំង​នោះ រដ្ឋាភិបាល​កម្ពុជា ត្រូវ​មាន​វិធីសាស្ត្រ​ច្បាស់លាស់​ក្នុង​ការ​ទប់ស្កាត់​ការ​ជួញដូរ​មនុស្ស ផ្ដល់​កិច្ច​គាំពារ​ដល់​ជន​រងគ្រោះ និង​ដាក់​ទោស​ធ្ងន់ធ្ងរ​ចំពោះ​ឧក្រិដ្ឋជន​ជាដើម។

គេហទំព័រ (Website) នៃ​សេតវិមាន ផ្សាយ​កាល​ពី​ថ្ងៃ​ច័ន្ទ ទី​២៦ វិច្ឆិកា នេះ បាន​ឲ្យ​ដឹង​ផង​ដែរ​ថា ក្នុង​ជំនួប​ទ្វេ​ភាគី​រវាង​ប្រធានាធិបតី​សហរដ្ឋអាមេរិក និង​នាយករដ្ឋមន្ត្រី​កម្ពុជា លោក បារ៉ាក់ អូបាម៉ា បាន​ប្រាប់​លោក ហ៊ុន សែន ថា ប្រសិន​បើ​រដ្ឋាភិបាល​កម្ពុជា បង្កើន​ការ​ប្រឹងប្រែង​ទប់​ស្កាត់​អំពើ​ពុករលួយ ពង្រឹង​ការ​អនុវត្ត​ច្បាប់ និង​ការពារ​សិទ្ធិ​សេរីភាព​របស់​ប្រជាពលរដ្ឋ​ខ្មែរ រាប់​ទាំង​ជន​ដែល​ងាយ​រង​គ្រោះ​ដោយសារ​ការ​ជួញដូរ​មនុស្ស រដ្ឋាភិបាល​កម្ពុជា នឹង​អាច​ទទួល​បាន​នូវ​ភាគី​ដៃគូ និង​សហប្រតិបត្តិការ​ពី​សហរដ្ឋ​អាមេរិក។

លោក​ប្រធានាធិបតី អូបាម៉ា បន្ថែម​ថា នៅ​ទន្ទឹម​នេះ​ដែរ សហរដ្ឋអាមេរិក​នឹង​បន្ត​ផ្ដល់​ការ​គាំទ្រ​ដល់​សេវា​អប់រំ ហ្វឹកហ្វឺន​មន្ត្រី​អាជ្ញាធរ​កម្ពុជា ពី​វិធី​ស៊ើប​អង្កេត​ដើម្បី​យក​ឧក្រិដ្ឋជន​មក​ផ្ដន្ទាទោស​តាម​ច្បាប់ និង​ផ្ដល់​សេវា​នីតិសម្បទា សម្រាប់​ជន​រងគ្រោះ​នៃ​ការ​ជួញដូរ​មនុស្ស ការ​រំលោភ​ផ្លូវ​ភេទ​ជាដើម។

នាយក​ប្រតិបត្តិ​សមាគម​សង្គ្រោះ និង​ស្ដារ​នីតិ​សម្បទា​យុវនារី ឬ​ហៅ​កាត់​ថា អង្គការ អេហ្វេស៊ីប (AFESIP) លោក សៅ ឈឿត មាន​ប្រសាសន៍​កាល​ពី​យប់​ថ្ងៃ​ទី​២៧ វិច្ឆិកា ថា បញ្ហា​ការ​ជួញដូរ​មនុស្ស​នៅ​តែ​បន្ត​កើត​មាន​នៅ​ក្នុង​ប្រទេស​កម្ពុជា ហើយ​ភាគ​ច្រើន​កើត​ឡើង​នៅ​កន្លែង​ផ្ដល់​សេវា​កម្សាន្ត​នានា និង​ខារ៉ាអូខេ ដោយ​លាក់​កំបាំង។

លោក សៅ ឈឿត៖ «បើ​យើង​មើល​ស្ថានភាព​ឥឡូវ​មិន​សូវ​ចំហ​ដូច​មុន​ទេ គឺ​អាថ៌កំបាំង​ជាង​មុន ច្រើន​កើត​ឡើង​នៅ​តាម​សួន​ច្បារ​នៅ​ដដែល នៅ​តាម​ផ្ទះ​សំណាក់ តាម​កន្លែង​ម៉ាស្សា និង​ខារ៉ាអូខេ មាន​អ៊ីចឹង​ដែរ។ សព្វថ្ងៃ​នេះ​យើង​នៅ​ដំណើរ​ការ​ធម្មតា យើង​មាន​មណ្ឌល​បី គឺ​នៅ​សៀមរាប កំពង់ចាម និង​នៅ​ភ្នំពេញ។ យើង​ផ្ដល់​សេវាកម្ម​ដដែល ផ្នែក​អ៊ុតសក់ កាត់​ដេរ តម្បាញ។ មណ្ឌល​នីមួយៗ​យើង​មាន​ប្រមាណ​ពី ៥០​នាក់ ទៅ​ជាង ៧០​នាក់…»

អ្នកស្រី វ៉ាល់ល្លឺរី ហ្យារ៉េត ទីប្រឹក្សា​ជាន់​ខ្ពស់​ប្រធានាធិបតី​សហរដ្ឋអាមេរិក បាន​ឲ្យ​ដឹង​ផង​ដែរ​ថា អ្នកស្រី​ក៏​បាន​ជួប​ពិភាក្សា​ជាមួយ​តំណាង​អង្គការ​ក្រៅ​រដ្ឋាភិបាល​មួយ​ចំនួន ដើម្បី​ជជែក​ពី​កិច្ច​ខំ​ប្រឹងប្រែង​របស់​ពួកគេ​ក្នុង​ការ​ទប់​ស្កាត់ និង​លុប​បំបាត់​រាល់​ទម្រង់​នៃ​ការ​ជួញដូរ​ផ្លូវ​ភេទ​លើ​ស្ត្រី និង​កុមារ និង​សេវា​ដល់​ជន​រងគ្រោះ។

តំណាង​អង្គការ​ទាំង​នោះ​បាន​បង្ហាញ​ពី​ក្តី​បារម្ភ​មួយ​ចំនួន រួម​មាន​ឧបសគ្គ​ក្នុង​ការ​យក​ឧក្រិដ្ឋជន​មក​ផ្ដន្ទាទោស​តាម​ច្បាប់ ភាព​លំបាក​វេទនា​របស់​ជន​រងគ្រោះ ភាព​ខ្វះខាត​ក្នុង​កិច្ច​ប្រឹងប្រែង​បង្ក្រាប​របស់​អាជ្ញាធរ​មាន​សមត្ថកិច្ច ព្រម​ទាំង​អំពើ​ពុករលួយ​ក្នុង​ប្រព័ន្ធ​តុលាការ​កម្ពុជា​ជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

ខ្ញុំឆ្ងល់ថារដ្ថមន្រ្តី អ្នកមានលុយ ែដលទិញក្មេងស្រី ចពា្ចឹម ដើម្បីសប្បាយលួចលាក់ េគចាត់ទុកថា ការ​ជួញដូរ​ផ្លូវ​ភេទ​លើ​ស្ត្រី និង​កុមារ ព្រម​ទាំង​រាល់​ទម្រង់​នៃ​ទាសភាព​សម័យ​ថ្មី​នៅ​កម្ពុជា ែដរេទ? េបីពិតមែនបំបាត់មិចបានទេៅ!!!

Nov 28, 2012 01:28 AM