គ្រោះថ្នាក់កម្ពុជាទៅអនាគតពីផែនការត្រីកោណអភិវឌ្ឍន៍សេដ្ឋកិច្ចពិសេស
rd.mp3
ប៉ុន្តែក្រុមអ្នកឃ្លាំមើលអំពីបូរណភាពទឹកដីបានសម្ដែងក្ដីបារម្ភថា ការបង្កើតតំបន់មុំបី ឬហៅថា CLV នេះ អាចនាំឲ្យកម្ពុជា បាត់បង់ធនធានធម្មជាតិ និងទឹកដីរបស់ខ្លួនដ៏ធំធេងទៅឲ្យប្រទេសវៀតណាម នៅថ្ងៃមុខ។
លោកនាយករដ្ឋមន្ត្រី ហ៊ុន សែន កាលពីចុងខែឧសភា បានសម្ដែងមោទនភាព និងមហិច្ឆតារបស់ខ្លួនថា ការបង្កើតតំបន់ត្រីកោណអភិវឌ្ឍន៍ពិសេស រវាងកម្ពុជា វៀតណាម ឡាវ។ លោកចាត់ទុកថា គម្រោងនេះជាគន្លឹះមួយដ៏សំខាន់ដើម្បីកាត់បន្ថយភាពក្រីក្រតាមរយៈការវិនិយោគលើវិស័យទេសចរណ៍ កសិ-ឧស្សាហកម្ម រ៉ែ និងទំនប់វារីអគ្គិសនី។
កាលពីខែធ្នូ ឆ្នាំ២០១១ កម្ពុជាបានយល់ព្រមដាក់បញ្ចូលខេត្តរបស់ខ្លួនចំនួន៤ មានខេត្តក្រចេះ ស្ទឹងត្រែង រតនគិរី និងមណ្ឌលគិរី ដែលមានពលរដ្ឋប្រហែលជាង ៥សែននាក់។ រីឯប្រទេសឡាវ ក៏បានដាក់បញ្ចូលទឹកដីរបស់ខ្លួនចំនួន ៤ខេត្តដែរ ដូចជាខេត្ត អាតាពើរ (Ataper) ចំប៉ាសាក់ (Champasak) សារាវ៉ាន់ (Saravan) សេកុង (Sekong) ដែលមានមនុស្សប្រមាណ ៧សែននាក់ ហើយវៀតណាម បានដាក់បញ្ចូលទឹកដីរបស់ខ្លួនចំនួន ៥ គឺខេត្តចាឡាយ (Gia Lai) កនទុំ (Kon Tum) ដាក់ឡាក់ (Dac Lac) ដាណាង (Da Nang) ប៊ិញហ៊្វឺក (Binh Phuoc) ដែលខេត្តទាំងនេះ មានមនុស្សជាង ៧លាននាក់។
ប្រធានអង្គការខ្មែរម្ចាស់ស្រុកដែលមានមូលដ្ឋានក្នុងប្រទេសបារាំង អ្នកស្រី ចក់ សុខុន មានប្រសាសន៍ថា ការរកស៊ីចូលគ្នាតាមរយៈការបង្កើតតំបន់ត្រីកោណអភិវឌ្ឍន៍នេះ អាចនាំឲ្យកម្ពុជា ខាតបង់ច្រើន ហើយអាចនាំឲ្យវៀតណាម ស្រូបយកសម្បត្តិធម្មជាតិរបស់ខ្មែរ ដោយស្របច្បាប់ដើម្បីចិញ្ចឹមពលរដ្ឋរបស់គេ។ អ្នកស្រីបន្តថា វៀតណាមមានប្រជាជនច្រើន ដូច្នេះវៀតណាម ត្រូវការដីថ្មី ឬធនធានបន្ថែមសម្រាប់ចិញ្ចឹមពលរដ្ឋរបស់គេទៅថ្ងៃមុខទៀត។
ទោះបីជាយ៉ាងណាក៏ដោយ ទីស្ដីការគណៈរដ្ឋមន្ត្រីខ្មែរបានឲ្យដឹងថា ការបង្កើតតំបន់អភិវឌ្ឍន៍ត្រីកោណពិសេស គឺឈរលើមធ្យោបាយពីរ។ ទីមួយគឺការភ្ជាប់ប្រព័ន្ធផ្លូវថ្នល់ និងសេវាកម្មសុខាភិបាលរវាងប្រទេសទាំងបី មានន័យថា ពលរដ្ឋរវាងប្រទេសទាំងបីនេះ អាចទទួលការព្យាបាលជំងឺក្នុងប្រទេសនីមួយៗបានទៅវិញទៅមក។ ទីពីរ គឺការចល័តពាណិជ្ជកម្ម បានន័យថា ពលរដ្ឋនៅតាមបណ្ដាខេត្តនៃប្រទេសទាំងបីនេះ អាចនាំយកផលិតផលរបស់ខ្លួនឆ្លងចូលធ្វើជំនួញទៅវិញទៅមក។
អ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បានបញ្ជាក់ថា ការបញ្ចូលតំបន់ពាណិជ្ជកម្មរួមជាមួយវៀតណាមនេះ នឹងមិនអាចឲ្យកម្ពុជា បាត់បង់អធិបតេយ្យភាពនោះឡើយ។ លោកថា ផ្ទុយទៅវិញពលរដ្ឋខ្មែរក្រីក្រនៅតាមតំបន់នោះ នឹងមានជីវភាពធូរធារ ស្របទៅតាមយុទ្ធសាស្ត្រកាត់បន្ថយភាពក្រីក្ររបស់រដ្ឋាភិបាល។
គេហទំព័ររបស់តំបន់អភិវឌ្ឍន៍សេដ្ឋកិច្ចពិសេសកម្ពុជា វៀតណាម ឡាវ បានចុះផ្សាយកិច្ចប្រជុំលើកទី៧ នៃគណៈកម្មាធិការសម្របសម្រួលរួម ដែលមានរដ្ឋមន្ត្រីនៃបណ្ដាប្រទេសទាំងបីចូលរួម កាលពីថ្ងៃទី៩ ខែធ្នូ ឆ្នាំ២០១១ ក្នុងខេត្តអាតាពើរ ប្រទេសឡាវ។ ភាគីកម្ពុជា មានលោក ចម ប្រសិទ្ធ ទេសរដ្ឋមន្រ្តី និងជារដ្ឋមន្ត្រីក្រសួងពាណិជ្ជកម្ម ភាគីឡាវ មានលោក សំឌី ឌួងឌី (Somdy Douangdy) រដ្ឋមន្ត្រីក្រសួងផែនការ និងវិនិយោគ។ ចំណែកភាគីវៀតណាម មានលោក បូយ ក្វាង វិញ (Bùi Quang Vinh) រដ្ឋមន្ត្រីក្រសួងផែនការ និងវិនិយោគ។
របាយការណ៍ពីកិច្ចប្រជុំនោះបានចុះផ្សាយថា ក្រុមរដ្ឋមន្ត្រីនៃបណ្ដាប្រទេសទាំងនេះ បានយល់ព្រមបង្កើតផែនការមេខាងផ្នែកអភិវឌ្ឍន៍សេដ្ឋកិច្ចនៅតំបន់ត្រីកោណ រហូតដល់ឆ្នាំ២០២០ ផ្អែកលើការចុះអនុស្សរណៈយោគយល់គ្នា។ ក្រុមរដ្ឋមន្ត្រីទាំងបីប្រទេសនេះក៏បានប្ដេជ្ញាចិត្តក្នុងការពន្លឿនការច្របាច់បញ្ចូលគ្នា ជាពិសេសខាងការឆ្លងដែនផ្នែកទេសចរណ៍ ពាណិជ្ជកម្ម និងការដឹកជញ្ជូនទៅវិញទៅមក ព្រមទាំងពង្រឹងកិច្ចសហប្រតិបត្តិការខាងផ្នែកសន្តិសុខ និងកិច្ចការបរទេសដើម្បីនាំមកនូវសន្តិភាព សុវត្ថិភាព និងនិរន្តរភាពនៃការអភិវឌ្ឍក្នុងអនុតំបន់។
ក្រុមអ្នកឃ្លាំមើលនិយាយថា តំបន់ភូមិភាគឦសានរបស់កម្ពុជា ជាតំបន់មួយដែលសំបូរទៅដោយសម្បត្តិធម្មជាតិដែលមានតម្លៃដ៏មហាសាល ដូចជាព្រៃឈើ រ៉ែមាស រ៉ែបុកស៊ីត សំណដែក ថ្មម៉ាប និងជាជង្រុកនៃអនុផលធម្មជាតិដ៏ធំ។ ក្រុមនេះឲ្យដឹងថា តំបន់ភូមិភាគឦសានរបស់កម្ពុជា គឺជាតំបន់យុទ្ធសាស្ត្រសង្គ្រាមដ៏សំខាន់បំផុតក្នុងឥណ្ឌូចិន។
លោក ស៊ាន ប៉េងសែ ប្រធានគណៈកម្មាធិការព្រំដែនកម្ពុជា ដែលមានមូលដ្ឋានក្នុងប្រទេសបារាំង និងជាអតីតរដ្ឋមន្ត្រីក្រសួងឧស្សាហកម្ម និងរ៉ែ ក្នុងទសវត្សទី៧០ មានប្រសាសន៍ថា វៀតណាមកំពុងដើរខ្សែលើ ឬលេងល្បិចលើកម្ពុជា និង ឡាវ។
ចំណែកប្រធានសហព័ន្ធខ្មែរកម្ពុជាក្រោម ដែលមានមូលដ្ឋានក្នុងសហរដ្ឋអាមេរិក លោក ថាច់ ង៉ុកថាច់ និយាយថា ពលរដ្ឋនៅតាមតំបន់ភូមិភាគឦសាន ភាគច្រើនសុទ្ធតែជាជនជាតិភាគតិចដែលខ្វះខាតការយល់ដឹងច្រើនអំពីបញ្ហាវិទ្យាសាស្រ្ត ឬប្រព័ន្ធបច្ចេកវិទ្យាផ្សេងៗ ដែលអាចនាំឲ្យពួកគេលំបាកក្នុងការប្រឡូកនឹងប្រព័ន្ធសេដ្ឋកិច្ចចម្រុះ។
លោកថ្លែងបន្តថា វៀតណាមក៏បានប្រើយុទ្ធសាស្ត្រត្រជាក់ដើម្បីត្រួតត្រាប្រព័ន្ធរដ្ឋបាលរបស់ខ្មែរ ដូចជាការចងក្រងរចនាសម្ព័ន្ធតាមថ្នាក់មូលដ្ឋានជាមួយកម្ពុជា ចាប់ពីថ្នាក់មេភូមិ មេឃុំ ចៅហ្វាយស្រុក ចៅហ្វាយខេត្តរបស់ខ្មែរត្រូវភ្ជាប់ទំនាក់ទំនងជាមួយវៀតណាម។
ជាមួយគ្នានេះដែរ អតីតសាស្ត្រាចារ្យនៃសកលវិទ្យាល័យ ចន ហបឃិន (John Hopkin) លោកបណ្ឌិត ទិត្យ ណារ៉ាញ់ គីរី មានប្រសាសន៍ថា ការបង្កើតតំបន់ត្រីកោណពិសេសនេះ គឺជាការផ្ដល់លទ្ធភាព និងជាការសម្រួលដល់រដ្ឋាភិបាលវៀតណាម ក្នុងការបញ្ជូនពលរដ្ឋរបស់គេឲ្យមករស់នៅក្នុងទឹកដីកម្ពុជា ដោយស្របច្បាប់ ហើយនៅចុងបញ្ចប់ខេត្តរបស់ខ្មែរទាំងនោះ នឹងមានតែជនជាតិវៀតណាម ប៉ុណ្ណោះ។
វិទ្យុអាស៊ីសេរីបានព្យាយាមសុំសេចក្ដីអត្ថាធិប្បាយពីក្រុមមន្ត្រីស្ថានទូតវៀតណាម ប្រចាំនៅកម្ពុជាដែរ តែមិនមានមន្ត្រីណាមួយអាចបកស្រាយបាននោះឡើយ។
ឆ្លើយតបទៅនឹងក្រុមអ្នកវិភាគ និងក្រុមអ្នករិះគន់នេះដែរ លោក ហោ ណាំហុង ឧបនាយករដ្ឋមន្រ្តី និងជារដ្ឋមន្ត្រីក្រសួងការបរទេសកម្ពុជា កាលពីពាក់កណ្ដាលខែមិថុនា ធ្លាប់បង្ហាញពីជំហរមិនដកថយរបស់កម្ពុជា ចំពោះកិច្ចសហប្រតិបត្តិការជាមួយវៀតណាម ក្នុងការបង្កើតតំបន់សេដ្ឋកិច្ចចម្រុះនេះ។
ក្រៅពីការបង្កើតតំបន់ត្រីកោណអភិវឌ្ឍន៍ពិសេសរវាងកម្ពុជា វៀតណាម ឡាវ នេះ លោកនាយករដ្ឋមន្ត្រី ហ៊ុន សែន បានបង្ហាញសុទិដ្ឋិនិយមក្នុងការបង្កើតតំបន់មរកតអភិវឌ្ឍន៍ពិសេស រវាងបណ្ដាខេត្តជាប់ព្រំដែនឡាវ និងថៃ ដើម្បីបង្ហាញអំពីកិច្ចខិតខំប្រឹងប្រែងឲ្យបានជោគជ័យសម្រាប់ទិសដៅអាស៊ាន សហគមន៍តែមួយវាសនាតែមួយក្នុងឆ្នាំ២០១៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
ពី Tkeoហេតុអ្វីបានជាអ្នកដឹកនាំខ្មែរធ្ធើឲ្យទឹកដីបាត់បង់, ហេតុអ្នកចេះដឹងរបស់ប្រទេសខ្មែរឆាប់ស្លាប់ម្លេះ? ហេតុអ្វីបែរជាឲ្យនាយករដ្ឋាភិបាលខ្វះសម្ថភាពឡើងកាន់អំណាច? តើអ្នកទាំងអស់គ្នារស់នៅដើម្បីលុយ ឬដើម្បីអ្វី? ហេតុបានជាអ្នកទាំងអស់គ្នាមិនមើលឲ្យវែងឆ្ងាយ?
Jul 05, 2012 08:34 AM
(
ខ្ញុំក៏គិតថាហ៊ុន សែន កាត់ដីឲ្យយួនដែរ ហើយអស់ច្រើនទៀតផង ប៉ុន្តែខ្ញុំឆ្ងល់ ហេតុអ្វីអ្នកកាន់អំណាចមុនៗ មិនធ្វើព្រំដែន ជាពិសេសគឺ ស្តេចសីហនុ...ប៉ុន្តែលោក ហ៊ុន សែន មិនគួរធ្វើព្រំដែនដែលគ្មានការឯកភាពផ្ទៃក្នុងនោះទេ...ប្រយ័ត្នមានឈ្មោះមិនល្អក្នុងបញ្ជី សំរាប់ក្មេងជំនាន់ក្រោយ
Jul 03, 2012 03:40 AM
អ្នកអានអនាមិក
Because Khmer had bad leader.hun sen is the foolish leader.why USA and other country not catch him to punish.he kill,take land,and never care how poor people live?I so pity Khmer has.
Jul 04, 2012 06:38 PM
អ្នកអានអនាមិក
សួមពិចារណាឲ្យបានល្អិតល្អន់ តើការងារវាផ្តល់ផលប្រយោជន៍ឲ្យខ្មែរដែលឬទេ? សូមកុំយកប្រទេសកម្ពុជាជាឧបករណ៍ពិសោធន៍នយោបាយរបស់លោក
Jul 03, 2012 12:37 AM
Khmer
ពី PPទ្រាំទៅ យើងមិនអាចធ្វើអ្វីបាននោះទេ បានតែត្រឹមឈរមើលខ្មែរបាត់ដីតែប៉ុននោះ។
Jul 02, 2012 11:16 PM
Eagle Master
ពី Pa(USA)Khmer rouge's courthouse is remain opening,it's revealing secretis past history between Khmer rouge and Yuan-Viet.But if you forgot,may I inform you breafly when USA was pulled out troops from rigions Vietnam has had enforced Mr:Pol Pot be combined Khmer,Lao into once.
And now when USA,world west stucking with economy and political streses China and Yuan brought up this formular again,lately china has been assign a new game by disputing south sea,as bove all,I alway told Mr:Samdach Hun Sen play game with china you may get trap with Yuan,and moreover if USA,West's couldn't recovery economy quick Vietnam will has enforced khmer,Lao to combined into china.you can see Tibet,Uygher as examples.
Jul 02, 2012 08:24 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
