ប្រធានសហព័ន្ធសហគមន៍នេសាទបឹងបេ៦ ខេត្តកំពង់ចាម លោក អៀង ណាំ អះអាងនៅថ្ងៃអាទិត្យ ទី២៦ ខែតុលា ឆ្នាំ២០០៨ថា ក្រោយរដ្ឋហាមនេសាទក្នុងរដូវទឹកឡើងសម្រាប់ឲ្យត្រីបន្តពូជ រយៈពេល៣ខែ ចាប់ពីខែ៦ មកដល់ដើមខែតុលា ទើបបើកឲ្យនេសាទវិញនេះ ទិន្នផលត្រីទឹកសាប កាន់តែថយចុះ ពី១ឆ្នាំទៅ១ឆ្នាំ។
លោក អៀង ណាំ ថ្លែងរៀបរាប់ដូច្នេះថា ៖ «ធនធានធម្មជាតិនៅឆ្នាំនេះ គឺរេចរឹលអស់ហើយ រកកលនឹងដាច់ពូជហើយ ព្រោះកាលពីខែ ៦ រដូវបិទនេសាទហ្នឹង គឺបទល្មើសនេសាទនៅក្នុងតំបន់ហ្នឹង វាកើតលើសលុប អ៊ីចឹងត្រីតូចៗ ដែលមានកន្លងមក វាអស់តាំងពីតូច អ៊ីចឹងធ្វើឲ្យត្រីវាហិនហោចអស់ហើយ។ ត្រីមួយគីឡូ ៣ពាន់រៀល ឥឡូវឡើងដល់ ១ម៉ឺន រកតែត្រីចង្វាលែងចង់បានហើយ»។
លោកថា ការថយចុះនៃបរិមាណត្រីទឹកសាបនេះ បណ្ដាលមកពីកត្តាទន្ទ្រានព្រៃលិចទឹក នាំឲ្យសត្វត្រី ខ្វះជម្រកការប្រែប្រួលធាតុអាកាសនិងការលួចប្រើឧបករណ៍នេសាទខុសច្បាប់ ក្នុងរដូវបិទនេសាទ។
លោក អៀង ណាំ មានប្រសាសន៍បន្ថែមដូច្នេះថា ៖ «តំបន់ឡូត៍កន្លងមក ដែលរដ្ឋាភិបាលកាត់ទៅ វាពាក់ព័ន្ធដល់ប្រជាពលរដ្ឋមួយចំនួនធំ ដែលរុករានព្រៃលិចទឹក ដែនជម្រកត្រីគឺអស់ហើយ ៦ពាន់ហិកតារប្លាយ គឺប្រជាពលរដ្ឋរានអស់ហើយដីហ្នឹង គឺកាប់ទាំងអស់ព្រៃអត់សល់មួយដើមទេ អ៊ីចឹងជម្រកព្រៃហ្នឹងមិនមានទៀតទេ អស់ហើយ។ ដល់អ៊ីចឹងវាប៉ះពាល់ដល់ផលនេសាទហើយ ត្រីអត់មានជម្រក កាលណាទឹកចេញមក វាចេញតាមទឹកដែរ»។
បណ្តាញសង្កាត់នេសាទខេត្តកំពង់ធំ លោក អ៊ុំ ម៉េង អះអាងដូចគ្នាថា ឆ្នាំនេះ ធនធានត្រីទឹកសាបកាន់តែថយចុះជាងឆ្នាំមុនទៅទៀត ៖ «សព្វថ្ងៃ ផលនេសាទវាអត់ដូចរាល់ឆ្នាំ ការបាត់បង់ចេះតែថយទៅ។ មូលហេតុមកពីការប្រើឧបករណ៍ល្មើសវាច្រើន នៅពេលរដូវបិទក៏មាន រដូវបើកក៏មាន»។
ផ្ទុយពីការអះអាងខាងលើ ប្រធានរដ្ឋបាលជលផល ក្រសួងកសិកម្ម រុក្ខាប្រមាញ់និងនេសាទ លោក ណៅ ធួក មានប្រសាសន៍ថា ក្រោយពីរដ្ឋមានវិធានការទប់ស្កាត់និងការពារធនធានត្រី ក្នុងរដូវត្រីពងកូន នារដូវទឹកឡើងចាប់ពីខែ៦ មកបច្ចុប្បន្ន ដែលទើបបើកឲ្យនេសាទវិញនេះ ចំនួនត្រីគ្រប់ប្រភេទ បានសំបូរប្រហាក់ប្រហែលគ្នានឹងឆ្នាំមុន។
លោក ណៅ ធួក មានប្រសាសន៍ថា ៖ «ប្រហែលជាសំបូរគួរសមប្រហែលៗ ឬក៏កើនជាងឆ្នាំមុនបន្តិចតាមមើល៍។ ប្រភេទត្រីរ៉ស់ ត្រីឆ្ដោរ ត្រីលិញ ត្រីរៀល ត្រីប្រមា ត្រីប្រហុក។ ត្រីលិញ ត្រីរៀលហ្នឹងសំបូរ»។
លោក ណៅ ធួក ទទួលស្គាល់ថា ទឹកទន្លេឆ្នាំនេះ មានកម្ពស់ទាបជាងឆ្នាំមុន ៣តឹក ប៉ុន្តែត្រីសំបូរ គ្រាន់តែទំហំលូតលាស់របស់សត្វត្រី អាចតូចជាង ឆ្នាំមុនបន្តិច។
តាមការអះអាងពីក្រុមនេសាទថា ត្រីទឹកសាបដែលធ្លាប់នេសាទបាន ពីក្នុងបឹងទន្លេសាប ក្នុង១ថ្ងៃៗ ប្រមាណ ២០តោន បានថយចុះមកនៅត្រឹម ៥តោន ទៅ ៦តោន នាពេលបច្ចុប្បន្ន។ រីឯក្រុមអ្នកជួញដូរត្រី នៅតាមទីផ្សារ បានឲ្យដឹងថា ២ ទៅ ៣ឆ្នាំនេះ ត្រីបានឡើងថ្លៃ ពី ១គីឡូក្រាម ២.០០០ ទៅ ៣.០០០រៀល ទៅជាង ១ម៉ឺននិង២ម៉ឺនរៀលក្នុង១គីឡូក្រាម៕