អភិបាលស្រុកត្បែងមានជ័យ លោក តូច វង្ស បានមានប្រសាសន៍ឲ្យដឹងកាលពីព្រឹកថ្ងៃព្រហស្បតិ៍ ទី២ ខែតុលា ថា ទឹកជំនន់បានស្រកចុះនៅក្នុងភូមិសាស្រ្ដស្រុករបស់លោក ក៏ប៉ុន្តែបានបំផ្លាញសន្ទូងរបស់ប្រជាពលរដ្ឋជាង១៤០ហិកតារ និងបំផ្លាញដំណាំនៅក្នុងចម្ការប្រមាណ១៦ហិកតារផ្សេងទៀត។
លោក តូច វង្ស បានឲ្យដឹងថា ៖ «ទឹកស្រកហើយ បណ្ដោះអាសន្នវាប្រហែល១៤៣ហិកតារកន្លះ និងចម្ការ១៦ហិកតារ ផ្ទះសម្បែងអត់មានអីទេធម្មតា»។
ទោះយ៉ាងណារហូតមកដល់ថ្ងៃព្រហស្បតិ៍នេះ មន្រ្តីមន្ទីរកសិកម្មខេត្តព្រះវិហារនៅមិនទាន់បានបង្ហាញតួលេខការខូចខាតពីស្រុកទាំង៤ដែលរងទឹកជំនន់បាននៅឡើយទេ ដោយសារតែស្រុកខ្លះទឹកមិនទាន់ស្រកចុះដល់កម្រិតត្រួតពិនិត្យបាន។
ប្រធានការិយាល័យក្សេត្រនៃមន្ទីរកសិកម្មខេត្តព្រះវិហារ លោក កូវ ប៊ុណ្ណា បានប្រសាសន៍ថា លោកបានដឹងថាមានកុមារម្នាក់នៅស្រុកត្បែងមានជ័យបានស្លាប់ដោយសារលក់ទឹក ចំណែកស្រូវសន្ទូងដែលនឹងរងការខូចខាត លោកមិនទាន់ដឹងច្បាស់លាស់នៅឡើយដោយសារស្រុកខ្លះទឹកមិនទាន់ស្រកអស់។
លោក កូវ ប៊ុណ្ណា បានឲ្យដឹងថា ៖ «ក្មេងម្នាក់លង់ទឹកស្លាប់នៅស្រុកត្បែងមានជ័យ ទីរួមខេត្ត។ លិចសរុប១៣២០ហិកតារ ប៉ុន្តែឥឡូវ៦១៧ហិកតារនៅខាងគូលែនស្រកផុតទៅហើយ ហើយអត់មានការខូចខាតអីទេ ប៉ុន្តែនៅទទួលព័ត៌មានមិនទាន់បានពីស្រុកជ័យសែន ជាំក្សាន្ត ហើយត្បែងមានជ័យ ព្រោះទឹកមិនទាន់ស្រកផុត អត់ទាន់ដឹងផលខូចខាតប៉ុន្មានទេ»។
ចំណែកអនុប្រធានមន្ទីរសុខាភិបាលខេត្តព្រះវិហារ លោក យឹម សុងកន បានមានប្រសាសន៍ថា បន្ទាប់ពីមានទឹកជំនន់មក នៅស្ទើរតែគ្រប់ស្រុកជំងឺរាកបានកើនឡើង ក៏ប៉ុន្តែតួលេខមិនមានកម្រិតខ្ពស់ឆ្ងាយជាងធម្មតាប៉ុន្មានទេ។ ហើយភ្នាក់ងារសុខាភិបាលកំពុងត្រៀមលក្ខណៈជាស្រេចក្នុងការព្យាបាល។
លោក យឹម សុងកន បានបញ្ជាក់ថា ៖ «ជំងឺរាកតាមមណ្ឌល រាយការណ៍រាល់អាទិត្យមក វាគ្រាន់តែមានកើនជាងចំនួនធម្មតាតិចតួច ប្រហែលជាក្នុងខ្ទង់ ១%។ យើងបានត្រៀមហើយនៅតាមមណ្ឌល បើសិនជាសភាពការណ៍ទប់អត់ជាប់ទេ យើងនឹងអន្តរាគមន៍ពីខេត្តមកទៀត»។
តាមប្រធានមន្ទីរធនធានទឹកនិងឧតុនិយមខេត្តព្រះវិហារ លោក ជា មុន្នីវិសិដ្ឋ បានមានប្រសាសន៍ថា ទឹកជំនន់ដែលកាលពីប៉ុន្មានថ្ងៃមុននៅតាមដងស្ទឹងមានកម្ពស់១,៧០ម៉ែត្របានថយចុះមកនៅកម្ពស់លើមាត់ស្ទឹងប្រហែលជា០,៨០ម៉ែត្រប៉ុណ្ណោះក្នុងថ្ងៃព្រហស្បតិ៍នេះ។
លោក ជា មុន្នីវិសិដ្ឋ បានឲ្យដឹងថា ៖ «ទឹកមកវាស្រករហូត ឥឡូវហ្នឹងទឹកហួសនៅមាត់ស្ទឹងយើង វាស្រកប្រហែលជា៨តឹកទៀតទេ»។
មន្រ្តីខេត្តព្រះវិហារបានឲ្យដឹងថា ចាប់តាំងតែពីថ្ងៃទី១៧ ខែកញ្ញាមក ទឹកជំនន់បណ្ដាលមកពីភ្លៀងខ្លាំងបានជន់លិចស្រុកចំនួន៤ គឺស្រុកត្បែងមានជ័យ ស្រុកជាំក្សាន្ត ស្រុកជ័យសែន និងស្រុកគូលែន៕