តំបន់កម្សាន្តកោះពេជ្រដែលមានមនុស្សស្លាប់ និងរបួសជិត ១ពាន់នាក់ នៅរាត្រីថ្ងៃទី២២ ខែវិច្ឆិកា ដើមឡើយមានប្រជាពលរដ្ឋនិយមហៅតំបន់នេះថា ជាតំបន់កោះឃ្លង់។ តំបន់នេះពលរដ្ឋអះអាងថា ពួកគាត់បានមករស់នៅតាំងពីឆ្នាំ១៩៨២ ដោយមានប្រជាពលរដ្ឋសរុបជាង ៣០០គ្រួសារ។ ប៉ុន្តែចន្លោះពីឆ្នាំ២០០២ ដល់ឆ្នាំ២០០៥ ត្រូវបានអាជ្ញាធរក្រុងភ្នំពេញ ជម្លៀសឲ្យចាកចេញទៅរស់នៅទីតាំងថ្មីទាំងបង្ខំក្រោមរូបភាពរដ្ឋាភិបាលយកដីធ្វើការអភិវឌ្ឍន៍។
ស្ត្រីវ័យចំណាស់ម្នាក់ ជាអតីតអ្នកភូមិរស់នៅតំបន់កោះពេជ្រ មានប្រសាសន៍មិនបញ្ចេញឈ្មោះឲ្យវិទ្យុអាស៊ីសេរីដឹងនៅថ្ងៃទី២៤ ខែវិច្ឆិកាថា ចន្លោះឆ្នាំ២០០២ ដល់ឆ្នាំ២០០៥ គឺជាឆ្នាំដែលពលរដ្ឋនៅក្នុងសហគមន៍កោះពេជ្ររងទុក្ខ និងបង្ហូរទឹកភ្នែកស្ទើររៀងរាល់ថ្ងៃ ដោយសារអាជ្ញាធរបង្ខំឲ្យចាកចេញពីលំនៅឋានធ្លាប់រស់នៅដោយពុំមានសំណងសមរម្យ។
ស្ត្រីរូបនេះបន្តថា ផ្ដើមពីការបណ្ដេញនេះ ប្រជាពលរដ្ឋពួកគាត់ធ្លាប់បានដាក់បណ្ដាសាទៅអាជ្ញាធរ និងក្រុមហ៊ុនវិនិយោគតំបន់នេះ មិនឲ្យមានដំណើរការរលូនទៅមុខឡើយ ព្រោះថា គម្រោងអភិវឌ្ឍន៍តំបន់កោះពេជ្រនេះ បានធ្វើឲ្យពលរដ្ឋរាប់រយគ្រួសារមានទុក្ខព្រួយពីគម្រោងអភិវឌ្ឍន៍នេះ។
បុរសម្នាក់ទៀតឈ្មោះ ហ៊ុន សំណាង មានប្រសាសន៍ថា ដីសម្រាប់សង់លំនៅឋាន និងដីចម្ការធ្លាប់បង្កបង្កើនផលរបស់គ្រួសារគាត់តាំងពីឆ្នាំ១៩៨២ មកនោះ ត្រូវបាត់បង់ដោយសារអាជ្ញាធរក្រុងភ្នំពេញតម្រូវឲ្យរុះរើចេញ ហើយមិនឲ្យតវ៉ាពីសំណងនោះទេ។ លោកថា ដោយសារតែគ្រួសារគាត់គ្មានជម្រើស ក៏សុខចិត្តទទួលយកសំណងពីរដ្ឋាភិបាលចំនួនត្រឹមតែ ៨ពាន់ដុល្លារអាមេរិក។
លោក ហ៊ុន សំណាង បន្តថា បើរំឭកដល់ដីលំនៅឋានធ្លាប់រស់នៅក្នុងតំបន់កោះពេជ្រ រូបលោកមានការសោកស្ដាយបំផុត ដែលប្រជាពលរដ្ឋរស់នៅតំបន់នេះត្រូវបានអាជ្ញាធរបង្ខំឲ្យរុះរើ ដោយលើកហេតុផលយកដីតំបន់នេះវិនិយោគឲ្យក្រុមហ៊ុនធ្វើការអភិវឌ្ឍន៍នោះ។
បុរសរូបនេះបានថ្លែងថា ចំពោះការបណ្ដេញពលរដ្ឋចេញពីតំបន់នេះ គ្រួសារគាត់ ក៏ដូចជាពលរដ្ឋដទៃទៀត ធ្លាប់បានបួងសួងដល់វត្ថុសក្ដិសិទ្ធិ និងម្ចាស់ទឹកម្ចាស់ថែរក្សាដីតំបន់កោះពេជ្រ ឲ្យផ្ដន្ទាទោសចំពោះអ្នកបណ្ដេញ និងបួងសួងឲ្យជួយផ្ដល់យុត្តិធម៌ដល់ពលរដ្ឋពីការបណ្ដេញនេះ។ តែក៏មិនដែលបន់ឲ្យប្រជាពលរដ្ឋស្លូតត្រង់ដទៃទៀតស្លាប់ ដោយសារមកកម្សាន្តនៅតំបន់ទឹកដីកោះពេជ្រនេះដែរ។
លោក សៅ ហាក់ ប្រជាពលរដ្ឋរស់នៅតំបន់កោះពេជ្រ មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី២៤ ខែវិច្ឆិកាថា លំនៅឋាន និងដីជាង ២ហិកតារបស់គ្រួសារគាត់ក្នុងតំបន់កោះពេជ្រ ត្រូវបានអាជ្ញាធររុះរើ និងរឹបអូស ក្រោមរូបភាពយកដីអភិវឌ្ឍន៍ទាំងមិនបានផ្ដល់សំណងសមរម្យជូនគ្រួសារគាត់ឡើយ។ ពលរដ្ឋរូបនេះបន្តថា ករណីរុះរើលំនៅឋាន និងការទន្ទ្រានយកដីធ្លាប់បង្កបង្កើនផល រូបលោកបានដាក់ពាក្យបណ្ដឹងទៅកាន់តុលាការ ប៉ុន្តែនៅទីបំផុតតុលាការកំពូល កាលពីថ្ងៃទី០៦ ខែសីហា ឆ្នាំ២០១០ បានប្រកាសសាលក្រមឲ្យគ្រួសារគាត់ទទួលបានសំណងត្រឹមតែជាង ៦ដុល្លារ ក្នុងដី ១ម៉ែត្រការ៉េ ដែលកាលពីឆ្នាំ២០០៤ ដីនៅតំបន់នោះមានតម្លៃជាង ២០ដុល្លារក្នុង១ម៉ែត្រការ៉េ។
លោកបានថ្លែងថា វាអយុត្តិធម៌បំផុតសម្រាប់ពលរដ្ឋរស់នៅក្នុងសហគមន៍មួយនេះ ដែលត្រូវបណ្ដេញ ហើយបែរជាយកដីតំបន់នោះយកទៅផ្ដល់ជូនក្រុមហ៊ុនធ្វើជាកម្មសិទ្ធិ ប៉ុន្តែបែរជាបណ្ដេញពលរដ្ឋធ្លាប់រស់នៅតំបន់នេះឲ្យចាកចេញទាំងបង្ខំទៅវិញ។
លោក ម៉ន វុទ្ធី មន្ត្រីមជ្ឈមណ្ឌលអប់រំច្បាប់សម្រាប់សហគមន៍ ដែលបានជួយពលរដ្ឋតំបន់កោះពេជ្រពីការជម្លៀស មានប្រសាសន៍ថា ការជម្លៀសពលរដ្ឋរបស់រដ្ឋាភិបាលចេញពីតំបន់កោះពេជ្រកន្លងមក គឺអយុត្តិធម៌បំផុតសម្រាប់ពលរដ្ឋ ដោយរដ្ឋាភិបាលបានផ្ដល់សំណងជូនពលរដ្ឋក្នុងដី១ម៉ែត្រការ៉េចំនួន ១ដុល្លារកន្លះ។ ប៉ុន្តែនៅគ្រាមានការតវ៉ាពីប្រជាពលរដ្ឋ ទើបក្រុមហ៊ុន និងអាជ្ញាធរដំឡើងដល់ ៦,៧៥ដុល្លារក្នុង ១ម៉ែត្រការ៉េ។
វិទ្យុអាស៊ីសេរីមិនអាចទាក់ទងលោក ពុង ខៀវសែ អគ្គនាយកក្រុមហ៊ុន Oversea Cambodian Investment Cooperation (OCIC) ដែលបានទទួលសិទ្ធិអភិវឌ្ឍន៍មជ្ឈមណ្ឌលកម្សាន្តកោះពេជ្របានទេ នៅរសៀលថ្ងៃទី២៤ ខែវិច្ឆិកា ដោយជំនួយការរបស់លោកបានប្រាប់ថា ជាប់រវល់ប្រជុំ។ យ៉ាងនេះក្តី ជំនួយការអគ្គនាយកក្រុមហ៊ុន OCIC មានប្រសាសន៍ថា តំបន់កោះពេជ្របច្ចុប្បន្ន គឺបានអភិវឌ្ឍជាមជ្ឈមណ្ឌលតាំងពិព័រណ៍សម្រាប់លក់ផលិតផលទាំងក្នុង និងក្រៅប្រទេស ព្រមទាំងអភិវឌ្ឍឲ្យមានកន្លែងកម្សាន្តមួយចំនួនផងដែរ ប៉ុន្តែមិនទាន់បានសាងសង់ជាអគារទំនើបមានច្រើនជាន់ ឬជាសណ្ឋាគារទំនើបនៅឡើយទេ។
ទាក់ទងការអភិវឌ្ឍតំបន់កោះពេជ្រនេះដែរ លោកនាយករដ្ឋមន្ត្រី ហ៊ុន សែន ធ្លាប់បានស្នើឲ្យអ្នកវិនិយោគទាំងអស់ ឲ្យគិតគូរសាងសង់អគារទំនើបមានកម្ពស់ ៥៥៥ម៉ែត្រ ជាប្រភេទអគារទំនើបខ្ពស់ជាងគេនៅតំបន់អាស៊ី ដែលគ្រោងសាងសង់នៅតំបន់កម្សាន្តកោះពេជ្រនេះ។
សេចក្ដីសម្រេចរបស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២៥ ខែមិថុនា ឆ្នាំ២០០៤ បានផ្ដល់សិទ្ធិឲ្យក្រុមហ៊ុនធនាគារកាណាឌីយ៉ា ដែលមានដៃគូអភិវឌ្ឍន៍មកពីក្រៅប្រទេសឈ្មោះ Oversea Cambodian Investment Cooperation ឬហៅកាត់ថា (OCIC) ធ្វើការវិនិយោគដើម្បីអភិវឌ្ឍប្រែក្លាយតំបន់កោះពេជ្រទៅជាក្រុងរណប។ តំបន់កោះពេជ្រមានទីតាំងនៅជាប់ទន្លេបាសាក់ ស្ថិតក្នុងសង្កាត់ទន្លេបាសាក់ ខណ្ឌចំការមន ក្រុងភ្នំពេញ៕