អគ្គីភ័យ​បំផ្លាញ​ផ្ទះ ២៥​ខ្នង​នៅ​ខណ្ឌ​ឫស្សីកែវ​ក្នុង​ក្រុង​ភ្នំពេញ

អគ្គីភ័យ​បាន​ឆាប​ឆេះ​ផ្ទះ​ចំនួន ២៥​ខ្នង នៅ​ក្នុង​ភូមិ​ទួល​សង្កែ សង្កាត់​ទួលសង្កែ ខណ្ឌ​ឫស្សីកែវ នៅ​ល្ងាច​ថ្ងៃ​ទី​២ ខែ​កុម្ភៈ​នេះ ដែល​បណ្តាល​ឲ្យ​ខូចខាត​ទ្រព្យ​សម្បត្តិ​របស់​ប្រជាពលរដ្ឋ​មិន​អាច​ជួយ​សង្គ្រោះ​បាន​ឡើយ។
ដោយ មុំ សុផុន
2009.02.02
អគ្គីភ័យ303 ក្រុម​អ្នក​ពន្លត់​អគ្គីភ័យ​បាញ់​ទឹក​ពន្លត់​ផ្ទះ​ដែល​ត្រូវ​ភ្លើង​ឆេះ​នៅ​ភូមិ​ទួល​សង្កែ ខណ្ឌ​ឫស្សីកែវ ក្រុង​ភ្នំពេញ។
RFA/Mom Sophon

ប្រពលរដ្ឋ​រង​គ្រោះ​នៅ​ក្នុង​ហេតុការណ៍​នោះ លោក ឡាយ ស៊ីហន អាយុ ៦០​ឆ្នាំ បាន​មាន​ប្រសាសន៍​ឲ្យ​ដឹង​ថា អគ្គីភ័យ​បាន​ឆេះ​លឿន​ពេក​មិន​អាច​ធ្វើ​អ្វី​ទាន់​ឡើយ។

លោក ឡាយ ស៊ីហន មាន​ប្រសាសន៍​ដូច្នេះ​ថា ៖ «ផ្ទះ​នៅ​ក្នុង​ទឹក ហើយ​ដំបូល​ស័ង្កសី។ ឮ​ថា ទុស្សេ​ខ្សែ​ភ្លើង​ភឹង​ឡើង​លើ​តែ​ម្ដង ឡើង​លើ​ហើយ​បាន​ឆេះ​រាល​ដាល​ទៅ​លិច​ទៅ​កើត។ ម្ចាស់​នៅ​ហ្នឹង មិន​ដឹង​យ៉ាង​ម៉េច​បាន​ទុស្សេ​ហ្នឹង ...​គ្មាន​នរណា​ពន្លត់​ទាន់​ទេ អណ្ដាត​ភ្លើង​ឡើង​តែ​ម្ដង។ បន្តិច​ឡាន​ទឹក​មក​ដល់​ភ្លាម មក​ទាន់​ពេល​វេលា​ដែរ មក​កៀក​ៗ​គ្នា»

តាម​ការ​អះអាង​ពី​ប្រធាន​ក្រុម​ទី​១៨ ក្នុង​ភូមិ​ទួល​សង្កែ ដែល​ត្រូវ​ភ្លើង​ឆេះ​នោះ បាន​ថ្លែង​ឲ្យ​ដឹង​ថា តាម​ការ​មើល​ឃើញ​ភ្លើង​បាន​ឆាប​ឆេះ​ពី​ផ្ទះ​ឈ្មោះ ឡោក ធិន ហើយ​ការ​ឆេះ​នោះ​មិន​ទាន់​មាន​របាយការណ៍​ពី​ការ​គ្រោះថ្នាក់​ដល់​ជីវិត​មនុស្ស​ទេ ប៉ុន្តែ​ទ្រព្យ​សម្បត្តិ​របស់​ប្រជាពលរដ្ឋ​ត្រូវ​ខូច​ខាត​ទាំង​ស្រុង។

ចំណែក​ឯ​នាយ​ការិយាល័យ​ពន្លត់​អគ្គីភ័យ​ក្រុង​ភ្នំពេញ លោក​វរសេនីយ៍​ត្រី នេត្រ វន្ថា ដែល​ចុះ​ជួយ​ទៅ​ដល់​កន្លែង​កើត​ហេតុ​នោះ បាន​ថ្លែង​បា្រប់​ឲ្យ​ដឹង​ថា អាជ្ញាធរ​ពន្លត់​អគ្គីភ័យ​បាន​ប្រើ​រថយន្ត​ពន្លត់​អគ្គីភ័យ​ចំនួន ១១​គ្រឿង រួម​ជាមួយ​រថយន្ត​សង្គ្រោះ​ផ្សេងៗ​ទៀត ហើយ​ប្រើ​ទឹក​ពន្លត់​អស់​ជិត ៣០​ឡាន ដោយ​ប្រើ​ពេល​អស់​មួយ​ម៉ោង​កន្លះទើប​អាច​ជួយ​សង្គ្រោះ​បាន។

លោក​វរសេនីយ៍​ត្រី នេត្រ វន្ថា ថ្លែង​ថា ៖ «ស្មុគស្មាញ​មែន​ទែន​តំបន់​នេះ ដោយសារ​សំណង់​នៅ​ទីនេះ​អត់​មាន​ផ្លូវ​សម្រាប់​យើង​ធ្វើ​អន្តរាគមន៍​ទេ គឺ​ពិបាក​មែន​ទែន។ ដោយសារ​ការ​ទម្លុះ​ទម្លាយ​ជាមួយ​មូលដ្ឋាន គាស់​ដំបូល គាស់​ចន្លោះ ទម្រាំ​បាន​យើង​មាន​លទ្ធភាព​ឲ្យ​ទុយោ​យើង​បាញ់​ដល់​គោលដៅ ហើយ​និង​ប្រជាពលរដ្ឋ​គាត់​ចូលរួម​ផង បាន​ទប់​ស្កាត់​បាន​ដល់​ម៉ោង​នេះ កុំ​អី​ប្រហែល​ជា​អាច​ខូច​ជាង​ហ្នឹង​ទៅ​ទៀត»

អភិបាល​ខណ្ឌ​ឫស្សីកែវ លោក ឃ្លាំង ហួត បាន​ថ្លែង​ដែរ​ថា គេ​មិន​ទាន់​អាច​វាយ​តម្លៃ​នៃ​ការ​ខូច​ខាត​នេះ​នៅ​ឡើយ​ទេ ប៉ុន្តែ​ការ​សង្គ្រោះ​បាន​ទាន់​ពេល​វេលា បើ​ទោះ​បី​ជា​ស្ថានភាព​ផ្លូវ​ចូល​ទៅ​កន្លែង កើត​ហេតុ​ហាក់​លំបាក​ក៏​ដោយ។

លោក ឃ្លាំង ហួត មាន​ប្រសាសន៍​ដូច្នេះ​ថា ៖ «បញ្ហា​ស្មុគស្មាញ​គឺ​គ្មាន​ផ្លូវ​ចូល​សម្រាប់​រថយន្ត​ពន្លត់​អគ្គីភ័យ​បាន​ទាន់​ពេល​វេលា បើ​សិន​ជា​មាន​ផ្លូវ​ស្រួល​បួល​ប្រហែល​ជា​ការ​ខូចខាត​មិន​ធ្ងន់ធ្ងរ​ដល់​កម្រិត​ហ្នឹង​ទេ។ ការ​សង្រ្គោះ​ឥឡូវ​នេះ តាំង​ពី​មាន​កំណែ​ទម្រង់​គឺ​យើង​ល្អ​ណាស់ កាល​ណា​ឆេះ​គឺ​យើង​ត្រូវ​អន្តរាគមន៍​ពន្លត់​ភ្លាម អត់​មាន​បញ្ហា​ទេ មិន​គិត​ថា ផ្ទះ​អ្នក​តូច អ្នក​ធំ អ្នក​ក្រ​ទេ កន្លែង​ណា​ដែល​ឆេះ​គឺ​យើង​ពន្លត់​ទាន់​ពេល​វេលា។ ដូច​ជា​ពេល​នេះ​អ៊ីចឹង បើ​សិន​ជា​យើង​មិន​យក​ចិត្ត​ទុក​ដាក់​ទេ ការ​ឆេះ​ហ្នឹង នឹង​រាល​ដាល​ធំ​ជាង​នេះ​ទៀត ដោយសារ​តំបន់​នេះ​ស្មុគស្មាញ ហើយ​ផ្ទះ​ជាប់​គ្នា»

ក្រុម​អាជ្ញាធរ​បាន​សំណូមពរ​ដល់​ប្រជាពលរដ្ឋ ឲ្យ​បង្កើន​ការ​ប្រុង​ប្រយ័ត្ន​ដោយសារ​តែ​រដូវ​ក្តៅ​ចូល​មក​ដល់ ខ្លាច​ក្រែង​មាន​អគ្គីភ័យ​កើត​ឡើង​ជា​យថា​ហេតុ​ដូច​នៅ​ពេល​នេះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។