អគ្គលេខាធិការអាជ្ញាធរជាតិប្រយុទ្ធប្រឆាំងនឹងគ្រឿងញៀន លោក លួ រ៉ាមីន បានមានប្រសាសន៍ថារដ្ឋាភិបាលធ្លាប់បានស្នើសុំឲ្យមានការបង្កើតការិយាល័យ DEA នេះ តាំងពីជំនួបរវាងប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក ស ខេង ជាឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ ជាមួយនឹងអតីតឯកអគ្គរដ្ឋទូតសហរដ្ឋអាមេរិក លោក Charles A. Ray និងតំណាង DEA នៅទីក្រុងបាងកកប្រទេសថៃមកម៉្លេះ ។
លោក លួ រ៉ាមីន បានឲ្យដឹងថា ៖ «ខ្ញុំបានរំឭកគាត់ថា ឥឡូវនៅស្ថានទូតអាមេរិកបច្ចុប្បន្ននេះគឺមានការិយាល័យរបស់ FBI របស់ស្ថាប័នផ្សេងៗហើយ ។ ហើយស្ថានទូត កញ្ញា ចេនីហ្វ័រហ្នឹង ក៏បាននិយាយជាមួយខ្ញុំផ្ទាល់ដែរ ថាបើសិនជានេះស្ថានទូតក៏មានកន្លែងសម្រាប់ផ្ដល់ឲ្យ DEA បើសិន DEA សម្រេចថាបើកការិយាល័យនៅភ្នំពេញ ប៉ុន្តែទាំងអស់ហ្នឹងគឺការរង់ចាំការសម្រេចពី DEA នៅអាមេរិក» ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក លួ រ៉ាមីន បានមានប្រសាសន៍ថាការបង្កើតការិយាល័យ DEA នៅកម្ពុជា នឹងផ្ដល់ផលប្រយោជន៍ដល់ប្រទេសទាំងពីរ ។
មន្ត្រីអ្នកនាំពាក្យស្ថានទូតសហរដ្ឋអាមេរិកប្រចាំប្រទេសកម្ពុជា លោក John Johnson បានថ្លែងបញ្ជាក់ថាស្ថានទូតនៅមិនទាន់បានទទួលលិខិតជាផ្លូវការណាមួយពីរដ្ឋាភិបាលខ្មែរសុំឲ្យមានការបើកការិយាល័យ DEA នៅក្នុងប្រទេសកម្ពុជានោះទេ ។
លោក John Johnson បានមានប្រសាសន៍ឲ្យដឹងថា ការិយាល័យ DEA របស់សហរដ្ឋអាមេរិកប្រចាំទីក្រុងបាងកក ប្រទេសថៃ ក៏បានកំពុងតែសហការជាមួយនឹងរដ្ឋាភិបាលខ្មែរផងដែរ ។
លោក John Johnson បានមានប្រសាសន៍ថា ៖ "ខ្ញុំគិតថាចាំបាច់ត្រូវមានការស្នើសុំជាផ្លូវការជាមុនសិន ។ បើមិនទាន់មានការស្នើសុំជាផ្លូវការណាមួយនោះទេ ខ្ញុំក៏មិនអាចអត្ថាធិប្បាយថាតើសហរដ្ឋអាមេរិកនឹងបើកការិយាល័យនោះ ឬអត់នោះទេ ។ យើងមានការិយល័យ DEA ប្រចាំតំបន់មួយនៅទីក្រុងបាងកក ហើយការិយាល័យនោះតែងតែមានទំនាក់ទំនងល្អជាមួយនឹងរដ្ឋាភិបាលខ្មែរ និងមន្ត្រីសហការីជាច្រើនតាំងពីដើមរៀងមក" ។
បច្ចុប្បន្ន DEA មានការិយាល័យរបស់ខ្លួននៅឯក្រៅប្រទេសចំនួន ៨៦ការិយាល័យ ក្នុង ៦២ប្រទេស ដែលក្នុងនោះសហរដ្ឋអាមេរិកក៏បានបង្កើតការិយាល័យ DEA នៅក្នុងប្រទេសថៃ លាវ និងវៀតណាមផងដែរ ។
ភ្នាក់ងារពង្រឹងការបង្ក្រាបគ្រឿងញៀន (DEA) ក៏បានផ្ដល់ទឹកប្រាក់៥ម៉ឺនដុល្លារសម្រាប់សកម្មភាពបំផ្លាញសារធាតុដែលអាចផលិតជាគ្រឿងញៀនចំនួន៤តោន ដែលត្រូវបានគេរកឃើញនៅក្នុងខេត្តកំពង់ស្ពឺ កាលពីថ្ងៃទី១ ខែមេសា ឆ្នាំ ២០០៧ កន្លងទៅនេះ ។
គួរជម្រាបផងដែរថាសហរដ្ឋអាមេរិកក៏ទើបតែនឹងបានបង្កើតការិយាល័យស៊ើបអង្កេតរបស់ខ្លួន ហៅកាត់ថា FBI កាលពីថ្ងៃទី៣១ មករា ឆ្នាំ ២០០៨ ដែលមានឈ្មោះជាផ្លូវការថា ការិយាល័យអនុព័ន្ធច្បាប់ ហើយមានទីតាំងស្ថិតក្នុងស្ថានទូតសហរដ្ឋអាមេរិកនាទីក្រុងភ្នំពេញ ៕