តំណាងប្រជាពលរដ្ឋជាង ២០០គ្រួសារដែលទទួលរងនូវគ្រោះអគ្គីភ័យកាលពីពេលថ្មីៗនេះនៅសង្កាត់បឹងកក់២ ខណ្ឌទួលគោក រាជធានីភ្នំពេញ បានបន្តបើកកិច្ចប្រជុំពិភាក្សាជាមួយអាជ្ញាធរក្នុងការសម្រេចចិត្តរៀបចំទីតាំងសាងលំនៅឋានឡើងវិញ នៅថ្ងៃអង្គារ ទី១៦ មីនា បន្ទាប់ពីពួកគេមានគណៈកម្មការជាតំណាងប្រជាពលរដ្ឋរួចហើយនោះ។
ប្រជាពលរដ្ឋភាគច្រើនបានឲ្យដឹងថា បច្ចុប្បន្នពួកគេមានបញ្ហាពីរជាភាពស្មុគស្មាញក្នុងការសម្រេចចិត្ត។ ទីមួយ អាជ្ញាធរអនុញ្ញាតឲ្យសាងសង់នៅនឹងកន្លែងដើម ប៉ុន្តែទីតាំងត្រូវរួមតូចជាងមុនព្រោះអាជ្ញាធរត្រូវកាត់ដីចេញពីរបងវត្តនាគវ័ន្តចំនួន ៣ម៉ែត្រ និងកាត់ចេញពីផ្លូវរទេះភ្លើងចំនួន ១០ម៉ែត្រ ព្រមទាំងផ្លូវចេញចូលក្នុងភូមិមួយចំនួនទៀត។ ចំពោះជម្រើសទីពីរ គឺប្ដូរទីតាំងថ្មីដែលស្ថិតនៅក្រៅក្រុង ដែលធ្វើឲ្យមានការបារម្ភពីការរស់នៅឆ្ងាយពីក្រុង ពុំសាលារៀន ទីផ្សារ និងបញ្ហាទឹកភ្លើងជាដើម។
អ្នកស្រី គិត សៀងហៃ មានប្រសាសន៍បញ្ជាក់យ៉ាងដូច្នេះ ៖ «បើសិនជានៅហ្នឹងវាដល់ ២៥៧គ្រួសារ ទាល់តែរំលែកជា ២៥៧គ្រួសារ បាននៅកើត។ បើសិនជាឲ្យតាមចំនួនក្នុងផ្ទះ នៅអត់កើតទេ! ព្រោះប្រជាជនច្រើន គាត់មានកូនច្រើន ហើយបើសិនជាគុណទូទាត់ទៅបានតែ ៤-៥ម៉ែត្រហ្នឹង នៅយ៉ាងម៉េចទៅ? នៅគរជើងគ្នា! ខ្ញុំក៏អត់ទាន់ហ៊ានថា ជម្រើសនឹងយកដីខាងក្រៅដែរ ចាំមើលសិន!»។
បុរសម្នាក់ទៀតដែលផ្ទះលោកត្រូវភ្លើងឆេះខ្ទេចដែរនោះ លោក ឈីវ នេត បានបន្ថែមថា ៖ «ចំពោះខ្ញុំវិញ វាគួរតែយើងរៀបឲ្យមានកន្លែងណាមួយឲ្យច្បាស់លាស់នោះណា៎! បើ សិនជានៅត្រង់នេះ យើងមើលទៅឃើញលំបាក បើទុកផ្លូវទុកអីទៅ អស់រលីងហើយ ខ្ញុំថា វាអត់លំនឹង!»។
បញ្ហាទាំងនេះត្រូវបានប្រជាពលរដ្ឋអ្នករងគ្រោះដោយភ្លើងឆេះផ្ទះបានលើកទៅពិចារណាជាមួយអាជ្ញាធរអស់រយៈពេលចំនួន ២ថ្ងៃមកហើយ។
អ្នកស្រី គិត សៀងហៃ បញ្ជាក់ថា កិច្ចប្រជុំចុងក្រោយនៅថ្ងៃអង្គារ ទី១៦ មីនា ប្រជាពលរដ្ឋអ្នកចូលរួមភាគច្រើនបានសម្រេចចិត្តរស់នៅកន្លែងចាស់ដដែល ប៉ុន្តែនៅតែមានការខ្វែងគំនិតគ្នានៅឡើយរវាងអ្នកមានផ្ទះលើចំណីផ្លូវដែលត្រូវកាត់ចេញ និងអ្នកដែលធ្លាប់មានផ្ទះនិងដីធំត្រូវកាត់ចែករំលែកគ្នាខ្លះ។
អ្នកស្រី គិត សៀងហៃ បានឲ្យដឹងថា ៖ «យល់ព្រម អ្នកខ្លះគាត់អត់យល់ព្រមទេ ហើយខ្ញុំជឿថា អ្នកអត់យល់ព្រមច្រើនណាស់។ ប្រជាជននៅខាងក្រោយគាត់ថា បើកាត់ដីឲ្យគាត់ទៅនៅឯណា? ហើយបើសិនជាប្រជាជនខាងក្រោយហ្នឹងគាត់ថា បើកាត់ដីហើយគាត់អត់ឲ្យអ្នកមុខមកនៅក្រោយទេ គាត់ដឹងតែទំហំរបស់គាត់។ ឥឡូវមានការឈ្លោះប្រកែកគ្នាច្រើនណាស់ ហើយណាមួយគណៈកម្មការទាំង ១០ហ្នឹងប្រហែលជាបរាជ័យហើយ អត់ទៅមុខរួចទេ!»។
អភិបាលរងខណ្ឌទួលគោក និងជាប្រធានគណៈកម្មការរៀបចំលំនៅស្ថានប្រជាពលរដ្ឋឡើងវិញ គឺលោក ធឹម សំអាន មានប្រសាសន៍បញ្ជាក់ថា លោកនឹងអនុវត្តតាមមតិប្រជាពលរដ្ឋភាគច្រើន គឺបែងចែកដីនូវទំហំប្រហាក់ប្រហែលគ្នាតាមប្លង់ត្រឹមត្រូវ។
លោក ធឹម សំអាន បានបញ្ជាក់ថា ៖ «បងប្អូនប្រជាពលរដ្ឋលោកគួរតែសហការចូលរួម ហើយគួរតែមានឆន្ទៈ។ ចង់ជួយគ្នាឲ្យបានរស់នៅកន្លែងហ្នឹង បានយើងធ្វើអ៊ីចឹង។ ដល់ធ្វើអ៊ីចឹង មតិភាគច្រើនគឺគេគាំទ្រឲ្យធ្វើអ៊ីចឹង ហើយមតិតិចណាស់ដែលគាត់មានគំនិតអ៊ីចឹងណា៎!»។
លោកបញ្ជាក់ថា នៅថ្ងៃទី១៧ មីនា អាជ្ញាធរនិងគណៈកម្មការលោកនឹងចុះវាស់វែងកំណត់ធ្វើប្លង់ផ្ទះថ្មីហើយ។ បច្ចុប្បន្នប្រជាពលរដ្ឋដែលរងគ្រោះដោយអគ្គីភ័យបន្តរស់នៅក្រោមដំបូលតង់បណ្ដោះអាសន្ននៅឡើយ ដោយរង់ចាំការសម្រេចពីអាជ្ញាធររៀបចំប្លង់សង់ផ្ទះថ្មីតាមការកំណត់របស់អាជ្ញាធរ៕