ការរិះគន់នេះបានតម្រូវឲ្យឯកអគ្គរាជទូតកម្ពុជាប្រចាំប្រទេសអង់គ្លេស គឺលោក ហោ ណាំបូរ៉ា ឆ្លើយតបវិញដោយអំពាវនាវឲ្យក្រុមអ្នកទ្រទ្រង់សកម្មភាពរបស់អង្គការនេះ កាត់ផ្តាច់ជំនួយឈប់ជួយតទៅទៀត ព្រោះលោកចោទថា អង្គការនេះធ្វើយុទ្ធនាការឃោសនាក្នុងបំណងអាក្រក់ប្រឆាំងនឹងរាជរដ្ឋាភិបាលកម្ពុជាសព្វថ្ងៃនេះ។
នៅក្នុងសេចក្តីថ្លែងការណ៍កាលពីថ្ងៃ៥ ខែឧសភា អង្គការ Global Witness បានរិះគន់បន្ទោសក្រុមប្រទេសផ្តល់ជំនួយដល់កម្ពុជា មានសហភាពអឺរ៉ុប សហរដ្ឋអាមេរិក ជប៉ុន ចិន ធនាគារពិភពលោកជាដើម ថា បរាជ័យនៅចំពោះមុខភស្តុតាងដ៏ច្រើនរាប់មិនអស់ស្តីពីអំពើពុករលួយក្នុងរាជរដ្ឋាភិបាលនិងការលួចទ្រព្យរដ្ឋ។
អ្នកស្រី Eleanor Nichol តំណាងអង្គការ Global Witness នៅក្រុងឡុងដ្រ៍ រាជាណាចក្រអង់គ្លេសថ្លែងថា អង្គការនេះបានព្យាយាមជួបតំណាងប្រទេសនិងស្ថាប័នទាំងអស់នោះដើម្បីបង្ហាញជូននូវអ្វីដែលគេស្រាវជ្រាវរកឃើញជាភស្តុតាងតែអ្នកខ្លះបដិសេធមិនព្រមជួប អ្នកខ្លះថា គេមានការយល់ស្របតាមក្តីបារម្ភរបស់អង្គការនេះ ប៉ុន្តែអ្នកទាំងនោះ មិនហ៊ានសន្យាថានឹងចាត់វិធានការបែបណាមួយ បំបាត់អំពើពុករលួយនោះទេ។
អ្នកស្រីថ្លែងថា ឥឡូវនេះ មានភស្តុតាងពូនជាគំនរហើយថា អំពើពុករលួយនាំឲ្យរាំងស្ទះកិច្ចប្រឹងប្រែងអភិវឌ្ឍជាតិ ហើយរបាយការណ៍ពីអង្គការនេះ ក៏បង្ហាញអំពីអំពើពុករលួយគ្រប់ទិសទីយ៉ាងច្បាស់ៗដែរ។
របាយការណ៍អង្គការ Global Witness ដែលមានចំណងជើងថា «កម្ពុជាប្រទេសសម្រាប់ដាក់លក់» ពណ៌នាលាតត្រដាងអំពីរបៀប ដែលមន្រ្តីរាជរដ្ឋាភិបាលជាន់ខ្ពស់កំពុងបែងចែកសិទ្ធិគ្រប់គ្រងធនធានធម្មជាតិឲ្យខ្លួនឯងកាន់កាប់ផ្ទាល់និងឲ្យក្រុមគ្រួសារនិងបក្សពួកកាន់កាប់ដោយឥតផ្តល់ផលឬផ្តល់ផលតិចតួចបំផុតដល់ពលរដ្ឋខ្មែរភាគច្រើន៕