រោងចក្រ៧៧នៅកម្ពុជាបិទទ្វារក្នុងដើមឆ្នាំនេះដោយសារវិបត្តិពិភពលោក

ដោយ កេសរណ្ណីយ្យា

2009-10-06

វិបត្តិសេដ្ឋកិច្ចនិងហិរញ្ញវត្ថុពិភពលោកបានបង្ខំឲ្យរោងចក្រកាត់ដេរសម្លៀកបំពាក់នៅកម្ពុជាចំនួន៧៧បិទទ្វារ និងបានបណ្តាលឲ្យកម្មករ កម្មការិនី ជាង៣ម៉ឺននាក់បាត់បង់ការងារ នៅក្នុងរយៈពេល៩ខែ ដើមឆ្នាំ២០០៩នេះ។

AFP Photo

កម្មករកាត់ដេរនៅក្នុងរោងចក្រមួយក្នុងទីក្រុងភ្នំពេញ។

លោក អ៊ុំ មាន រដ្ឋលេខាធិការនៃក្រសួងការងារនិងបណ្តុះបណ្តាលវិជ្ជាជីវៈ ដែលស្រង់ប្រសាសន៍ដោយទីភ្នាក់ងារព័ត៌មាន អេភី (AP) របស់អាមេរិក កាលពីថ្ងៃច័ន្ទ ទី៥ ខែតុលា បានបញ្ជាក់ថា មូលហេតុនៃការបិទទ្វាររោងចក្រទាំងនោះគឺដោយសារការបញ្ជាទិញពីបណ្តាប្រទេសផ្សេងៗមានការធ្លាក់ចុះ ព្រោះតែវិបត្តិហិរញ្ញវត្ថុពិភពលោក។

វិស័យឧស្សាហកម្មកាត់ដេរសម្លៀកបំពាក់នៅកម្ពុជាក្នុងឆ្នាំ២០០៨ មានតម្លៃស្មើនឹងជិត៣ពាន់លានដុល្លារ ដែលក្នុងនោះ ៧០%នៃផលិតផលគឺនាំចេញទៅកាន់សហរដ្ឋអាមេរិក។

របាយការណ៍របស់ធនាគារអភិវឌ្ឍន៍អាស៊ី កាលពីខែកញ្ញាកន្លងទៅនេះ បានបង្ហាញថា សេដ្ឋកិច្ចរបស់កម្ពុជានឹងស្រុតចុះប្រមាណ១,៥%ក្នុងឆ្នាំ២០០៩៕

បោះពុម្ព អ៊ីម៉េល