ប្រធានអង្គការមូលនិធិទ្រទ្រង់អរិយធម៌ខ្មែរនិងក្រុមអ្នកច្បាប់ការពារសិទ្ធិកម្ពុជានៅក្នុងសន្និសីទសារព័ត៌មានថ្ងៃនេះបានថ្លែងចោទប្រកាន់ថា ប្រទេសថៃបានប្រើនយោបាយឧក្រិដ្ឋសង្រ្គាមមកលើជនស៊ីវិលខ្មែរ។ រដ្ឋាភិបាលថៃត្រូវតែសងតាមពាក្យប្តឹងរបស់សង្គមស៊ិវិលនិងរដ្ឋាភិបាលកម្ពុជា។
ប្រធានក្រុមអ្នកច្បាប់ការពារសិទ្ធិកម្ពុជា លោក សុក សំអឿន មានប្រសាសន៍អំពីការរំលោភអធិបតេយ្យភាពខ្មែរពីសំណាក់ប្រទេសថៃដូច្នេះ ៖ «កន្លែងហ្នឹងគឺជាទីផ្សារដែលថៃដឹងច្បាស់ថាជាកន្លែងដែលប្រជាពលរដ្ឋស៊ីវិលរស់នៅ រឿងហេតុអីបានជាកងទ័ពថៃនៅតែប្រើកម្លាំងអាវុធបំផ្លាញរបៀបហ្នឹង»។
ប្រធានអង្គការមូលនិធិទ្រទ្រង់អរិយធម៌ខ្មែរ លោក មឿង សុន បន្ថែមថា ពួកគេនឹងប្តឹងបន្តទៅអង្គការសហប្រជាជាតិ ប្រសិនបើថៃនៅតែមិនព្រមទទួលសងនូវជំងឺចិត្តជនស៊ីវិលខ្មែរនិងមិនទទួលស្គាល់អំពើឈ្លានពានរបស់ខ្លួនមកលើខ្មែរ។
លោក មឿង សុន បានបញ្ជាក់ថា ៖ «ស្នើទៅអង្គការសហប្រជាជាតិដើម្បីឲ្យមានគណៈកម្មការអន្តរជាតិមួយចុះមកពិនិត្យដល់ទីកន្លែង»។
ការទាមទារនេះបានធ្វើឡើងនៅគ្រាដែលអ្នកនាំពាក្យក្រសួងមហាផ្ទៃថៃ លោក ថារិទ្ធិ ឆារ៉ុងវ៉ាត់ បានត្រូវដកស្រង់សម្ដីដោយកាសែតមួយឈ្មោះ The Nation កាលពីថ្ងៃទី១២ ឧសភា ថា ផ្សារនៅមុខជណ្តើរប្រាសាទព្រះវិហារដែលរងការឆេះក្នុងការប្រយុទ្ធនាថ្ងៃទី៣ ខែមេសានោះ ថាជាទឹកដីរបស់ថៃ ហើយថៃមិនទទួលខុសត្រូវក្នុងការសងនោះទេ។
អ្នកនាំពាក្យក្រសួងការបរទេសកម្ពុជា លោក កុយ គួង ថ្លែងថា ការបដិសេធរបស់ថៃនោះមកពីថៃមិនចេះមើលផែនទីដែលសៀមបានទទួលស្គាល់ឆ្នាំ១៩០៤ និង ១៩០៧ និងសៀមព្រមចុះហត្ថលេខាលើសន្ធិសញ្ញា MOU ឆ្នាំ២០០០។
លោកបន្តថា ថៃបានចាញ់ក្តីនៅឆ្នាំ១៩៦២ ដែលតុលាការអន្តរជាតិក្រុងឡាអេបានកាត់ក្តីឲ្យប្រទេសខ្មែរបានឈ្នះក្តីក្នុងរឿងជម្លោះប្រាសាទព្រះវិហាររវាងខ្មែរនិងសៀមនោះ។
លោក កុយ គួង បានមានប្រសាសន៍ថា ៖ «សេចក្ដីសម្រេចហ្នឹងបានសម្រេចថា ទី១ ប្រាសាទព្រះវិហារគឺជារបស់កម្ពុជា ទី២ តំបន់ដែលជុំវិញជាប់ប្រាសាទព្រះវិហារហ្នឹង ហើយទាមទារឲ្យថៃដកកងទ័ពចេញឲ្យផុតពីតំបន់នោះ ហើយទី៣ សេចក្ដីសម្រេចហ្នឹងបានសម្រេចឲ្យថៃប្រគល់វត្ថុបុរាណទាំងឡាយដែលថៃបានយកចេញពីប្រាសាទហ្នឹងឲ្យបញ្ចូលត្រឡប់មកវិញ។ ដូច្នេះបើទៅលើផ្លូវច្បាប់ទាំងពីរចំណុចនោះគឺថាទឹកដីហ្នឹងគឺជាទឹកដីរបស់កម្ពុជាពេញលេញតាមផ្លូវច្បាប់ទាំងស្រុង។ ហើយចំពោះការចោទប្រកាន់របស់ភាគីថៃដែលថាទឹកដីជារបស់ខ្លួននោះមានន័យថា ភាគីថៃមិនបានពិនិត្យមើលឡើងវិញអំពីសេចក្ដីសម្រេចរបស់តុលាការទីក្រុងឡាអេ ក៏ដូចជាមិនចេះមើលផែនទី»។
ជាមួយគ្នានេះដែរ អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បញ្ជាក់ថា ការច្រានចោលមិនទទួលខុសត្រូវចំពោះការបំផ្លិចបំផ្លាញនោះជាទង្វើមិនគោរពសិទ្ធិប្រទេសដទៃ។
លោកថា សូម្បីតែកុបកម្មព្រំដែនរវាងកម្មករខ្មែរនិងប្រជាជនថៃ ប្រទេសកម្ពុជាបានទទួលខុសត្រូវចំពោះរឿងនោះ៕