ប្រធានសហភាពជាតិកម្ពុជាការពារកម្មករ លោក សាត់ ឈាងហួ មានប្រសាសន៍នៅថ្ងៃទី៤ ខែសីហា ថា មានសហព័ន្ធសហជីពចំនួន ៦ស្ថាប័ន គ្រោងនឹងដឹកនាំសមាជិកគាំទ្រចំនួន ១.៥០០នាក់ ដើរដង្ហែក្បួនតាមដងផ្លូវមួយចំនួនក្នុងទីក្រុងភ្នំពេញ ដើម្បីជំរុញឲ្យរដ្ឋាភិបាលកម្ពុជា បញ្ចុះតម្លៃទំនិញ និងតម្លៃប្រេងសាំងដែលកំពុងឡើងថ្លៃ។
លោក សាត់ ឈាងហួ ឲ្យដឹងថា ពិធីដង្ហែក្បួននឹងទៅប្រមូលផ្ដុំគ្នាទៅទីលានប្រជាធិបតេយ្យ បន្ទាប់មកអ្នកចូលរួមនឹងថ្លែងអំពាវនាវទៅប្រមុខដឹកនាំរដ្ឋាភិបាល ៖ «ប្រជាពលរដ្ឋ ពិសេសកម្មករ កម្មការិនីនៅតាមរោងចក្រមានការខ្វះខាត ប្រាក់ខែតិច ហើយម្ហូបអាហារចេះតែបន្តឡើងថ្លៃ។ តម្លៃឈ្នួលផ្ទះ តម្លៃទឹកភ្លើងក៏ឡើងថ្លៃ បានមកគឺផ្គត់ផ្គង់មិនគ្រប់។ ខ្ញុំរំពឹងថា រដ្ឋាភិបាលនឹងជួយអន្តរាគមន៍ ពីព្រោះវាជាសំណូមពររបស់ប្រជាពលរដ្ឋទូទៅទាំងអស់ ទាំងប្រជាពលរដ្ឋក្រីក្រ ទាំងមន្ត្រីរាជការ»។
ទោះយ៉ាងណាលោកឲ្យដឹងថា មកដល់ថ្ងៃព្រហស្បតិ៍ ទី៤ ខែសីហា មិនទាន់មានការឆ្លើយតប ពីអាជ្ញាធររាជធានីភ្នំពេញ ចំពោះសេចក្ដីជូនដំណឹងចុះថ្ងៃទី២៥ ខែកក្កដា របស់សង្គមស៊ីវិលពីគម្រោងដង្ហែក្បួនតាមផ្លូវនៅថ្ងៃអាទិត្យ ទី៧ ខែសីហា នៅឡើយទេ។ ប៉ុន្តែមេដឹកនាំសហជីពកម្មករចំនួន ៦ស្ថាប័ន បានអះអាងថា ពួកគេនឹងដឹកនាំក្បួនដង្ហែតាមផ្លូវទៅតាមការគ្រោងទុក បើទោះអាជ្ញាធរបដិសេធសំណើរបស់ពួកគេក្ដី។
បញ្ហាតម្លៃទំនិញឡើងថ្លៃ មន្ត្រីសមាជិកសភាមកពីគណបក្សប្រឆាំងមួយចំនួននៅកម្ពុជា ក៏បានជំរុញទៅថ្នាក់ដឹកនាំរដ្ឋាភិបាលឲ្យធ្វើអន្តរាគមន៍បញ្ចុះតម្លៃទំនិញដែលចេះតែបន្តឡើងថ្លៃខ្ពស់នៅលើទីផ្សារកម្ពុជា នេះដែរ។
លោក យឹម សុវណ្ណ មន្ត្រីនាំពាក្យគណបក្ស សម រង្ស៊ី មានប្រសាសន៍ថា បច្ចុប្បន្នរដ្ឋាភិបាលហាក់គ្មានឆន្ទៈបញ្ចុះតម្លៃទំនិញនៅលើទីផ្សារដើម្បីជួយសម្រួលដល់ការលំបាករបស់ប្រជាពលរដ្ឋក្រីក្រ មន្ត្រីរាជការ និងកម្មករ កម្មការិនីដែលមានប្រាក់ចំណូលប្រចាំខែតិចតួចនោះទេ។
ចំណែកលោក កឹម សុខា ប្រធានគណបក្សសិទ្ធិមនុស្សមានប្រសាសន៍ថា រដ្ឋាភិបាលគួរមានវិធានការឲ្យមានប្រសិទ្ធភាព ដើម្បីទប់ស្កាត់តម្លៃទំនិញកំពុងបន្តឡើងថ្លៃខ្ពស់នៅលើទីផ្សារកម្ពុជា ដោយមិនត្រូវគេចមិនទទួលខុសត្រូវចំពោះមុខប្រជាពលរដ្ឋខ្មែរក្រីក្រនោះទេ។
លោក កឹម សុខា បន្ថែម ៖ «បញ្ហាសព្វថ្ងៃនេះគឺបញ្ហាទំនិញឡើងថ្លៃដែលរដ្ឋាភិបាលមិនមានសមត្ថភាពក្នុងការទប់ស្កាត់។ ដូច្នេះប្រជាពលរដ្ឋក្នុងសង្គមប្រជាធិបតេយ្យគេមានសិទ្ធិដើម្បីទាមទារឲ្យរដ្ឋាភិបាលដោះស្រាយបញ្ហារបស់គេ។ ការទាមទារនេះគឺជាសិទ្ធិស្របច្បាប់ទៅតាមរដ្ឋធម្មនុញ្ញ»។
កាលពីថ្ងៃទី២៥ ខែកក្កដា អង្គការសង្គមស៊ីវិលចំនួន ៦ស្ថាប័ន បានដាក់លិខិតជូនដំណឹងទៅសាលារាជធានីភ្នំពេញ ដើម្បីស្នើសុំដង្ហែក្បួនតាមដងផ្លូវស្នើឲ្យរាជរដ្ឋាភិបាលកម្ពុជា អន្តរាគមន៍បញ្ចុះតម្លៃម្ហូបអាហារ និងតម្លៃទំនិញគ្រប់ប្រភេទ ជាពិសេសបញ្ចុះតម្លៃប្រេងសាំង។
បន្ថែមលើនេះ កាលពីថ្ងៃទី១៥ ខែកក្កដា ក្រុមអង្គការសង្គមស៊ីវិលក៏បានដាក់លិខិតមួយច្បាប់ជូនលោកនាយករដ្ឋមន្ត្រី ហ៊ុន សែន ដើម្បីជួយអន្តរាគមន៍បញ្ចុះតម្លៃប្រេងសាំង តម្លៃម្ហូបអាហារ និងតម្លៃទំនិញគ្រប់ប្រភេទនៅលើទីផ្សារកម្ពុជា ផងដែរ។ ប៉ុន្តែរហូតមកដល់ពេលនេះ មិនមានការឆ្លើយតប ឬការអន្តរាគមន៍ណាមួយពីប្រមុខដឹកនាំរដ្ឋាភិបាល ឬស្ថាប័នពាក់ព័ន្ធនោះទេ៕