គម្រោងច្របាច់បញ្ចូលគ្នារវាងគណបក្សរាជានិយម២ជាប់គាំងជាថ្មី

គម្រោងការច្របាច់បញ្ចូលគ្នាអោយទៅជាគណបក្សតែមួយរវាងគណបក្សរាជានិយមចំនួនពីរ គឺគណបក្សហ៊្វុនស៊ិនប៉ិច និងគណបក្ស នរោត្តម រណឫទ្ធិ ជាប់គាំងជាថ្មីទៀតហើយ បន្ទាប់ពីបានដើរផ្លូវស្របគ្នាមិនទាន់បាន ២ខែផងនោះ។

ដោយ សុ ជីវី
2012-06-16

សម្ដេចក្រុមព្រះ នរោត្តម រណឫទ្ធិ និង លោក ញ៉ឹក ប៊ុនឆៃ ៣០៥

សម្ដេចក្រុមព្រះ នរោត្តម រណឫទ្ធិ និង លោក ញ៉ឹក ប៊ុនឆៃ ក្នុងពិធីចុះហត្ថលេខារួមគ្នា កាលពីព្រឹកថ្ងៃទី២៤ ខែឧសភា ឆ្នាំ២០១២ នៅទីស្ដីការគណៈរដ្ឋមន្ត្រី វិមានសន្តិភាព។

RFA/Den Ayuthea

ប្រធានប្រតិបត្តិគណបក្សហ៊្វុនស៊ិនប៉ិច លោក ញឹក ប៊ុនឆៃ មានប្រសាសន៍ថា ការពន្យារពេលដោយមិនកំណត់ក្នុងការធ្វើសមាជច្របាច់បញ្ចូលគ្នារវាងគណបក្សទាំងពីរ កើតឡើងដោយសារតែគណបក្ស នរោត្តម រណឫទ្ធិ បង្ហាញជំហរមិនច្បាស់លាស់ក្នុងនយោបាយកណ្ដាល។

គណបក្សរាជានិយមទាំង២ បានគ្រោងទុកថា នឹងធ្វើសមាជច្របាច់បណ្ដូលគ្នាទៅជាគណបក្សតែមួយនៅខែសីហា ខាងមុខ ក្នុងគោលដៅស្វែងរកសំឡេងគាំទ្រក្នុងការបោះឆ្នោតជ្រើសរើសអ្នកតំណាងរាស្ត្រ។

អ្នកនាំពាក្យគណបក្ស នរោត្តម រណឫទ្ធិ លោក ប៉ែន សង្ហា មានប្រសាសន៍ដោយខ្លីថា គណបក្សរបស់នៅតែរក្សាជំហរដដែល។

អ្នកវិភាគនយោបាយ លោកបណ្ឌិត សុខ ទូច មានប្រសាសន៍ថា គណបក្សរាជានិយមទាំងពីរពិបាកនឹងរួបរួមគ្នាដោយប្រើប្រាស់នយោបាយកណ្ដាល ហើយនយោបាយបែបនេះក្នុងបរិបទកម្ពុជា ពលរដ្ឋកម្រនឹងមិនបោះឆ្នោតអោយគណបក្សដែលប្រកាន់នយោបាយប្រភេទកណ្ដាលនេះទេ។

គណបក្សរាជានិយមហ៊្វុនស៊ិនប៉ិច និងគណបក្ស នរោត្តម រណឫទ្ធិ ដែលប្រសូត្រចេញពីផ្ទៃតែ១ បានចែកផ្លូវគ្នាដើរ កាលពីឆ្នាំ២០០៦ បន្ទាប់ពីមានជម្លោះផ្ទៃក្នុងធ្ងន់ធ្ងរមិនអាចផ្សះផ្សាបាន។

ចលនាច្របាច់បញ្ចូលគ្នាទៅជាបក្សតែ១ រវាងគណបក្សហ៊្វុនស៊ិនប៉ិច និងបក្ស នរោត្តម រណឫទ្ធិ បានលេចជារូបរាងឡើងវិញ ដោយការចុះហត្ថលេខាលើកិច្ចព្រមព្រៀងរួមគ្នានៅព្រឹកថ្ងៃទី២៤ ខែឧសភា ឆ្នាំ២០១២ នាវិមានសន្តិភាព ដោយមានលោកនាយករដ្ឋមន្ត្រី ហ៊ុន សែន ធ្វើជាអ្នកសម្របសម្រួល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។