ទិវា​អ្នក​ស្រឡាញ់​ភេទ​ដូច​គ្នា​នៅ​ភ្នំពេញ

អង្គការ​សិទ្ធិ​មនុស្ស និង​ក្រុម​អ្នក​ស្រឡាញ់​ភេទ​ដូច​គ្នា បាន​ជួប​ជុំ​គ្នា​ដើម្បី​ប្រារព្ធ​ទិវា​អន្តរជាតិ​ប្រឆាំង​នឹង​ការ​រើសអើង​អ្នក​ស្រឡាញ់​ភេទ​ដូច​គ្នា និង​អ្នក​ប្ដូរ​ភេទ កាល​ពី​រាត្រី​ថ្ងៃ​ទី​១៧ ឧសភា ឆ្នាំ​២០១១។
ដោយ ខែ សុណង
2011.05.19
gay305 មន្ត្រី​អង្គការ​សិទ្ធិ​មនុស្ស និង​សហគមន៍​អ្នក​ស្រឡាញ់​ភេទ​ដូច​គ្នា ឡើង​ជជែក​លើ​វេទិកា​នា​ឱកាស​ប្រារព្ធ​ទិវា​អន្តរ​ជាតិ​ប្រឆាំង​នឹង​ការ​រើសអើង​អ្នក​ស្រឡាញ់​ភេទ​ដូច​គ្នា និង​អ្នក​ប្ដូរ​ភេទ នៅ​មជ្ឈ​មណ្ឌល​ផ្ទះ​មេត្តា ទីក្រុង​ភ្នំពេញ យប់​ថ្ងៃ​ទី​១៧ ឧសភា ឆ្នាំ​២០១១
RFA/Khe Sonorng

អ្នក​ស្រឡាញ់​ភេទ​ដូច​គ្នា និង​អ្នក​ប្ដូរ​ភេទ​ត្រូវ បាន​មន្ត្រី​អង្គការ​មិនមែន​រដ្ឋាភិបាល​រក​ឃើញ​ថា ពួកគេ​គឺ​ជា​ក្រុម​មនុស្ស​ងាយ​រងគ្រោះ ហើយ​កំពុង​ជួប​ប្រទះ​នូវ​ការ​រើសអើង​ក្នុង​សង្គម និង​ពុំ​មាន​ច្បាប់​គាំទ្រ​ឡើយ។

ឈឺ​ចាប់​ដោយ​ការ​រើសអើង

លោក អ៊ូ វីរៈ ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា ហៅ​កាត់​ជា​ភាសា​អង់គ្លេស​ថា CCHR មាន​ប្រសាសន៍​ថា ក្នុង​ព្រះរាជាណាចក្រ​កម្ពុជា អ្នក​ស្រឡាញ់​ភេទ​ដូច​គ្នា និង​អ្នក​ប្ដូរ​ភេទ​ បច្ចុប្បន្ន​បាន​រង​ការ​ឈឺ​ចាប់​ដោយ​សារ​ការ​រើសអើង ការ​រំលោភ​បំពាន​ ហើយ​ជាង​នេះ​ទៅ​ទៀត គឺ​ពួកគេ​បាន​រង​នូវ​អំពើ​ហិង្សា​ផ្សេងៗ។ លោក​ថា អ្នក​ទាំង​នោះ បាន​រង​ការ​បណ្ដេញ​ចេញ និង​មិន​ទទួល​ស្គាល់​ពី​ក្រុម​គ្រួសារ​របស់​ពួកគេ ត្រូវ​បាន​សង្គម​បដិសេធ​ចំពោះ​ការ​ងារ មាន​ការ​រើសអើង​នៅ​កន្លែង​ធ្វើ​ការ ក្លាយ​ជា​ជន​រងគ្រោះ​ធ្វើ​បាប​ពី​សំណាក់​ប៉ូលិស ហើយ​ត្រូវ​បាន​បង្ខាំង​ពី​ការ​ជួប​ជុំ​បញ្ចេញមតិ​ដោយ​សេរី​នៅ​ទី​សាធារណៈ និង​ការ​បញ្ចេញមតិ​រវាង​គ្នា​ទៅ​វិញ​ទៅ​មក​ជាដើម។

 លោក អ៊ូ វីរៈ ៖ "យើង​ធ្វើ​ការ​នេះ​មិន​មែន​ដើម្បី​លើក​ទឹក​ចិត្ត​ទេ ប៉ុន្តែ​ដើម្បី​ឲ្យ​សង្គម​យើង​ទាំង​មូល​បើក​ចំហ ហើយ​ទទួល​យក​ការ​ជ្រើស​រើស​របស់​ប្រជា​ពល​រដ្ឋ​របស់​ខ្លួន យើង​យល់​ថា​យើង​ទាំង​អស់​គ្នា​មាន​ភារកិច្ច​គាំទ្រ​នូវ​ការ​គោរព​សិទ្ធិ​ស្មើ​ភាព​គ្នា​នេះ សូម្បី​តែ​អ្នក​រង​គ្រោះ​នូវ​ការ​រំលោភ​ដីធ្លី​ក៏​គោលការណ៍​ស្រដៀង​គ្នា​ដែរ ដោយសារ​ពួក​គាត់​ជា​អ្នក​រង​គ្រោះ ដោយ​សារ​ការ​មិន​គោរព​សិទ្ធិ​ស្មើ​ភាព​គ្នា​ចំពោះ​មុខ​ច្បាប់ អ៊ីចឹង​ក្រុម​អ្នក​ស្រឡាញ់​ភេទ​ដូច​គ្នា អ្នក​ដែល​បាត់​បង់​ដីធ្លី​គឺ​មាន​លក្ខណៈ​ដូច​គ្នា ឲ្យ​តែ​យើង​អត់​គោរព​សិទ្ធិ​គ្នា​ទៅ​វិញ​ទៅ​មក គឺ​អ្នក​ទន់​ខ្សោយ​រមែង​តែ​ជា​ជន​រង​គ្រោះ​ចឹង​ហើយ"

ការ​ថ្លែង​របស់​លោក អ៊ូ វីរៈ ដូច្នេះ នៅ​គ្រា​ដែល​ក្រុម​ស្រី​និង​បុរស​ដែល​ស្រឡាញ់​ភេទ​ដូចគ្នា​ បាន​ជួប​ជុំ​គ្នា​នៅ​ឯ​មជ្ឈមណ្ឌល​ផ្ទះ​មេត្តា ក្នុង​ទីក្រុង​ភ្នំពេញ កាល​ពី​រាត្រី​ថ្ងៃ​ទី ១៧ ឧសភា ឆ្នាំ ២០១១ ដើម្បី​ប្រារព្ធ​ទិវា​អន្តរជាតិ​ប្រឆាំង​នឹង​ការ​រើសអើង​អ្នក​ស្រឡាញ់​ភេទ​ដូច​គ្នា និង​អ្នក​ប្ដូរ​ភេទ ទិវា​នេះ​មាន​មនុស្ស​ប្រមាណ​ជាង​១០០​នាក់​បាន​ចូលរួម។

សកម្មជន​សិទ្ធិ​មនុស្ស​នៃ​សហគមន៍​ឥន្ទធនូ​កម្ពុជា លោក ស៊្រុន ស៊្រន បាន​ថ្លែង​ថា មូលហេតុ​ដែល​នាំ​ឲ្យ​គេ​ជ្រើស​យក​ថ្ងៃ​ទី​១៧ ឧសភា ក្នុង​ការ​ប្រារព្ធ​ទិវា​អន្តរជាតិ​ប្រឆាំង​នឹង​ការ​រើសអើង​អ្នក​ស្រឡាញ់​ភេទ​ដូច​គ្នា និង​អ្នក​ប្ដូរ​ភេទ​នោះ គឺ​ដោយសារ​ថ្ងៃ​ដដែល ក្នុង​ឆ្នាំ​១៩៩០ អង្គការ​សុខភាព​ពិភព​លោក បាន​សម្រេច​ដក​អ្នក​ស្រឡាញ់​ភេទ​ដូចគ្នា​ចេញ​ពី​បញ្ជី​វេជ្ជសាស្ត្រ​ថា​ ពួកគេ​គឺ​ពុំ​មែន​មាន​រោគ​សញ្ញា​ជំងឺ​ផ្លូវ​ចិត្ត និង​មាន​បញ្ហា​សតិអារម្មណ៍​នោះ​ទេ។

លោក ស៊្រុន ស៊្រន ៖ "វា​ជា​ថ្ងៃ​ដ៏​ពិសេស​បំផុត ដែល​យើង​ចង់​ប្រាប់​ទៅ​ប្រជា​ជន​ខ្មែរ​ទាំង​អស់ ឬ​ក៏​អ្នក​ស្រឡាញ់​ភេទ​ដូច​គ្នា​នៅ​សង្គម​ខ្មែរ ឲ្យ​គាត់​បាន​ដឹង​ថា សកម្មភាព​ដែល​យើង​ធ្វើ​ទិវា​ប្រឆាំង​ការ​រើសអើង​ចំពោះ​អ្នក​ស្រឡាញ់​ភេទ​ដូច​គ្នា ឬ​ក៏​អ្នក​ប្ដូរ​ភេទ​មិន​មែន​មាន​នៅ​តែ​ស្រុក​ខ្មែរ​ទេ ឆ្នាំ​នេះ​គឺ​មាន​ដល់​ទៅ​១៣២ ប្រទេស​ដែល​គេ​ប្រារព្ធ​ពិធី​​ហ្នឹង​ទី១។ ទី​២ យើង​ចង់​បញ្ជាក់​ថា កាណ៍​ដែល​យើង​ជជែក​គ្នា​នៅ​ពេញ​មួយ​ល្ងាច​នេះ គឺ​យើង​ចង់​ឲ្យ​សង្គម​ខ្មែរ​បាន​យល់​ថា នៅ​ស្រុក​យើង​ពិត​មែន​តែ​ពុំ​មាន​ច្បាប់​ប្រឆាំង​នឹង​អ្នក​ស្រឡាញ់​ភេទ​ដូច​គ្នា​ ពិត​មែន​តែ​អត់​មាន​ច្បាប់​ណា​​មក​ការ​ពារ​ជន​រង​គ្រោះ ​ដែល​ជា​អ្នក​​ស្រឡាញ់​ភេទ​ដូច​គ្នា​ ប៉ុន្តែ​រាល់​ការ​រំលោភ​ទាំង​អស់ ត្រូវ​បាន​គេ​ធ្វើ​មិន​ដឹង​មិន​ឮ"

នៅ​ក្នុង​ការ​ប្រារព្ធ​ពិធី​នោះ ដែល​គេ​បាន​ដាក់​តាំង និង​លក់​អាវ​យឺត​ពណ៌​ខ្មៅ​ដែល​មាន​សរសេរ​អក្សរ​ដាក់​ថា ធាតុ​ពិត​របស់​ខ្ញុំ​នៅ​ឆ្នាំ​២០១១ ហើយ​ក៏​មាន​ការ​ចាក់​បញ្ចាំង​ភាព​យន្ត​ឯកសារ ដែល​មាន​ចំណង​ជើង​ថា លើក​ទឹក​ចិត្ត​ឲ្យ​មនុស្ស​ជជែក​គ្នា​អំពី​បញ្ហា​សិទ្ធិ។ ខ្សែ​ភាព​យន្ត​នោះ គេ​បាន​បង្ហាញ​ពី​ភាព​រងគ្រោះ​ និង​ការ​រើសអើង ទៅ​លើ​អ្នក​ស្រឡាញ់​ភេទ​ដូចគ្នា​នៅ​បណ្ដា​ប្រទេស​នៅ​តំបន់​អាស៊ី​មួយ​ចំនួន ដែល​បាន​ផលិត​ដោយ​ជនជាតិ​ហ្វីលីពីន​ម្នាក់ គាត់​ជា​ប្រធាន​គម្រោង​អ្នក​ស្រឡាញ់​ភេទ​ដូច​គ្នា​នៅ​អាស៊ី។

នៅ​ក្នុង​ភាពយន្ត​នោះ​គេ​បាន​រៀបរាប់​ប្រទេស​មួយ​ចំនួន​ដែល​បាន​បង្កើត​ច្បាប់​ដើម្បី​ប្រឆាំង​និង​អ្នក​ស្រឡាញ់​ភេទ​ដូចគ្នា រហូត​ដល់​មាន​ការ​បណ្ដេញ​ពី​ផ្ទះ​សម្បែង ការ​រំលោភ​ភេទ ការ​មិន​ចេញ​អត្តសញ្ញាណ​ប័ណ្ណ​ឲ្យ​ពី​ក្រុម​អ្នក​អនុវត្ត​ច្បាប់ និង​ករណី​រើសអើង​នៅ​កន្លែង​អប់រំ នាំ​ឲ្យ​មាន​ការ​បោះបង់​ចោល​សាលា​រៀន​ជាដើម។

ស្រឡាញ់​ភេទ​ដូច​គ្នា​អាច​ក្លាយ​ជា​បទ​ឧក្រិដ្ឋ​នៅ​ប្រទេស​មួយ​ចំនួន

ស្ត្រី​ស្រឡាញ់​ស្ត្រី បុរស​ស្រឡាញ់​បុរស អ្នក​ស្រឡាញ់​ទាំង​ពីរ​ភេទ បាន​ប្រឈម​មុខ​និង​ការ​រំលោភ​សិទ្ធិ​ប្រចាំ​ថ្ងៃ មិន​ត្រឹម​តែ​ប៉ុណ្ណោះ​ពួកគេ​បាន​ចាត់​ទុក​ជា​ឧក្រិដ្ឋជន​នៃ​ប្រទេស​ជា​ច្រើន។ ប្រទេស​ចំនួន​១០ នៅ​អាស៊ី​បាន​កំណត់​ថា​ការ​ប្រតិព័ទ្ធ​ភេទ​ដូច​គ្នា​ជា​បទ​ឧក្រិដ្ឋ​ដូចជា​ប្រទេស​អាហ្វហ្គានីស្ថាន បង់ក្លាដេស ប្រ៊ុយណេ ប៊ូតាន់ ភូមា ម៉ាឡេស៊ី ម៉ាហ្គីស ប៉ាគីស្ថាន សិង្ហបុរី ប្រទេស​ស្រីលង្កា។ ចំណែក​ប្រទេស​ចំនួន​៩ នៅ​កោះ​ប៉ាស៊ីហ្វិក ក៏​បាន​ដាក់​ទណ្ឌកម្ម​ចំពោះ​អ្នក​រួម​ភេទ​ដូចគ្នា​ផង​ដែរ។

ក្នុង​រូបរាង​តូច​ច្រឡឹង​ សម្បុរ​សណ្ដែកបាយ សក់​ត្រឹម​ក កញ្ញា លី ពិសី អាយុ​២៦​ឆ្នាំ ដែល​ស្ត្រី​ម្នាក់​ស្រឡាញ់​ភេទ​ដូច​គ្នា ហើយ​នាង​កំពុង​បម្រើ​ការងារ​ស្ម័គ្រ​ចិត្ត​ក្នុង​ការ​អប់រំ​អ្នក​ស្រឡាញ់​ភេទ​ដូច​គ្នា​នៅ​តាម​សហគមន៍ បាន​ថ្លែង​ថា បរិយាកាស​ដែល​រស់​នៅ​ដោយ​កៀប​សង្កត់​ពី​សំណាក់​សង្គម និង​ក្រុម​គ្រួសារ​មក​លើ​ក្រុម​មនុស្ស​ស្រឡាញ់​ភេទ​ដូចគ្នា បាន​បង្ក​ឲ្យ​ពួកគេ​កាន់​តែ​ងាយ​រង​គ្រោះ​ឡើង ៖ "ទី​១ យើង​ត្រូវ​ការ​គ្រួសារ​យើង​ទទួល​ស្គាល់​អ្វី​ដែល​យើង​ធ្វើ​មិន​មែន​ខុស​ធម្មជាតិ​ទេ ព្រោះ​អ្វី​ដែល​យើង​ចង់​បាន​វា​ជា​ធម្មជាតិ​របស់​យើង ទី​២ សង្គម​ខ្មែរ​ទាំង​មូល​សុំ​កុំ​រើស​អើង​ពី​ព្រោះ​អី​បើ​យើង​និយាយ​អំពី​ការ​គោរព​តម្លៃ​មនុស្ស​ផាត់​ចោល​ថា​គាត់​ស្រឡាញ់​អ្នក​ណា​ស្រឡាញ់​ទៅ តែ​ត្រូវ​គោរព​ក្នុង​នាម​តម្លៃ​គាត់​ជា​មនុស្ស។ ហើយ​ក្នុង​នាម​អ្នក​ស្រឡាញ់​ភេទ​ដូច​គ្នា ទាម​ទារ​សុំ​តែ​សេចក្ដី​សុខ និង​ការ​ការ​ពារ​តម្លៃ​មនុស្ស សីលធម៌​របស់​មនុស្ស​ដូច​អ្នក​ដទៃ បើ​គេ​មាន​ការ​ងារ​ធ្វើ សុំ​ឲ្យ​យើង​មាន​សិទ្ធិ​ទទួល​បាន​ការ​ងារ​ហ្នឹង បើ​យើង​ចង់​ទៅ​រៀន គ្រាន់​តែ​យើង​ជា​ស្រី​ចង់​ស្លៀក​ខោ​សុំ​ឲ្យ​យើង​មាន​ឱកាស​ទទួល​បាន​ការ​អប់រំ​ហ្នឹង​ផង កុំ​យក​កត្តា​យេនឌ័រ​យក​មក​បង្ខាំង​ឱកាស​ក្នុង​ការ​ទទួល​បាន​សេវា​ទាំង​អស់​នេះ"

តែ​ទោះ​យ៉ាង​ណា​នៅ​ក្នុង​ការ​ប្រារព្ធ​ទិវា​អន្តរជាតិ​ប្រឆាំង​នឹង​ការ​រើសអើង​អ្នក​ស្រឡាញ់​ភេទ​ដូច​គ្នា និង​អ្នក​ប្ដូរ​ភេទ ក្រុម​អង្គការ​សង្គម​ស៊ីវិល​ដែល​ធ្វើ​ការ​ពាក់ព័ន្ធ​បញ្ហា​នេះ ក៏​បាន​អំពាវនាវ​ឲ្យ​ក្រុម​មនុស្ស​ស្រឡាញ់​ភេទ​ដូច​គ្នា ចេះ​ការពារ​ខ្លួន​ជៀស​ឲ្យ​បាន​នូវ​ការ​ឆ្លង​និង​រីក​រាលដាល​មេរោគ​អេដស៍​ជំងឺ​អេដស៍ និង​ជំងឺ​កាមរោគ​នានា៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។