នៅថ្ងៃចុងសប្ដាហ៍នេះ លោក សម រង្ស៊ី ប្រធានគណបក្ស សម រង្ស៊ី និងលោក ស៊ាន ប៉េងសែ ប្រធានគណៈកម្មាធិការព្រំដែនកម្ពុជា ដែលមានទីស្នាក់ការនៅប្រទេសបារាំង បានចូលរួមក្នុងវេទិកាសមាជិកនៃសាខាគណបក្ស សម រង្ស៊ី ដែលគេរៀបចំឡើងនៅទីក្រុងម៉ុងរ៉េអាល់នៃប្រទេសកាណាដា នៅថ្ងៃទី៥ ខែមិថុនានេះ ដើម្បីថ្លែងបំភ្លឺអំពីបញ្ហាបច្ចេកទេស និងបញ្ហាវិបត្តិនៃការដែលអាជ្ញាធរនៃភាគីរដ្ឋាភិបាលកម្ពុជា និងវៀតណាម បាននាំគ្នាបោះបង្គោលព្រំដែនរវាងប្រទេសទាំងពីរ ធ្វើឲ្យប៉ះពាល់លើដីស្រែចម្ការរបស់ប្រជាកសិករខ្មែរ នៅខេត្តស្វាយរៀង ខេត្តតាកែវ និងនៅតាមបណ្ដាខេត្តខ្មែរមួយចំនួនទៀត ដែលជាប់នឹងព្រំដែន។
លោក ជា សុភ័ណ ពិធីកររៀបចំកិច្ចប្រជុំ មានប្រសាសន៍ឲ្យវិទ្យុអាស៊ីសេរីដឹងថា ៖ «...លើកនេះខ្ញុំដឹងថា សន្ទុះហ្នឹងច្រើន ហើយសឹងតែរកកន្លែងអង្គុយគ្មានទេ! មានតែ ៣០០(នាក់)លើស! ព្រោះទី១ គេមកចង់ដឹងការពិតពីរឿងព្រំប្រទល់ ដែលលោក ស៊ាន ប៉េងសែ គាត់យកស្អីមកបញ្ចាំងឲ្យមើល ហើយចាំស្ដាប់ពាក្យគាត់និយាយយ៉ាងម៉េច ហើយលោក រង្ស៊ី គាត់ថាជារឿងទឹកចុងក្រោយដែលគាត់ត្រូវប្រយុទ្ធ! បើប្រយុទ្ធមិនឈ្នះទេ បងប្អូននឹងក្លាយទៅជា ហៅថា ខ្មែរភាវូបនីយកម្មវៀតណាម ឬក៏ខ្មែរភាវូបនីយកម្មយួន ខ្មែរក្លាយទៅជាយួន!»។
កិច្ចប្រជុំនៅប្រទេសកាណាដានេះ ជាផ្នែកមួយនៃដំណើរទស្សនកិច្ចរបស់លោក សម រង្ស៊ី និងលោក ស៊ាន ប៉េងសែ នៅសហរដ្ឋអាមេរិក នៅកាណាដា ផ្ដើមតាំងពីថ្ងៃទី២១ ខែឧសភាកន្លងមក រហូតទៅដល់ថ្ងៃទី៨ ខែមិថុនា ឆ្នាំ២០១០ខាងមុខនេះ ដើម្បីបំភ្លឺជូនប្រជាពលរដ្ឋអ្នកមានដើមកំណើតខ្មែរ ឲ្យបានយល់ជ្រាបកាន់តែច្បាស់ ជាពិសេសអំពីបញ្ហាបច្ចេកទេសដែលទាក់ទិននឹងការកំណត់ព្រំដែនរវាងប្រទេសកម្ពុជា និងវៀតណាម៕