ពលរដ្ឋម្នាក់មានប្រសាសន៍ត្អូញត្អែរដូច្នេះថា ៖ «បោះឆ្នោតហើយ លែងនិយាយសោះ ឡើងទៅណាឡើងទៅ។ ប្រហុកឡើងមួយគីឡូក្រាម ៨ពាន់រៀល មុនបោះឆ្នោតតែ ៧ពាន់ទេ ហើយរដ្ឋាភិបាលអត់មានបញ្ចុះ មានអីទេ។ អ្នកលក់អ្នកដូរឥឡូវ រអ៊ូរទាំគ្រប់តែគ្នា ពិបាករស់នៅ ស្អីក៏ឡើងៗ អ៊ីចេះ»។
ការត្អូញត្អែរនេះ បានធ្វើឡើង ខណៈដែលប្រជាជនជាច្រើនបានរំពឹងថា ក្រោយបោះឆ្នោតទំនិញសព្វសារពើអាចចុះថ្លៃ តាមការឃោសនាសន្យាបញ្ចុះតម្លៃទំនិញរបស់គណបក្សនយោបាយមុនបោះឆ្នោត។
អាជីវករលក់គ្រឿងសំអាងនៅផ្សារចោមចៅ រាជធានីភ្នំពេញ អ្នកស្រី គិម ញ៉ុល អះអាងថា ក្រោយបោះឆ្នោត ៤ ទៅ ៥ថ្ងៃនេះ របររកស៊ីមិនសូវចំណេញឡើយ។ អ្នកស្រីថា ប្រាក់ចំណេញ បានយកទៅទិញគ្រឿងសំអាង មកលក់បន្ថែម បែរជាឡើងថ្លៃ ៣ដុល្លារក្នុង១កេស។ មិនតែប៉ុណ្ណោះ ប្រាក់រៀលឡើងថ្លៃ ឯប្រាក់ដុល្លារបានធ្លាក់ថ្លៃ ទើបគាត់ខាត។
អ្នកលក់ដូរនៅផ្សារចោមចៅដែរ អ្នកស្រី លី ឃាង អះអាងថា ប្រេងឆា មីក្រៀម ទៀន ថ្នាំបាញ់មូស បានឡើងថ្លៃ នៅក្រោយការបោះឆ្នោត។ ឯទឹកដោះគោឆៅ បានចុះថ្លៃទៅវិញ។ រីឯអង្ករ ត្រីខកំប៉ុង ស្ករសនៅតម្លៃដដែល ៖ «មានតែប្រេងឆាទេឡើងថ្លៃនោះ ១ដប ១៨.០០០ ២លីត្រ។ មុនបោះឆ្នោត ៩ពាន់»។
អ្នកលក់មាសនៅផ្សារចោមចៅដែរ លោក ថូ បានអះអាងថា ហាងឆេងមាស ប្រាក់ និងផ្លាទិន បានឡើងថ្លៃ ក្រោយបោះឆ្នោត ៖ «បើនិយាយពីតម្លៃមាសវិញ កាលមុនបោះឆ្នោត វាចុះនៅសល់ ១០៧ដុល្លារ ដល់ពេលបោះឆ្នោតហើយ ឡើងដល់ ១១៣ដុល្លារ ក្នុងមួយជី»។
ប្រជាជននៅស្រុកកណ្តាលស្ទឹង ខេត្តកណ្តាល លោក កុយ ពេជ្ររស្មី បានអះអាងថា ក្រោយបោះឆ្នោតទំនិញឡើងថ្លៃ តាមតម្លៃសាំង។ លោកថា កាលមុនបោះឆ្នោត ប្រេងសាំង ១លីត្រ ថ្លៃតែ ៥.៨០០រៀល ទៅ ៥.៨៥០រៀលប៉ុណ្ណោះ។ ក្រោយបោះឆ្នោត ប្រេងសាំងឡើងថ្លៃ ៦.០០០រៀល ក្នុង ១លីត្រ ធ្វើឲ្យតម្លៃស្រាបៀរ ទឹកក្រូច មីកញ្ចប់ អង្ករ សាច់ជ្រូក ម្ហូបអាហារ ដទៃទៀត ឡើងថ្លៃស្រឺតៗ។
លោក កុយ ពេជ្ររស្មី មានប្រសាសន៍ថា ៖ «ឡើងក្រោយបោះឆ្នោតហ្នឹង... ពីមុនតែ ១ម៉ឺនទេ ឥឡូវឡើង ១ម៉ឺន៤ពាន់ហើយ អន្ទង់។ អង្ករឡើង ៣ម៉ឺន៧ពាន់មួយតៅ ស្មើ ១៥គីឡូ។ មីលើកមុនមួយកេសតែ ២ម៉ឺន៤ពាន់ទេ ឥឡូវឡើង ២ម៉ឺន៥ពាន់ ២ម៉ឺន៦ពាន់ហើយ។ ឡើងទាំងអស់ ប៊ីយ៊ែរក៏ឡើង ស្អីក៏ឡើង ឡើងទាំងអស់ ឡើងពេលបោះឆ្នោតហើយហ្នឹងតែម្ដង»។
ជំទប់ទី១ ឃុំថ្មពួក ស្រុកថ្មពួក ខេត្តបន្ទាយមានជ័យ លោក ដា ឈៀន អះអាងថា ក្រោយបោះឆ្នោត ប្រេងសាំង ប្រេងម៉ាស៊ូត បានឡើងថ្លៃ ប្រៀបដូចទឹកជន់។ រីឯជីគីមី បានឡើងថ្លៃ ខ្លាំងជាងមុន ខណៈប្រេងសាំង ឡើងដល់ ៦.០០០រៀល ក្នុង ១លីត្រ និងប្រេងម៉ាស៊ូត ឡើង ៦.៣០០រៀល។ លោកថា មុនបោះឆ្នោត ប្រេងលក់ ត្រឹមតែ ៥.៤០០ ទៅ ៥.៥០០រៀលប៉ុណ្ណោះ។
លោក ដា ឈៀន មានប្រសាសន៍ដូច្នេះថា ៖ «បន្ទាប់ពីបោះឆ្នោតរួច គឺឡើងថ្លៃគ្រប់ប្រភេទ មានម៉ាស៊ូត និងសាំង អត់ឃើញមានភាពលំនឹងណាមួយទេ មានតែឡើងមួយថ្ងៃបន្តិចៗ ប្រែប្រួលរាល់ថ្ងៃ មិនមែនប្រែប្រួលចុះអី អានេះប្រែប្រួលឡើង ប្រេងម៉ាស៊ូត មួយថ្ងៃឡើង ៣០០រៀល។ សាំងមួយថ្ងៃឡើង ៥០០រៀល»។
ស្រ្តីមេផ្ទះនៅខេត្តបន្ទាយមានជ័យ ឲ្យដឹងថា ក្រោយការបោះឆ្នោត ទំនិញសព្វសារពើ បានឡើងថ្លៃ សូម្បីតែបន្លែស្រស់ៗ ដែលដាំក្នុងស្រុក ក៏ឡើងថ្លៃដែរ ៖ «ត្រឡាចអ៊ីចឹង កាលមុនតែ ៥០០រៀល ឥឡូវឡើង ៨០០រៀល»។
អ្នកស្រី ប៊ុន កៀង រស់នៅផ្សារក្រគរ ខេត្តពោធិ៍សាត់ បានអះអាងថា ត្រីស្រស់ៗ នេសាទពីក្នុងបឹងទន្លេសាប មានត្រីកេស ត្រីរ៉ស់ ត្រីឆ្តោ បានឡើងថ្លៃ ក្រោយបោះឆ្នោត ក្នុង១គីឡូ ២០០០រៀល។ មិនតែប៉ុណ្ណោះ គ្មានត្រីលក់ទៀតផង។ ប៉ុន្តែប្រហុក ត្រីងៀត ត្រីឆ្អើរ និងបន្លែ អាហារក្រៀម មិនទាន់ឡើងថ្លៃទេ។ រីឯស្ករត្នោត បានឡើងថ្លៃនិងគ្មានស្ករលក់ ទៀតផង។
អ្នកស្រី ប៊ុន កៀង មានប្រសាសន៍ដូច្នេះថា ៖ «កាលពីមុនបោះឆ្នោត ត្រីល្អៗ មួយគីឡូក្រាម ១៨.០០០, ១៥.០០០។ ពេលដែលបោះឆ្នោតរួចហើយនេះ ត្រីល្អៗ វាអាចឡើងដល់ ១៩.០០០ ទៅ ២ម៉ឺន ហើយត្រីអត់ល្អ វាអាចឡើងដល់ ១៥.០០០។ បើស្ករត្នោតវិញ ឡើងថ្លៃ កាលពីមិនទាន់បោះឆ្នោត មួយគីឡូក្រាម ត្រឹមតែ ១.៤០០រៀល ដល់ពេលឥឡូវនេះ បោះឆ្នោតហើយហ្នឹង ស្ករត្នោត ឡើងដល់មួយគីឡូក្រាម ១.៦០០ហើយ គ្មានស្ករទិញទៀត។ ខោអាវស្លៀកពាក់ ហើយនិងសៀវភៅកូនសិស្សរៀនអី ពេលដែលបោះឆ្នោតហើយ មកទល់ថ្ងៃនេះ ក៏នៅតែប៉ុណ្ណឹងដែរ ដូចជាមិនទាន់ឡើង មិនទាន់ចុះ ប៉ុន្តែមានទំនិញខ្លះ កុម៉្មង់យកមកលក់មិនបាន ដូចថា មានលុយទិញហើយ គ្មានរបស់លក់»។
ប្រជាជននៅស្រុកឱរ៉ាល់ ខេត្តកំពង់ស្ពឺ លោក ឌឿន អះអាងថា ធ្យូងបានឡើងថ្លៃបន្តិច ក្រោយការបោះឆ្នោត។ លោកថា ទិញធ្យូងដល់ឡ ដុតធ្យូងក្នុងព្រៃ មុនបោះឆ្នោត ១គីឡូ ថ្លៃ ៣៨០រៀល។ ក្រោយបោះឆ្នោត ធ្យូងឡើងថ្លៃ ៤០០រៀល ក្នុង ១គីឡូក្រាម។ ឯអ្នកដឹកលក់បន្ត ដល់ផ្សារនានាក្នុងទីក្រុង ១គីឡូលក់ចេញ ១.២០០រៀល ៖ «ឥឡូវហ្នឹង ធ្យូងវាឡើងបន្តិចដែរ ព្រោះប្រជាជនយើងអត់មានបានរកបានអី ហើយគេបិទព្រៃ ឥឡូវឡើងថ្លៃដែរ ប៉ុន្តែគ្រាន់បានធ្យូងតិចតួច»។
ប្រជាជននៅខេត្តតាកែវ ឲ្យដឹងថា បន្លែ សាច់ជ្រូក សាច់គោ សត្វមាន់ បានឡើងថ្លៃ ក្រោយបោះឆ្នោត ១គីឡូក្រាម ១.០០០រៀល ទៅ ២.០០០រៀល។ ទន្ទឹមនោះ ប្រេងសាំងនិងអង្ករ ក៏ឡើងថ្លៃដែរ ៖ «សាំងឡើង ៦ពាន់រៀល សាច់ជ្រូកឡើង ១៥.០០០ សាច់ជាប់ខ្លាញ់ បើសាច់សុទ្ធ ២ម៉ឺនជាង។ ឡើងគ្រប់មុខទាំងពីបន្លែ សណ្ដែកគួមួយគីឡូ ៣ពាន់ មុនបោះឆ្នោតតែ ១ពាន់»។
ប្រធានសមាគមសេដ្ឋកិច្ចកម្ពុជា លោក ចាន់ សុផល បានអះអាងថា ទំនិញបន្តឡើងថ្លៃ ក្រោយបោះឆ្នោត វាជះឥទ្ធិពលមិនល្អ ដល់ជីវភាពប្រជាជនទូទៅ ពិសេសមន្រ្តីរាជការដែលមានចំណូលប្រចាំថ្ងៃ តិចតួច ហើយគ្មានដីដាំដុះ។ លោកបន្តថា ទំនិញឡើងថ្លៃ អាចជាកត្តារដូវកាលផងនិងជាកត្តា ប្រេងប្រើប្រាស់ ជាមធ្យោបាយដឹកជញ្ជូនទំនិញ បន្តឡើងថ្លៃផង។
លោក ចាន់ សុផល មានប្រសាសន៍ថា ៖ «នៅក្នុងស្រុកយើង ការលក់សាំងហ្នឹង ដូចជា ខ្វះការប្រកួតប្រជែង អ៊ីចឹងគេអាចសហការគ្នា កំណត់ថ្លៃដូចគ្នា ជាការមួយលំបាក។ អ៊ីចឹង បើសិនជាថ្លៃអន្តរជាតិចុះ ក្នុងស្រុកយើង ប្រហែលជា មិនចុះភ្លាមទេ ប្រហែលជាត្រូវការប៉ុន្មានថ្ងៃ ដោយសារគេទិញយកមកវាថ្លៃខ្ពស់ ទាល់ទៅទិញថ្មី ទើបអាចលក់ថ្លៃថ្មីបាន»។
ជាញឹកញាប់ នាយករដ្ឋមន្រ្តីខ្មែរ ធ្លាប់សន្យាថា ដឹកនាំរដ្ឋាភិបាលច្រើនឆ្នាំបន្តទៀត ហើយសន្យាថា បញ្ចុះតម្លៃទំនិញនានា និងបង្កើនប្រាក់ខែ មន្រ្តីរាជការនិងកម្មករ ឲ្យស្របទៅតាម តម្លៃទំនិញ ក្នុងប្រទេសកម្ពុជា។ ក្រោយការរាប់សន្លឹកឆ្នោត គណបក្សប្រជាជនកម្ពុជា ដែលមានលោក ហ៊ុន សែន ឈរជានាយករដ្ឋមន្រ្តី បានឈ្នះឆ្នោតដាច់គណបក្សដទៃទៀត លើសលប់ធ្វើឲ្យម្ចាស់ឆ្នោតរង់ចាំមើល ការសន្យារបស់ថ្នាក់ដឹកនាំនោះ៕