ចៅហ្វាយខេត្តនៃប្រទេសGMSជួបជុំគ្នាអំពីរឿងសេដ្ឋកិច្ច
ដោយ ហ៊ុយ វណ្ណៈ
2009-09-17
អភិបាលខេត្តមកពីប្រទេសចំនួន៦នៃមហាអនុតំបន់ទន្លេមេគង្គ (GMS) បានជួបពិភាក្សាគ្នានៅរាជធានីភ្នំពេញ នៅថ្ងៃពុធ ទី១៦ ខែកញ្ញា ដើម្បីរកវិធីធ្វើឲ្យប្រសើរឡើងនូវគោលដៅអាទិភាព៩ចំណុចដើម្បីជំរុញកំណើនរបៀងសេដ្ឋកិច្ច ដែលក្នុងនោះរួមមាន សម្របសម្រួលការនាំទំនិញឆ្លងកាត់ព្រំដែន ជំរុញវិស័យទេសចរណ៍ គមនាគមន៍ និងធ្វើសមាហរណកម្មទីផ្សារជាដើម។
RFA/Huy Vannak
លោក សុខ ចិន្តាសោភា ជារដ្ឋមន្ត្រីប្រតិភូអមនាយករដ្ឋមន្ត្រីនៃប្រទេសកម្ពុជា និងជាប្រធាននៃកិច្ចប្រជុំនោះ បានថ្លែងប្រាប់វិទ្យុអាស៊ីសេរីនៅឯពិធីនោះថា ប្រទេសទាំង៦នៃមហាអនុតំបន់ទន្លេមេគង្គ ដែលរួមមានកម្ពុជា ចិន លាវ វៀតណាម ថៃ និងភូមា បានចុះហត្ថលេខាលើកិច្ចព្រមព្រៀងស្តីពីពាណិជ្ជកម្មឆ្លងកាត់ព្រំដែនរួចហើយ ទាំងក្នុងក្របខ័ណ្ឌទ្វេភាគី និងជាពហុភាគី ប៉ុន្តែគេនៅមើលឃើញថា ពាណិជ្ជកម្មឆ្លងកាត់ព្រំដែន ជាពិសេសបណ្តាខេត្តជាប់ព្រំដែននោះ គឺនៅមានឧបសគ្គនៅឡើយ។
លោក សុខ ចិន្ដាសោភា ថ្លែងយ៉ាងដូច្នេះ ៖ «កិច្ចព្រមព្រៀងហ្នឹងឈ្មោះខ្លីអ៊ីចឹងទេ ប៉ុន្តែមែនទែនគ្របដណ្ដប់ពិធីសារ និងឧបសម្ព័ន្ធ ២០ឯណោះ មួយនិយាយពីដឹកជញ្ជូនមនុស្សទៅ មួយដឹកជញ្ជូនទំនិញទៅ មួយរបៀបបើកបរអី ។ល។ និង ។ល។ ទៅ។ ដូច្នេះនិយាយជារួមទៅ យើងបានចុះហត្ថលេខាច្រើន ប៉ុន្តែជាក់ស្ដែងយើងត្រូវធ្វើការអនុវត្តជាក់ស្ដែង»។
សូមជម្រាបថា សេចក្តីរាយការណ៍កន្លងមក បានឲ្យដឹងថា ផលដំណាំកសិកម្មរបស់កសិករខ្មែរនៅបណ្តាខេត្តជាប់ព្រំដែនថៃ ដូចជាដំឡូងមីជាដើម ត្រូវអាជ្ញាធរថៃ រារាំងមិនឲ្យនាំចូលយកទៅលក់ក្នុងទីផ្សារថៃនោះឡើយ។
ទោះបីជាយ៉ាងណាក៏ដោយ លោក សុខ ចិន្តាសោភា ថ្លែងរំពឹងថា វេទិកាជួបគ្នារវាងអភិបាលខេត្តនៃប្រទេសទាំង៦ ដែលគាំទ្រពីធនាគារអភិវឌ្ឍន៍អាស៊ី នឹងជួយធ្វើឲ្យមន្ត្រីថ្នាក់ខេត្តនិងថ្នាក់មូលដ្ឋានឯទៀតចូលរួមជួយជំរុញកំណើនរបៀងសេដ្ឋកិច្ចនេះ ៖ «ស្អីទៅដែលគេហៅថា របៀងសេដ្ឋកិច្ច? របៀងសេដ្ឋកិច្ច គឺផ្លូវថ្នល់នៅតែផ្លូវថ្នល់អ៊ីចឹង ប៉ុន្តែអមហ្នឹង យើងត្រូវទាមទារឲ្យមានសាលារៀន មានមន្ទីរពេទ្យ មានកសិដ្ឋាន មានរោងចក្រ នៅកន្លែងណាមួយទៀត មានដាំដើមស្វាយទៅ មានផ្សារមានអី ហ្នឹងហើយដែលយើងចង់ឃើញ»។
របាយការណ៍ពីក្រសួងពាណិជ្ជកម្មកម្ពុជា បានឲ្យដឹងថា កម្ពុជានាំចេញជាសំខាន់គឺផលិតផលកសិកម្ម មានដូចជា គ្រាប់ធញ្ញជាតិ ថ្នាំជក់ កៅស៊ូ ឈើ ស្បែកសត្វ និងសំណល់សម្រាប់កែច្នៃឡើងវិញ។
របាយការណ៍ដដែលសរសេរទៀតថា ពាណិជ្ជកម្មឆ្លងដែនរវាងកម្ពុជា-ថៃ និងកម្ពុជា-វៀតណាម គឺក្នុងឆ្នាំ២០០៩នេះ ថៃនឹងនាំចូលទំនិញមកកម្ពុជាក្នុងតម្លៃប្រមាណ ១.៨០០លានដុល្លារ ហើយកម្ពុជានាំទំនិញចេញទៅថៃក្នុងតម្លៃ ប្រមាណ ២០០លានដុល្លារប៉ុណ្ណោះ។ ចំណែកឯវៀតណាមវិញ រំពឹងថា នឹងនាំទំនិញចូលមកកម្ពុជាក្នុងតម្លៃ ២.០០០លានដុល្លារនៅឆ្នាំ២០១០៕
អត្ថបទដែលទាក់ទង
ក្រុមហ៊ុនវៀតណាមគ្រោងមករាវរកប្រេងកាតនៅក្នុងបឹងទន្លេសាប
WB៖ GDPរបស់កម្ពុជាធ្លាក់ចុះ-២%ក្នុងឆ្នាំ២០០៩
កម្ពុជា-ថៃគ្រោងអនុញ្ញាតឲ្យទេសចរចេញចូលដោយពុំចាំបាច់មានទិដ្ឋាការ
ក្រុមហ៊ុនវៀតណាមស្នើសុំអាជ្ញាប័ណ្ណរកដីសម្បទានកាន់តែច្រើនឡើងៗ
អ្នកជំនាញនិយាយពីផលប៉ះពាល់របស់កម្ពុជាក្នុងពេលមានវិបត្តិពិភពលោក
រោងចក្រ៧៧នៅកម្ពុជាបិទទ្វារក្នុងដើមឆ្នាំនេះដោយសារវិបត្តិពិភពលោក
IMF៖ សេដ្ឋកិច្ចកម្ពុជានឹងថយចុះច្រើនជាងការរំពឹងទុក
ស.រ.អា.ផ្ដល់ថវិកាជិត៨លានដុល្លារដើម្បីជំរុញការលូតលាស់ផ្នែកសេដ្ឋកិច្ចនៅកម្ពុជា
