តំណាងប្រជាសហគមន៍នេសាទទាំង១០៩គ្រួសារ គឺលោក ជូ គឹមសឿង មានប្រសាសន៍ប្រាប់វិទ្យុអាស៊ីសេរីនៅរសៀលថ្ងៃទី១០ មីនា ថា ប្រធានសហគមន៍នេសាទភូមិតាដោក គឺលោក យឹម សំអុល បានក្បត់នឹងប្រជាសហគមន៍ ដោយបានលក់ដែននេសាទសហគមន៍ទៅឲ្យឈ្មួញ ដើម្បីផលប្រយោជន៍បក្សពួកមួយក្រុមតូច ដែលក្នុងនោះរួមមានអាជ្ញាធរភូមិផងដែរ។
លោក ជូ គឹមសឿង បានឲ្យដឹងដូច្នេះ ៖ «សហគមន៍នេសាទឡូត៍ហ្នឹងកាត់ឲ្យរាស្រ្ដរកធ្វើ ប៉ុន្តែរាស្រ្ដលោកមិនបានរកទេ គាត់ទៅជាហៅទូកនាម ទូកម៉ាញ់អីមករក គ្របដាច់អស់ហើយមងរាស្រ្ដ។ ទូកមួយក្បាល៣ទៅ៥ម៉ឺនរៀល»។
ប្រជាសហគមន៍នេសាទម្នាក់ទៀតបន្ថែមថា ៖ «ឡូត៍ហ្នឹងកាត់ឲ្យរាស្រ្ដរក ដល់ពេលមិនឲ្យរាស្រ្ដរកបែរជាឲ្យពួកមង... ចៃរ៉ាអីមករកពេញទឹកពេញដី ហើយក៏ប្រជាជនមករកដាក់មងដាក់អីមិនបាន»។
ប្រធានសហគមន៍នេសាទភូមិតាដោក គឺលោក យឹម សំអុល បដិសេធការចោទប្រកាន់នេះ។ លោកថា ពុំមានបញ្ហានេះកើតឡើងទេនៅក្នុងសហគមន៍នេសាទនេះ៖ «អត់ទេ អត់មានទេ។ ខាងគណៈកម្មការខ្ញុំទាំង១១នាក់ហ្នឹង អត់មាននរណាមួយទៅធ្វើខុសពីលក្ខខណ្ឌនៃច្បាប់របស់សហគមន៍ទេ អត់មានទេ។ ប៉ុន្តែបើប្រជាពលរដ្ឋគាត់ចោទប្រកាន់ខ្ញុំដោយប្រការណាមួយក៏មិនដឹងដែរ។ បើបងចង់ដឹងពីករណីហ្នឹងច្បាស់ បងអញ្ជើញចុះមកអង្កេតតាមដានមើលមើល៍»។
ប្រធានភូមិតាដោក គឺលោក ម៉ុល សុខុន ក៏បដិសេធការចោទប្រកាន់នេះដែរ ព្រមទាំងបានជំរុញឲ្យសួរទៅលោកមេឃុំចំពោះបញ្ហានេះ ៖ «ទេអត់ផង បើថា ការពារមាន បើថាឲ្យទៅលក់ទៅដូរដូចអត់មាន។ សួរលោកមេឃុំគាត់អ្នកទទួលខុសត្រូវគាត់ដឹងហើយ ព្រោះការងារធ្វើអីសុទ្ធតែប្រាប់គាត់ទាំងអស់»។
មេឃុំប្រឡាយមាស ពន្យល់ចំពោះបញ្ហាខាងលើនេះថា ក្នុងនាមលោកជាអាជ្ញាធរដែនដីនិងជាសាក្សីក្នុងការអនុញ្ញាតបង្កើតសហគមន៍ លោកសូមអះអាងថា ពុំមានការលក់ដូរដែននេសាទសហគមន៍ភូមិតាដោកទេ។ តែលោកទទួលស្គាល់ថា អាចមានការនេសាទដោយបំពានពីសំណាក់សមាជិកគណៈកម្មការសហគមន៍។
លោកមេឃុំប្រឡាយមាស ពន្យល់ដូច្នេះ ៖ «រឿងហ្នឹងគ្រាន់តែឮទេ តាមពិតគ្នាអត់ហ៊ានធ្វើអីអ៊ីចឹងទេ។ វាគ្រាន់តែអ៊ីចេះ ឧទាហរណ៍ដាក់ទិសឲ្យអ្នកមើលថែទាំអ៊ីចឹងទៅ ហើយគ្នាមើលថែទាំគ្នារកបន្តិចបន្តួច បើឲ្យគ្នាទៅថែមិនឲ្យគ្នារកគ្នាបានអីរស់? រឿងមានតែប៉ុណ្ណឹងទេ រឿងលក់ដូរដាច់អីគ្មានទេ លក្ខន្តិកៈមានត្រឹមត្រូវ»។
វិទ្យុអាស៊ីសេរីមិនអាចសុំការពន្យល់ករណីខាងលើនេះពីនាយខណ្ឌរដ្ឋបាលជលផលខេត្តកំពង់ឆ្នាំងបានទេនៅល្ងាចថ្ងៃទី១០ មីនានេះ ដោយលោកឆ្លើយថា ជាប់រវល់ប្រជុំ។ ប៉ុន្តែបើតាមកិច្ចព្រមព្រៀង កន្លែងនេសាទសហគមន៍បានចែងថា រដ្ឋបាលជលផលមានសិទ្ធិដកហូតដែននេសាទសហគមន៍វិញក្នុងករណីដែលសហគមន៍នេសាទនោះមិនគោរពតាមកិច្ចព្រមព្រៀងដោយធ្វើសកម្មភាពដែលបង្កឲ្យខូចដែននេសាទឬធ្វើឲ្យមានគ្រោះថ្នាក់ដល់ធនធានជលផល៕