ក្រុមហ៊ុនប្រេងបរទេសពីរ គឺក្រុមហ៊ុនប្រេងតូតាល់ និងក្រុមហ៊ុនប្រេងកាល់តិច បានបញ្ចុះតម្លៃប្រេង ២០០រៀល ក្នុងមួយលីត្រ ដែលការបញ្ចុះតម្លៃទាំងប្រេងសាំងនិងប្រេងម៉ាស៊ូតនេះគឺចាប់អនុវត្តនៅម៉ោង១ រសៀលថ្ងៃអង្គារនេះ។
កាលពីនៅថ្ងៃច័ន្ទ គឺមានក្រុមហ៊ុនក្នុងស្រុកពីបានយល់ព្រមបញ្ចុះតម្លៃប្រេងភ្លាមៗ ក្នុងមួយលីត្រ ២០០រៀល តបតាមការថ្លែងអំពាវនាវរបស់លោកនាយករដ្ឋមន្ត្រី ហ៊ុន សែន កាលពីថ្ងៃច័ន្ទ។
យោងតាមតារាងតម្លៃប្រេងនៅតាមស្ថានីយប្រេងកាល់តិច សូគីម៉ិច និង តេលា គឺស្ថានីយប្រេងចំនួន៣ បានលក់ប្រេងក្នុងតម្លៃស្មើគ្នា ដែលប្រេងម៉ាស៊ូត តម្លៃ ៣៦០០រៀលក្នុងមួយលីត្រ ប្រេងសាំងធម្មតាក្នុងមួយលីត្រតម្លៃ ៣៧០០រៀល និងប្រេងសាំងស៊ូពែក្នុងមួយលីត្រតម្លៃ ៣៨០០។ ក៏ប៉ុន្តែ ស្ថានីយប្រេងតូតាល់ តម្លៃប្រេងទាបបំផុតក្នុងមួយលីត្រគឺ ៣៦៥០រៀល និងខ្ពស់បំផុតគឺ ៣៨៥០រៀល គឺថ្លៃជាងបណ្តាស្ថានីយប្រេងនានាចំនួន៥០រៀលក្នុងមួយលីត្រ។
អ្នកសេដ្ឋកិច្ច គឺ លោក ច័ន្ទ សុផល បានថ្លែងថា ការឡើងថ្លៃប្រេងកន្លងមក បាននាំឲ្យតម្លៃទំនិញនានាឡើងថ្លៃតាមដែរ។ ក៏ប៉ុន្តែនៅពេលនេះ តម្លៃទំនិញនិងចំណីអាហារនៅកម្ពុជា នៅមិនទាន់ចុះថ្លៃនៅឡើយទេ៕