សមាជិកសភាតំណាងរាស្ត្រឯករាជមួយរូប ដែលមិននៅក្នុងគណបក្ស ឬក្រុមនយោបាយណាមួយ គឺលោក Nicolas Dupont-Aignan បានសរសេរលិខិតទៅរដ្ឋមន្ត្រីការបរទេសបារាំង និងកិច្ចការអឺរ៉ុប លោក Alain Juppe សុំឲ្យធ្វើអន្តរាគមន៍ ក្នុងនាមលោក សម រង្ស៊ី ដែលកំពុងនិរទេសខ្លួនក្នុងប្រទេសបារាំង។
លោក Nicolas Dupont-Aignan ឲ្យហេតុផលថា មកពីលោក សម រង្ស៊ី បានរិះគន់មិនចេះនឿយហត់នូវអំពើពុករលួយ ការរំលោភសិទ្ធិមនុស្ស ហើយនិងរឿងវិវាទព្រំដែនស្លាប់រស់នោះ លោកត្រូវរដ្ឋអំណាចក្រុងភ្នំពេញ តាមធ្វើទុក្ខបុកម្នេញអស់រយៈពេល ១៥ឆ្នាំ។ ក្រោយពីគេចផុតពីការគប់គ្រាប់បែក ដែលគេប៉ុនប៉ងធ្វើឃាតលើរូបលោក នៅឆ្នាំ១៩៩៧ លោក សម រង្ស៊ី សព្វថ្ងៃនេះ ជាជនរងគ្រោះដោយសារប្រព័ន្ធតុលាការ។
លោក Nicolas Dupont-Aignan រំឭកថា ថ្វីត្បិតតែអំពើរបស់លោក សម រង្ស៊ី ត្រូវបានសហគមន៍អន្តរជាតិទ្រទ្រង់ និងទទួលស្គាល់ ដូចជាសភាអឺរ៉ុបជាដើម ដែលបានធ្វើសេចក្ដីសម្រេចចិត្តនៅថ្ងៃទី២១ ខែតុលា ឆ្នាំ២០១០ ថ្កោលទោសការធ្វើទុក្ខបុកម្នេញទៅលើលោក សម រង្ស៊ី និងក្រុមអ្នកជំទាស់ជាទូទៅនោះយ៉ាងណាក៏ដោយ ក៏រដ្ឋអំណាចក្រុងភ្នំពេញនៅតែបណ្ដេញលោក សម រង្ស៊ី ដកអភ័យឯកសិទ្ធិសភា ហើយដាក់ទោសដ៏ធ្ងន់ធ្ងរថែមទៀតផង ដើម្បីឲ្យលោកលែងកម្រើករួច។ តំណាងរាស្ត្របារាំង លោក Nicolas Dupont-Aignan បញ្ជាក់ថា ករណីលោក សម រង្ស៊ី បង្ហាញយ៉ាងច្បាស់នូវធម្មជាតិពិតនៃរបបក្រុងភ្នំពេញ ឃើញពីខាងក្រៅថាមានសភាបែបប្រជាធិបតេយ្យ ហើយដែលបានរក្សាទុកនូវទ្រង់ទ្រាយគាបសង្កត់របៀបផ្ដាច់ការសម័យចាស់ពីមុន។ លោកសុំឲ្យរដ្ឋាភិបាលបារាំងជជែកនិងរដ្ឋាភិបាលក្រុងភ្នំពេញ សុំឲ្យសហភាពអឺរ៉ុបកុំព្រងើយកន្តើយចំពោះការគាបសង្កត់ជនរងគ្រោះ ដែលជាតំណាងរាស្ត្របក្សជំទាស់ និងសុំឲ្យគេមានសិទ្ធិបំពេញការងារ ហើយមានសិទ្ធិនិយាយស្ដីដូចដើមវិញ៕