លោក ញឹក ប៊ុនឆៃ ប្រធានគណបក្សហ៊្វុនស៊ិនប៉ិច នៅក្នុងសន្និសីទកាសែតកាលពីថ្ងៃពុធ ទី២៩ ខែមិថុនា បានប្រតិកម្មចំពោះបន្ទូលសម្ដេចក្រុមព្រះ ដែលបានចោទរូបលោកថា ការធ្វើសមាជកាលពីថ្ងៃទី១៨ ខែតុលា ឆ្នាំ២០០៦ ថា ជាការធ្វើរដ្ឋប្រហារបណ្តេញព្រះអង្គពីព្រះប្រធានគណបក្សហ៊្វុនស៊ិនប៉ិច ជារឿងមិនពិត។
លោក ញឹក ប៊ុនឆៃ បញ្ជាក់ថា ការយាងចាកចេញរបស់សម្ដេចក្រុមព្រះពីហ៊្វុនស៊ិនប៉ិច ដោយព្រះកាយព្រះអង្គផ្ទាល់ គ្មាននរណាបណ្តេញព្រះអង្គទេ។
ដោយឡែកចំពោះការចោទរបស់សម្ដេចក្រុមព្រះដែលថា គណបក្សហ៊្វុនស៊ិនប៉ិច បច្ចុប្បន្នមិនមែនជាបក្សរាជានិយមនោះ ក៏ត្រូវបានលោក ញឹក ប៊ុនឆៃ ប្រកាសច្រានចោលដែរ ៖ «ប្រជុំគ្នាច្រើនដងណាស់ មិនមែនតែខ្ញុំម្នាក់ឯងទេ ពិគ្រោះយោបល់គ្នា ពិសេសគណៈកម្មាធិការនាយកធ្វើការកែទម្រង់ ហើយយើងបានកែទម្រង់បីចំណុច។ កែទម្រង់ទី១ គឺដើម្បីឲ្យស្របទៅតាមលទ្ធិប្រជាធិបតេយ្យ គឺគណបក្សហ៊្វុនស៊ិនប៉ិចហ្នឹង ក្រោយថ្ងៃទី១៨ ខែតុលា គឺគ្មានគណបក្សអស់មួយជីវិតទេ។ ទី២ គឺបានកែមិនឲ្យមានការសម្រេចតែប្រធានគណបក្សតែម្នាក់ឯងទៀតទេ និងទី៣ ធំបំផុតនោះ គឺយើងចង់បំបាត់អំពើពុករលួយក្នុងការតែងតាំងមន្ត្រី»។
ទោះយ៉ាងណាលោក ញឹក ប៊ុនឆៃ បានថ្លែងថា រូបលោកមិនមានគម្រោងប្ដឹងព្រះអង្គទៅកាន់តុលាការនោះទេ ដោយគ្រាន់តែអំពាវនាវទៅសម្ដេចក្រុមព្រះ ឲ្យបញ្ឈប់សកម្មភាពផ្សព្វផ្សាយព័ត៌មានមិនពិតទាំងនេះតទៅទៀត។
វិទ្យុអាស៊ីសេរីមិនអាចទាក់ទងសម្ដេចក្រុមព្រះ នរោត្តម រណឫទ្ធិ ដើម្បីបំភ្លឺជុំវិញប្រតិកម្មរបស់លោក ញឹក ប៊ុនឆៃ បានទេ នៅរសៀលថ្ងៃទី២៩ ខែមិថុនា។ ប៉ុន្តែមន្ត្រីនាំពាក្យគណបក្ស នរោត្តម រណឫទ្ធិ លោក ប៉ែន សង្ហា បានចាត់ទុកប្រតិកម្មរបស់លោក ញឹក ប៊ុនឆៃ គឺធ្វើឡើងដើម្បីលុបលាងពុតត្បុតអាក្រក់របស់បក្សពួកខ្លួន ជុំវិញការបណ្ដេញសម្ដេចក្រុមព្រះចេញពីព្រះប្រធានគណបក្សហ៊្វុនស៊ិនប៉ិច មិនអាចប្រកែកបានទេ។
លោក ប៉ែន សង្ហា ឲ្យដឹងបន្ថែម ៖ «អ្វីដែលលោក ញឹក ប៊ុនឆៃ ធ្វើសន្និសីទកាសែតព្រឹកមិញនេះ (ថ្ងៃទី២៩ ខែមិថុនា) ខ្ញុំយល់ឃើញថា លោក ញឹក ប៊ុនឆៃ គ្រាន់តែធ្វើការលាងខ្លួនតែប៉ុណ្ណោះ»។
លោក ប៉ែន សង្ហា ឲ្យដឹងថា នៅក្នុងចំណោមគណបក្សនយោបាយទាំងអស់នៅកម្ពុជា គឺមានតែគណបក្ស នរោត្តម រណឫទ្ធិ មួយទេ ដែលជាគណបក្សរាជានិយមពិតប្រាកដ និងមានថ្នាក់ដឹកនាំបក្សជាប់សែស្រឡាយរាជវង្សពិតប្រាកដ។
ទាក់ទងបញ្ហានេះ លោកបណ្ឌិត សុខ ទូច អ្នកវិភាគស្ថានការណ៍នយោបាយឯករាជ្យនៅកម្ពុជា បានបដិសេធន៍មិនធ្វើអត្ថាធិប្បាយចំពោះការធ្វើសមាជរបស់គណបក្សហ៊្វុនស៊ិនប៉ិច កាលពីថ្ងៃទី១៨ ខែតុលា ឆ្នាំ២០០៦ ថា បែបណានោះទេ។ ប៉ុន្តែលោកបញ្ជាក់ថា គណបក្សមួយដែលមានថ្នាក់ដឹកនាំបក្សមិនមែនជាសែរាជវង្ស ហើយតាំងខ្លួនជាបក្សរាជានិយម គឺមិនត្រឹមត្រូវទេ។
លោកបណ្ឌិត សុខ ទូច បញ្ជាក់បន្ថែម ៖ «យើងត្រូវទទួលស្គាល់ថា គណបក្ស នរោត្តម រណឫទ្ធិ មានភាពរឹងមាំ រាជានិយមជាងគេ។ ពីព្រោះយើងឃើញហើយ រាជានិយមដឹកនាំដោយវង្សានុវង្សរបស់ នរោត្តម ហ្នឹងតែម្ដង ហើយសួរថា ដឹកនាំដោយ ញឹក ប៊ុនឆៃ ហ្នឹងជារាស្ត្រសាមញ្ញ ហើយយើងថា ជារាជានិយមយ៉ាងម៉េច? អាហ្នឹងវាខុសទៅនឹងការពិត»។
យ៉ាងណាក៏ដោយ លោក ញឹក ប៊ុនឆៃ បញ្ជាក់ថា គណបក្សរាជានិយមមិនមែនទាល់តែថ្នាក់ដឹកនាំបក្សជាប់សែស្រឡាយរាជវង្សទើបអាចជាគណបក្សរាជានិយមនោះទេ។ ផ្ទុយទៅវិញឲ្យតែគណបក្សនោះមានគោលនយោបាយគាំទ្រ ឬដង្ហែតាមអង្គព្រះមហាក្សត្រ គឺជាបក្សរាជានិយមហើយ។
សាធារណជនបានកត់សម្គាល់ឃើញថា គណបក្សហ៊្វុនស៊ិនប៉ិច បានធ្លាក់ចុះប្រជាប្រិយភាពធ្ងន់ធ្ងរបន្ទាប់ពីគណបក្សនេះបានធ្វើសមាជកែប្រែប្រព័ន្ធដឹកនាំបក្សកាលពីថ្ងៃទី១៨ ខែតុលា ដោយបានរុញច្រានព្រះអង្គសម្ដេចក្រុមព្រះពីព្រះប្រធានដឹកនាំបក្សទៅជាព្រះប្រធានប្រវត្តិសាស្ត្រ។
តួនាទីថ្មីនេះដែលសម្ដេចក្រុមព្រះមិនមានអំណាចសម្រេចរាល់កិច្ចការដោយព្រះកាយរបស់ព្រះអង្គឯង នាំឲ្យព្រះអង្គយាងចាកចេញពីហ៊្វុនស៊ិនប៉ិច ទៅបង្កើតបក្សថ្មីមួយទៀត ដាក់ព្រះនាមព្រះអង្គផ្ទាល់ គឺគណបក្ស នរោត្តម រណឫទ្ធិ។ ចាប់ពីពេលនេះមក បក្សបងប្អូនទាំងពីរ បានបាត់បង់ប្រជាប្រិយភាពតែរៀងខ្លួន ជាក់ស្ដែងសម្រាប់ការបោះឆ្នោតជ្រើសរើសតំណាងរាស្ត្រអាណត្តិទី៤ កន្លងទៅ គណបក្សនីមួយៗទទួលបានតែពីរអាសនៈប៉ុណ្ណោះ៕