ការរៀបចំតែងតាំងប្រធានបក្សថ្មី គឺជាគោលការណ៍អាទិភាពមួយរបស់គណបក្សហ៊្វុនស៊ិនប៉ិច ក្នុងការឈានទៅទទួលជ័យជម្នះក្នុងការបោះឆ្នោតរើសសមាជិកសភា នាខែកក្កដា ខាងមុខ។
លោក ញឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិច មានប្រសាសន៍នៅថ្ងៃទី២៨ មករា ថា សមាជិកគណៈកម្មការនាយកគណបក្សបានឯកភាពគ្នាស្នើសុំយាងព្រះអង្គម្ចាស់ក្សត្រី នរោត្តម អរុណរស្មី ឲ្យធ្វើជាប្រធានគណបក្ស ដើម្បីចាត់ចែងការងារ ធ្វើឲ្យគណបក្សបានទទួលជ័យជំនះក្នុងការបោះឆ្នោតខាងមុខ។
លោក ញឹក ប៊ុនឆៃ៖ «គណៈកម្មការនាយកបានឯកភាពគ្នា ប៉ុន្តែមិនទាន់បានដាក់ស្នើទៅដល់សម្ដេច អរុណ នៅឡើយទេ ចាំដល់ព្រះរាជពិធីបុណ្យព្រះករុណាចប់ បានដាក់ ឥឡូវយើងមិនរំខាន។ ប៉ុន្តែគណៈនាយកបានឯកភាពជាឯកច្ឆន្ទអស់ហើយ»។
លោក ញឹក ប៊ុនឆៃ ឲ្យដឹងថា បើសិនមានការយល់ព្រមទទួលតំណែងនេះពីម្ចាស់ក្សត្រី ការតែងតាំងនឹងរៀបចំធ្វើឡើងនៅក្នុងឱកាសសមាជគណបក្សពេញអង្គផ្លូវការ នៅថ្ងៃទី២១ មីនា ខាងមុខ។ បច្ចុប្បន្នម្ចាស់ក្សត្រី នរោត្តម អរុណរស្មី ជាឯកអគ្គរាជទូតរបស់ប្រទេសកម្ពុជា ប្រចាំនៅប្រទេសម៉ាឡេស៊ី។
ឆ្លើយតបចម្ងល់ប្រជាពលរដ្ឋមួយចំនួនដែលបានសួរថា ហេតុអ្វីបានជាមិនសុំយាងព្រះអង្គសម្តេចក្រុមព្រះ នរោត្តម រណឫទ្ធិ មកធ្វើជាប្រធានគណបក្សហ៊្វុនស៊ិនប៉ិច វិញ?
លោក ញឹក ប៊ុនឆៃ បានឲ្យដឹងថា សម្ដេចក្រុមព្រះ នរោត្តម រណឫទ្ធិ មិនអាចមកធ្វើប្រធានគណបក្សហ៊្វុនស៊ិនប៉ិច វិញបានទេ ពីព្រោះមានសមាជិកគណបក្សហ៊្វុនស៊ិនប៉ិច មួយចំនួន មិនពេញចិត្តលើការដឹកនាំរបស់ព្រះអង្គឡើយ៖ «មិនយាងព្រះអង្គក្រុមព្រះទេ ព្រោះលោកមិនមានប្រជាប្រិយភាពអីទៀតទេ។ អាចព្រះអង្គមក យើងមានវិបត្តិផ្ទៃក្នុង មានអ្នកមិនគាំទ្រនោះច្រើន អាចមានបញ្ហា»។
លោក ញឹក ប៊ុនឆៃ បានបន្ថែមឲ្យដឹងទៀតថា ពិតមែនតែមានការសុំយាងព្រះអង្គម្ចាស់ក្សត្រី នរោត្តម អរុណរស្មី ឲ្យមកដឹកនាំគណបក្សវិញមែន តែចំពោះបេក្ខភាពនាយករដ្ឋមន្ត្រីរបស់គណបក្សហ៊្វុនស៊ិនប៉ិច នោះ នៅមិនទាន់មានការពិភាក្សាគ្នានៅឡើយទេ។
ព្រះអង្គម្ចាស់ក្សត្រី នរោត្តម អរុណរស្មី ធ្លាប់ធ្វើជាបេក្ខជននាយករដ្ឋមន្ត្រីរបស់គណបក្សហ៊្វុនស៊ិនប៉ិច ម្ដងហើយ ក្នុងពេលរៀបចំការបោះឆ្នោតកាលពីឆ្នាំ២០០៨ កន្លងទៅ ដោយពេលនោះ លោក កែវ ពុទ្ធរស្មី ជាស្វាមីរបស់ព្រះអង្គម្ចាស់ក្សត្រី ជាប្រធានគណបក្សហ៊្វុនស៊ិនប៉ិច។ មកទល់ពេលនេះ មិនទាន់មានចម្លើយពីព្រះអង្គម្ចាស់ក្សត្រី ថាតើព្រម ឬមិនព្រមទទួលយកតំណែងនោះនៅឡើយទេ។
ចំពោះគោលបំណងរបស់គណបក្សហ៊្វុនស៊ិនប៉ិច ចង់រៀបចំយាងឲ្យព្រះអង្គម្ចាស់ក្សត្រី នរោត្តម អរុណរស្មី មកធ្វើជាប្រធានគណបក្សវិញនោះ លោក ឡៅ ម៉ុងហៃ អ្នកវិភាគឯករាជ្យ និងបានតាមដានសកម្មភាពនយោបាយនៅកម្ពុជា មានប្រសាសន៍ថា នេះជាភាពឆ្លាតវៃក្នុងការទាញយកការគាំទ្ររបស់ប្រជាពលរដ្ឋដែលគោរពរាជានិយម មកគាំទ្រព្រះរាជវង្សានុវង្សដែលធ្វើនយោបាយ។
លោក ឡៅ ម៉ុងហៃ៖ «ហ៊្វុនស៊ិនប៉ិច ត្រូវការមេដឹកនាំមួយមានគេស្គាល់ច្រើន ហើយមានទំនាក់ទំនងជាមួយព្រះមហាវីរក្សត្រ។ នេះជាព្រះរាជបុត្រីរបស់លោក ហើយក៏ដូចជាជំនាន់ឆ្នាំ១៩៩៣ គឺយកឥទ្ធិពលរបស់ព្រះមហាវីរក្សត្រ ដើម្បីទាក់ទាញការគាំទ្រពីប្រជាជន»។
ចំពោះបញ្ហាថា ហេតុអ្វីមិនជ្រើសរើសសម្ដេចក្រុមព្រះ នរោត្តម រណឫទ្ធិ ឲ្យដឹកនាំនោះ លោកបណ្ឌិត ឡៅ ម៉ុងហៃ និយាយថា លោក ញឹក ប៊ុនឆៃ ប្រហែលមិនអាចធ្វើការជាមួយសម្ដេចក្រុមព្រះបានទេ៖ «ពីព្រោះអ្នកទាំង ២នេះ មានទំនាស់គ្នាយូរហើយ ជាបែបផែនផ្ទាល់ខ្លួនទៅទៀត គឺមានការលំបាកដែរ ហើយមានសែ មានឥទ្ធិពលខុសគ្នាទៀត»។
លោកបណ្ឌិត ឡៅ ម៉ុងហៃ បានវាយតម្លៃថា បើសិនជាអ្នកដឹកនាំថ្មីរបស់គណបក្សហ៊្វុនស៊ិនប៉ិច មានគោលនយោបាយប្លែក និងថ្មីល្អជាងមុន និងមានភាពឯករាជ្យនោះ មុខជាប្រជាពលរដ្ឋបោះឆ្នោតគាំទ្រជាមិនខាន។ ម៉្យាងវិញទៀត គណបក្សនេះធ្លាប់បានឈ្នះលើសលប់កាលពីសម័យកាលបោះឆ្នោតឆ្នាំ១៩៩៣ ម្ដងរួចទៅហើយ ប៉ុន្តែក្រោយមក ការគាំទ្របានធ្លាក់ចុះមកវិញ ដោយសារការចូលធ្វើរដ្ឋាភិបាលចម្រុះជាមួយគណបក្សប្រជាជនកម្ពុជា។
លោកបណ្ឌិត ឡៅ ម៉ុងហៃ បានលើកពីចំណុចខ្លាំងរបស់គណបក្សហ៊្វុនស៊ិនប៉ិច គឺគណបក្សនេះបង្កើតឡើងដោយអតីតព្រះមហាក្សត្រ នរោត្តម សីហនុ និងបច្ចុប្បន្ន គណបក្សនេះមានការគាំទ្រពីគណបក្សកាន់អំណាចនៅប្រទេសចិន ទៀតផង។
ចំណែកលោក គល់ បញ្ញា នាយកប្រតិបត្តិអង្គការមួយឈ្មោះគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) បានលើកឡើងថា បើគណបក្សហ៊្វុនស៊ិនប៉ិច មានប្រធានបក្សជាស្ត្រីនោះ វាជាចំណុចមួយខ្លាំងដែរ ពីព្រោះបញ្ហាស្ត្រីជាបញ្ហាស្រួចស្រាល់មួយ ដែលមានការចាប់អារម្មណ៍ពីអង្គការជាតិ និងអន្តរជាតិជាច្រើនដែរ ហើយជាពិសេស នឹងមានស្ត្រីជាច្រើនបោះឆ្នោតគាំទ្រ។
លោក គល់ បញ្ញា៖ «ខ្ញុំគិតថា ជាឱកាសព្រះអង្គផងដែរ បើសិនជាយកបញ្ហាស្ត្រីមកលើក ហើយអាចអង្គការជាតិ អន្តរជាតិអីគេគិតថា រដ្ឋាភិបាលដែលមានអ្នកដឹកនាំជាស្ត្រី អ្នកដឹកនាំនោះជួយដោះស្រាយបញ្ហាស្ត្រី មានប្រសិទ្ធភាពជាង»។
លោក គល់ បញ្ញា បានបន្ថែមថា គណបក្សហ៊្វុនស៊ិនប៉ិច មានចំណុចខ្លាំងជាច្រើនដែលអាចឃោសនារកសំឡេងគាំទ្រខ្លួន ពីព្រោះប្រជាពលរដ្ឋដឹងច្បាស់ថា គណបក្សនេះមានបេសកកម្ម គឺការពាររបបរាជានិយម ហើយបើមានសមាជិករាជវង្សជាអ្នកដឹកនាំទៀតនោះ វារឹតតែសំខាន់។ ម៉្យាងវិញទៀត ការទន់ខ្សោយកន្លងមករបស់គណបក្សនេះ វាជាមេរៀនសម្រាប់ដកពិសោធន៍របស់អ្នកដឹកនាំគណបក្សទៀតផង។
ចលនាតស៊ូហ៊្វុនស៊ិនប៉ិច បានបង្កើតឡើងកាលពីឆ្នាំ១៩៨១ ដោយអតីតព្រះមហាក្សត្រ នរោត្តម សីហនុ ហើយមកដល់ឆ្នាំ១៩៩២ ចលនានេះប្រែក្លាយជាគណបក្សហ៊្វុនស៊ិនប៉ិច ដឹកនាំដោយសម្ដេចក្រុមព្រះ នរោត្តម រណឫទ្ធិ និងបានចូលរួមបោះឆ្នោតសកលឆ្នាំ១៩៩៣ បានទទួលជ័យជំនះ មានអាសនៈចំនួន ៥៨ ក្នុងរដ្ឋសភា។
នៅខែតុលា ឆ្នាំ២០០៦ លោក កែវ ពុទ្ធរស្មី បានក្លាយជាប្រធានគណបក្សហ៊្វុនស៊ិនប៉ិច។ មកដល់ខែមេសា ឆ្នាំ២០១១ គណបក្សមានការកែសម្រួលលក្ខន្តិកៈ និងតែងតាំងលោក កែវ ពុទ្ធរស្មី ជាមគ្គុទ្ទេសក៍គណបក្ស និងបានជ្រើសរើសលោក ញឹក ប៊ុនឆៃ ជាប្រធានប្រតិបត្តិគណបក្ស។ បច្ចុប្បន្នគណបក្សហ៊្វុនស៊ិនប៉ិច មានអាសនៈចំនួន ២ នៅក្នុងរដ្ឋសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។