ថ្លែងប្រាប់អ្នកយកព័ត៌មាននៅអគាររដ្ឋសភា នៅថ្ងៃទី១០ តុលា ដោយមានមេធាវីរបស់លោកម្នាក់ផងនោះ លោក តុ វ៉ាន់ចាន់ អតីតអ្នកតំណាំងរាស្ត្ររបស់គណបក្ស សម រង្ស៊ី បានថ្លែងទាំងទឹកមុខក្រៀមក្រំថា លោកប្រាថ្នាចង់អង្គុយចរចាជាមួយថ្នាក់ដឹកនាំបក្ស សម រង្ស៊ី ជាថ្មីម្ដងទៀត ដើម្បីឲ្យលោកបាននៅធ្វើការជាមួយបក្ស សម រង្ស៊ី បន្តទៅទៀត។
ក៏ប៉ុន្តែលោកថា បើសិនជាការចរចាមិនបានសម្រេច លោកនឹងយកជម្រើសចុងក្រោយ គឺដាក់ពាក្យបណ្ដឹងមេដឹកនាំបក្ស សម រង្ស៊ី ទៅតុលាការ ពីបទបណ្ដេញលោកចេញពីបក្សមិនយុត្តិធម៌៖ «ខ្ញុំមិនបានធ្វើសន្និសីទកាសែតនេះបម្រើនយោបាយបក្សណាទេ។ ខ្ញុំមិនបានក្បត់នឹងបក្សទេ ហើយខ្ញុំនៅមិនទាន់គិតថា ខ្ញុំនឹងទៅធ្វើនយោបាយនៅគណបក្សណាដែរ។ ប៉ុន្តែមកដល់ពេលនេះនេះខ្ញុំសុំជម្រាបថា ខ្ញុំសុំឲ្យគណបក្ស សម រង្ស៊ី ពិចារណាឡើងវិញ។ យើងអាចអង្គុយនិយាយគ្នា យើងអាចធ្វើការជាមួយគ្នា ដើម្បីប្រទេសជាតិរបស់យើង។ ក៏ប៉ុន្តែបើនៅរបៀបនេះទៀត ខ្ញុំត្រូវតែប្រព័ន្ធតុលាការ»។
កាលពីថ្ងៃទី៧ តុលា ឆ្នាំ២០១១ គណៈកម្មាធិការអចិន្ត្រៃយ៍បក្ស សម រង្ស៊ី បានសម្រេចលប់ឈ្មោះមន្ត្រីជាន់ខ្ពស់បក្សពីររូប គឺលោក វ៉ាន់ ស៊ីវឿន ជាសមាជិកព្រឹទ្ធសភា លោក តុ វ៉ាន់ចាន់ អ្នកតំណាំងរាស្ត្រ ខេត្តតាកែវ និងលោក ហុក លីហាក់ ជាមន្ត្រីបក្សថ្នាក់ស្រុក និងបានព្យួរដំណែងបក្សថ្នាក់ស្រុក ៤នាក់ទៀត ដោយចោទថា ក្រុមមន្ត្រីទាំងនោះមិនបានធ្វើការងារបម្រើបក្ស។
ទាក់ទងបណ្ដឹងទៅតុលាការ លោក ពេជ្រ សម្បត្តិ មេធាវីរបស់លោក តុ វ៉ាន់ចាន់ មានប្រសាសន៍ប្រាប់អ្នកកាសែតថា លោកកំពុងសិក្សាមើលអំពីបទដែលត្រូវចោទថ្នាក់ដឹកនាំបក្ស សម រង្ស៊ី ក៏ប៉ុន្តែ លោកបានបង្ហើបថា នៅពេលនេះបណ្ដឹងអាចទាក់ទងរឿងវិវាទការងារដែលមិនមានទម្ងន់ទោសធ្ងន់ធ្ងរនោះទេ បើសិនជាភាគីចុងចោទមានកំហុសដូចដើមបណ្ដឹងចោទប្រកាន់មែននោះ។
លោកបន្ថែម៖ «ខ្ញុំសព្វថ្ងៃនេះកំពុងសិក្សារកវិធីដែលត្រូវដើរទៅផ្លូវណា តាមតុលាការហ្នឹង ដើម្បីបង្ហាញថា ភាពមិនយុត្តិធម៌វាមានមែននៅក្នុងសេចក្ដីសម្រេចរបស់គណៈអចិន្ត្រៃយ៍បក្ស សម រង្ស៊ី»។
យ៉ាងណាក្ដី លោក យឹម សុវណ្ណ មន្ត្រីបក្ស សម រង្ស៊ី ថ្លែងថា សំណើរបស់លោក តុ វ៉ាន់ចាន់ ដែលសុំចរចាបន្តធ្វើការជាមួយបក្សបន្តទៅទៀតនោះ គឺហួសពេលហើយ ៖ «មកដល់ពេលនេះសេចក្ដីសម្រេចរបស់គណៈអចិន្ត្រៃយ៍ហ្នឹងចូលជាធរមានហើយ។ កាលធ្វើសេចក្ដីសម្រេចហ្នឹងយើងបានពិភាក្សាគ្នាយ៉ាងល្អិតល្អន់ ផ្ទៃក្នុងបក្សហើយ ជាពិសេសគណៈអចិន្ត្រៃយ៍ដែលជាស្ថាប័នកំពូលរបស់បក្ស»។
មន្ត្រីពីររួបទៀត គឺលោក វ៉ាន់ ស៊ីវឿន ជាសមាជិកព្រឹទ្ធសភា និងលោក ហុក លីហាក់ មន្ត្រីបក្សថ្នាក់ស្រុកដែលគណៈអចិន្ត្រៃយ៍បក្ស សម រង្ស៊ី លប់ឈ្មោះចេញនោះ មិនបានតវ៉ាទេ។
លោក វ៉ាន់ ស៊ីវឿន ថ្លែងថា លោកកំពុងពិចារណាថា តើបន្តអាជីពនយោបាយបន្តទៅទៀតជាមួយបក្សសិទ្ធិមនុស្ស ឬយ៉ាងណា នៅពេលដែលលោក ហុក លីហាក់ បានប្រកាសភ្លាមៗថា លោកនឹងទៅចូលបក្សសិទ្ធិមនុស្ស៕